តំបន់ហ្កាហ្សាជាថ្មីម្តងទៀតកំពុងជួបប្រទះការដាច់ប្រព័ន្ធទូរគមនាគមន៍ទាំងស្រុង។
ក្រុមហ៊ុនផ្តល់សេវាកម្មទូរគមនាគមន៍ប៉ាឡេស្ទីននៃតំបន់ហ្កាហ្សា Paltel បានចេញសេចក្តីជូនដំណឹងកាលពីយប់ថ្ងៃអង្គារនៅលើបណ្តាញសង្គម Twitterដែលបានជូនដំណឹងដល់អ្នកស្រុកពីការដាច់សេវាកម្មទូរស័ព្ទនិងអ៊ីនធឺណិតទាំងស្រុង។ ក្រុមហ៊ុននេះបាននិយាយថាការដាច់នេះ«បណ្តាលមកពីការភ្ជាប់អន្តរជាតិដែលត្រូវបានភ្ជាប់ឡើងវិញកាលពីពេលមុនត្រូវបានកាត់ផ្តាច់ម្តងទៀត»។
តំបន់ហ្កាហ្សាបានរងប៉ះពាល់នៃការគ្មានទូរគមនាគមន៍ទាំងស្រុងអស់រយៈពេល២ថ្ងៃដោយចាប់ផ្តើមកាលពីថ្ងៃសុក្រសប្តាហ៍មុនដែលកំពុងធ្វើឱ្យមនុស្ស២,៣លាននាក់ដែលរស់នៅក្នុងទឹកដីដែលត្រូវឡោមព័ទ្ធនោះកាត់ផ្តាច់ចេញពីពិភពលោកនិងការជាប់គាំងនៃការផ្គត់ផ្គង់ជំនួយអន្តរជាតិសំខាន់ៗ។
ការបង្អាក់សេវាកម្មទូរស័ព្ទនិងអ៊ីនធឺណិតនៅពេលថ្មីៗនេះបានកើតមានឡើងប៉ុន្មានម៉ោងបន្ទាប់ពីការវាយប្រហារតាមអាកាសរបស់អ៊ីស្រាអែលលើជំរុំប៉ាឡេស្ទីនមួយកន្លែងនៅក្នុងទីក្រុងហ្កាហ្សាភាគខាងជើងនៃតំបន់Jabaliya ដែលបានធ្វើឱ្យមនុស្សយ៉ាងតិចណាស់ក៏៥០នាក់ដែរស្លាប់ហើយនិង១៥០នាក់ផ្សេងទៀតរងរបួស។ នេះបើតាមអាជ្ញាធរសុខាភិបាលប៉ាឡេស្ទីន។
អ្នកនាំពាក្យយោធាអ៊ីស្រាអែលបានបញ្ជាក់ពីការវាយប្រហារតាមអាកាសដល់បណ្តាញទូរទស្សន៍CNNដោយនិយាយថា៖«មេបញ្ជាការជាន់ខ្ពស់បំផុតម្នាក់របស់ក្រុមហាម៉ាស់»បានស្ថិតនៅក្នុងតំបន់នោះ។ សេចក្តីថ្លែងការណ៍ដោយកងទ័ពអ៊ីស្រាអែលក្រោយមកបានកំណត់អត្តសញ្ញាណបុរសម្នាក់នោះថាឈ្មោះ Ibrahim Biariហើយបាននិយាយទៀតថាជននោះជាមេដឹកនាំម្នាក់នៃ«ការវាយប្រហារភេរវកម្មដ៏ព្រៃផ្សៃ»កាលពីថ្ងៃទី៧ ខែតុលាដោយពួកសកម្មប្រយុទ្ធហាម៉ាស់នៅក្នុងប្រទេសអ៊ីស្រាអែលភាគខាងត្បូង។
ក្រុមជនបរទេសដំបូងគេដែលបានជាប់គាំងនៅហ្កាហ្សាចាប់តាំងពីការចាប់ផ្តើមនៃសង្រ្គាមរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស់ បានចាប់ផ្តើមចាកចេញពីតំបន់ឡោមព័ទ្ធទៅអេហ្ស៊ីបនៅថ្ងៃពុធនេះ។
ការបើកច្រកព្រំដែន Rafah ឡើងវិញ ដើម្បីអនុញ្ញាតឱ្យអ្នកកាន់លិខិតឆ្លងដែនបរទេសចាកចេញ គឺជាផ្នែកមួយនៃកិច្ចព្រមព្រៀងរវាងអ៊ីស្រាអែល អេហ្ស៊ីប និងក្រុមហាម៉ាស់ ដែលត្រូវបានសម្របសម្រួលដោយប្រទេសកាតា។
ជនបរទេសយ៉ាងតិច ៤០០នាក់ នឹងត្រូវបានអនុញ្ញាតឱ្យឆ្លងចូលអេហ្ស៊ីប៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មានAP, Reutersនិង AFP។
