ភ្ជាប់​ទៅ​គេហទំព័រ​ទាក់ទង

ការ​វាយប្រហារ​ដោយ​សារធាតុ​គីមី​របស់​រដ្ឋ​ឥស្លាម​បាន​បណ្តាល​ក្មេង​ម្នាក់​ស្លាប់ និង​រងរបួស​ជាច្រើន​នាក់


មនុស្ស​ដែល​រង​ប៉ះពាល់​ដោយ​ការ​វាយប្រហារ​ដោយ​សារធាតុ​គីមី រងចាំ​ការ​ព្យាបាល​នៅ​មន្ទីរពេទ្យ​មួយ​ក្នុង​ក្រុង Taza ប្រទេស​អ៊ីរ៉ាក់។

ក្រុម​មន្ត្រី​អ៊ីរ៉ាក់​បាន​និយាយ​កាល​ពី​ថ្ងៃ​សៅរ៍​ថា​ ពួក​រដ្ឋ​ឥស្លាម​បាន​ធ្វើ​ការ​វាយ​ប្រហារ​គីមី​ពីរ​នៅ​ជិត​ក្រុង​ Kirkuk ក្នុង​ប៉ែក​ខាង​ជើង​នៃ​ប្រទេស​អ៊ីរ៉ាក់ បណ្តាល​ឱ្យ​កុមារី​ម្នាក់​អាយុ​បី​ឆ្នាំ​ស្លាប់​ ធ្វើ​ឱ្យ​របួស​មនុស្ស​៦០០នាក់​ និង​បណ្តាល​ឱ្យ​មនុស្ស​រាប់​រយ​នាក់​ទៀត​រត់​គេច​ខ្លួន​ចេញ​ពី​ទី​នោះ។

ក្រុម​មន្ត្រី​សន្តិសុខ​ និង​ក្រុម​មន្ត្រី​ពេទ្យ​បាន​និយាយ​ថា​ ការ​វាយប្រហារ​ថ្មីៗ​បំផុត​នេះ​បាន​កើត​មាន​ឡើង​កាលពី​ព្រឹក​ថ្ងៃ​សៅរ៍​នៅ​ក្នុង​ក្រុង​តូចមួយ​ឈ្មោះ Taza ដែល​បាន​រង​ការ​បាញ់​ផ្តក់​ដោយ​រ៉ុក្កែត​មាន​ផ្ទុក​សារធាតុ​គីមី​ពុល​កាល​ពី​បី​ថ្ងៃ​មុន​នោះ។

លោក​នាយក​រដ្ឋ​មន្ត្រី​អ៊ីរ៉ាក់​ Haider al-Abadi បាន​ប្តេជ្ញា​ថា​នឹង​សងសឹក​ប្រឆាំង​នឹង​ពួក​រដ្ឋ​ឥស្លាម​ដែល​បាន​ធ្វើ​ការ​វាយ​ប្រហារ​នេះ។​ លោក​នាយក​រដ្ឋ​មន្ត្រី​នៃ​ប្រទេស​អ៊ីរ៉ាក់​បាន​និយាយ​នៅ​ក្នុង​សេចក្តី​ថ្លែងការណ៍​មួយ​ថា​ ការ​វាយ​ប្រហារ​ដែល​បាន​ត្រូវ​សង្ស័យ​ថា​ជា​ការ​វាយ​ប្រហារ​ដោយ​ឧស្ម័ន​ម៉្យាង​ដែល​មាន​ឈ្មោះ​ថា mustard លើ​ក្រុង Taza ដែល​បាន​បណ្តាល​ឱ្យ​កុមារី​ម្នាក់​អាយុ​បី​ឆ្នាំ​ម្នាក់​បាត់បង់​ជីវិត​ «នឹង​ត្រូវ​ទទួល​ទណ្ឌកម្ម»។

លោក Adel Hussein ដែល​ជា​មន្ត្រី​មូលដ្ឋាន​ម្នាក់​នៅ​ក្នុង​ក្រុង Taza បាន​និយាយ​ថា «មាន​ការ​ភ័យ​ខ្លាច និង​ការ​ភ្ញាក់ផ្អើល​ក្នុង​ចំណោម​ស្ត្រី​ និង​កុមារ។ ពួកគេ​បាន​សុំ​ដល់​រដ្ឋាភិបាល​កណ្តាល​ឱ្យ​ជួយ​សង្គ្រោះ​ពួកគេ»។ លោក Hussein បាន​ថ្លែង​ថា​ ក្រុម​អ្នក​ជំនាញការ​អាល្លឺម៉ង់​ និង​អាមេរិកាំង​បាន​ទៅ​ដល់​តំបន់​នោះ​ហើយ​ដើម្បី​ធ្វើ​តេស្ត​អំពី​វត្តមាន​នៃ​សារធាតុ​គីមី​ពុល៕

XS
SM
MD
LG