ប្រទេសអ៊ីរ៉ង់ចាំបាច់ធ្វើការផ្លាស់ប្តូរគោលនយោបាយការបរទេសនៅក្នុងតំបន់ ហើយបញ្ឈប់ការដឹកជញ្ជូនអាវុធ ហ្វឹកហាត់ពួកភេរវជន ហើយផ្តល់ហិរញ្ញវត្ថុ និងគាំទ្រពួកអាយ៉ង នេះបើតាមប្រសាសន៍របស់លោករដ្ឋមន្រ្តីការបរទេសរបស់ប្រទេសបារ៉ែន។
នៅក្នុងការបង្ហាញខ្លួនកាលពីថ្ងៃព្រហស្បតិ៍ជាមួយលោករដ្ឋមន្រ្តីការបរទេសសហរដ្ឋអាមេរិក John Kerry ដែលកំពុងបំពេញទស្សនកិច្ចប្រទេសនេះ លោក Khalid bin Ahmed Al Khalifa បានមានប្រសាសន៍ថា អ៊ីរ៉ង់ចាំបាច់លះបង់ការខំប្រឹងប្រែងឲ្យបានច្រើនដូចដែលអ៊ីរ៉ង់ បានធ្វើដើម្បីការពារកិច្ចព្រមព្រៀងនុយក្លេអ៊ែរជាមួយសហរដ្ឋអាមេរិក និងមហាអំណាចពិភពលោក៥ផ្សេងទៀត។
អត្ថាធិប្បាយរបស់លោក ចង្អុលបង្ហាញពីការព្រួយកង្វល់ដែលបន្តមានឡើងក្នុងចំណោមប្រទេសនានានៅតំបន់ឈូងសមុទ្រពែកអំពីអ្វីដែលពួកគេ ចាត់ទុកថា អាកប្បកិរិយាគ្មានលំនឹងរបស់អ៊ីរ៉ង់នៅក្នុងតំបន់ ជាបញ្ហាដែលអស់លោក បានលើកឡើងជាមួយសហរដ្ឋអាមេរិកមុនពេលការអនុវត្តកិច្ចព្រមព្រៀងនុយក្លេអ៊ែរកាលពីខែមករាជាមួយរដ្ឋាភិបាលអ៊ីរ៉ង់។
ចាប់តាំងពីខែកញ្ញាមក នាវាកងទ័ពបានស្ទាក់ចាប់កប៉ាល់ដឹកទំនិញ៤គ្រឿងដែលមានផ្ទុកអាវុធដែលត្រូវបានគេជឿជាក់ថា បានមកពីប្រទេសអ៊ីរ៉ង់។ ប្រទេសទាំងអស់ក្នុងតំបន់ ជឿជាក់ថា អាវុធនោះត្រូវបានគេដឹកជញ្ជូនទៅឲ្យពួកឧទ្ទាមហ៊ូទីនៅក្នុងប្រទេសយេម៉ែន។
ឧបទ្ទវហេតុនៅពេលថ្មីៗបំផុតនេះ បានកើតមានឡើងកាលពីចុងខែមីនា។ នាវាសហរដ្ឋអាមេរិក បានប្រាប់ឲ្យដឹងថា ខ្លួនបានរឹបអូសយកកាំភ្លើងប្រភេទ AK-47 ប្រដាប់បាញ់គ្រាប់រ៉ុកែ្កត ហើយនិងកាំភ្លើងពីកប៉ាល់នៅផ្ទៃទឹកទល់មុខប្រទេសអូម៉ង់។
រដ្ឋាភិបាលអ៊ីរ៉ង់ បានធ្វើការសាកល្បងកាំជ្រួចមីស៊ីលផ្លោង ម្តងហើយម្តងទៀត។ មន្រ្តីសហរដ្ឋអាមេរិក និយាយថា ការសាកល្បងនេះ មិនបានរំលោភកិច្ចព្រមព្រៀងនុយក្លេអ៊ែរទេ ក៏ប៉ុន្តែ ជាការរំលោភសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ៕
