អង្គការតុលាការនៃប្រទេសអ៊ីរ៉ង់បាននិយាយថា ខ្លួនបានកាត់ទោសប្រហារជីវិតបុរសម្នាក់ពីបទធ្វើចារកម្មឱ្យទីភ្នាក់ងារស៊ើបការសម្ងាត់អាមេរិក CIA នៅពេលមានកំណើនភាពតានតឹងរវាងរដ្ឋាភិបាលក្រុងតេរ៉ង់ និងសហរដ្ឋអាមេរិក។
លោក Gholamhhossein Esmaili អ្នកនាំពាក្យអង្គការតុលាការអ៊ីរ៉ង់បាននិយាយកាលពីថ្ងៃអង្គារថា មនុស្សពីរនាក់ទៀតបានត្រូវកាត់ទោសឱ្យជាប់គុក ១០ឆ្នាំសម្រាប់ឧក្រិដ្ឋកម្មដូចគ្នានេះដែរ ហើយមនុស្សទីបួនបានត្រូវកាត់ទោសឱ្យជាប់គុក១០ឆ្នាំ ដោយសារបានធ្វើចារកម្មឱ្យប្រទេសអង់គ្លេស។
លោក Esmaili បាននិយាយថា បុគ្គលដែលមានទោសប្រហារជីវិតបានតវ៉ាឡើងឧទ្ធរណ៍ ហើយថាតុលាការឧទ្ធរណ៍របស់ប្រទេសនឹងធ្វើសេចក្តីសម្រេចចុងក្រោយបង្អស់។
សាលក្រមទាំងនេះមានឡើងនៅពេលមានភាពតានតឹងតទៅទៀតរវាងប្រទេសអ៊ីរ៉ង់និងសហរដ្ឋអាមេរិក នៅក្រោយលោកប្រធានាធិបតី Donald Trump បានដកប្រទេសអាមេរិកចេញពីកិច្ចព្រមព្រៀងនុយក្លេអ៊ែរឆ្នាំ២០១៥ ជាមួយពួកប្រទេសមហាអំណាច។ លោក Trump ក៏បានដាក់ទណ្ឌកម្មជាថ្មីដែលធ្វើឱ្យសេដ្ឋកិច្ចនៃប្រទេសអ៊ីរ៉ង់ទន់ខ្សោយនៅក្នុងការប៉ុនប៉ងមួយ ដើម្បីដាក់គំនាបសង្កត់លើរដ្ឋាភិបាលក្រុងតេរ៉ង់ឱ្យធ្វើការចរចាជាថ្មីអំពីកិច្ចព្រមព្រៀងនេះ។
លោក Esmaili បានប្រកែកមិនព្រមប្រាប់ឈ្មោះជនដែលមានទោសប្រហារជីវិតនេះទេ។
លោក Esmaili បាននិយាយថា បុរសពីរនាក់ដែលបានត្រូវកាត់ទោសឱ្យជាប់គុក១០ឆ្នាំពីបទធ្វើចារកម្មឱ្យ CIA ជាពលរដ្ឋអ៊ីរ៉ង់ឈ្មោះ Ali Nefriyeh និងឈ្មោះ Mohammad Ali Babapour។ បុរសទាំងពីរនាក់នេះបានត្រូវបញ្ជាឱ្យបង់ប្រាក់ ៥ម៉ឺន៥ពាន់ដុល្លារ ដែលពួកគេបានទទួល។
លោក Esmaili បាននិយាយថា បុរសដែលបានត្រូវកាត់ទោសដោយសារបានធ្វើចារកម្មឱ្យផ្នែកស៊ើបការសម្ងាត់នៃប្រទេសអង់គ្លេសឈ្មោះ Mohammad Amin-Nasab ដែលជាពលរដ្ឋអ៊ីរ៉ង់ដែរ។
លោក Esmaili ក៏បានប្រកាសដែរថា តុលាការឧទ្ធរណ៍មួយបានកាត់បន្ថយទោសជាប់គុកសម្រាប់ប្អូនលោកប្រធានាធិបតី Hassan Rouhani ដែលបានត្រូវកាត់ទោសពីបទស៊ីសំណូក។ ទោសរបស់ Hossein Fereidoun បានត្រូវកាត់បន្ថយពីជាប់គុក៧ឆ្នាំមកនៅត្រឹមជាប់គុក៥ឆ្នាំ៕
