លោក Hassan Rouhani ប្រធានាធិបតីអ៊ីរ៉ង់បានចុះហត្ថលេខាលើកិច្ចព្រមព្រៀងពាណិជ្ជកម្មមួយចំនួនជាមួយនឹងប្រទេសបារាំងដែលមានទឹកប្រាក់រាប់ពាន់លានដុល្លារ បន្ទាប់ពីគេបានដកទណ្ឌកម្មអន្តរជាតិនានា ជុំវិញកម្មវិធីនុយក្លេអ៊ែររបស់ប្រទេសអ៊ីរ៉ង់។
លោក Rouhani បានថ្លែងប្រាប់មេដឹកនាំពាណិជ្ជកម្មបារាំងមួយក្រុម បន្ទាប់ពីលោកបានទៅដល់ទីក្រុងប៉ារីសដែលជារដ្ឋធានីរបស់បារាំងកាលពីថ្ងៃព្រហស្បតិ៍ថា «ប្រទេសអ៊ីរ៉ង់បានត្រៀមខ្លួនរួចរាល់សម្រាប់ការបើកទំព័រមួយនៃទំនាក់ទំនងថ្មីរវាងប្រទេសទាំង២។ ចំពោះដំណើរទស្សនកិច្ចលើកនេះ អ៊ីរ៉ង់បានផ្ញើសារទៅកាន់អ្នកវិនិយោគ និងស្ថាប័នសេដ្ឋកិច្ចនានាថា ប្រទេសអ៊ីរ៉ង់ស្វាគមន៍ពួកគេ»។
កាលពីយប់ថ្ងៃព្រហស្បតិ៍ លោក Rouhani បានជួបជាមួយនឹងលោកប្រធានាធិបតីបារាំង Francois Hollande នៅឯវិមានប្រធានាធិបតី Elysee Palace។ មេដឹកនាំនៃប្រទេសទាំង២នេះ បានចុះហត្ថលេខាលើកិច្ចព្រមព្រៀងចំនួន២០ ដោយរួមមានទាំងកិច្ចព្រមព្រៀងលើវិស័យសុខាភិបាល កសិកម្ម និងបរិស្ថានផងដែរ។
អាកាសចរណ៍អ៊ីរ៉ង់បានព្រមព្រៀងទិញយន្តហោះដឹកអ្នកដំណើរចំនួន១១៨គ្រឿងពីក្រុមហ៊ុនផលិតយន្តហោះរបស់អឺរ៉ុប នៅក្នុងកិច្ចព្រមព្រៀងមួយដែលមានទឹកប្រាក់ប្រហែល២៥ពាន់លានដុល្លារ។ ប្រភពព័ត៌មានបារាំងបានចេញផ្សាយថា ជំនួញដែលរួមមានទាំងការលក់យន្តហោះប្រវែងមធ្យម និងប្រវែងវែងផងនោះ នឹងត្រូវបានគេចរចាសម្រេចចុងក្រោយនៅពេលដែលទណ្ឌកម្មអន្តរជាតិប្រឆាំងនឹងប្រទេសអ៊ីរ៉ង់ត្រូវបានគេដកចេញទាំងស្រុង។
កិច្ចព្រមព្រៀងមួយទៀតគឺរវាងក្រុមហ៊ុនផលិតរថយន្តរបស់បារាំង Peugeot Citroen និងក្រុមហ៊ុន Khodro របស់អ៊ីរ៉ង់ ដោយគេរំពឹងថា នឹងមានការផលិតរថយន្តចំនួន២សែនគ្រឿងជារៀងរាល់ចាប់ពីឆ្នាំ២០១៧តទៅ។
ក្រុមហ៊ុនប្រេងឥន្ធនៈ Total របស់បារាំងក៏បានប្រកាសនូវកិច្ចព្រមព្រៀងមួយក្នុងការទិញប្រេងពីប្រទេសអ៊ីរ៉ង់ ដែលនេះជាកិច្ចព្រមព្រៀងដំបូងបង្អស់ជាមួយនឹងក្រុមហ៊ុននៅបស្ចិមប្រទេសបន្ទាប់ពីគេបានដកទណ្ឌកម្មសេដ្ឋកិច្ចចេញពីអ៊ីរ៉ង់៕
