ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រសួង​មហា​ផ្ទៃ​ទទួល​ស្គាល់​«គណ​បក្ស​កម្ពុជា​និយម»​បង្កើត​​ដោយ​មន្រ្តី​បក្ស​ប្រឆាំង​ស្និទ្ធ​នឹង​លោក កឹម សុខា


លោក អូក អ៊ី ស្ថាបនិក​គណបក្ស​​កម្ពុជា​​និយម។ (រូបថត​ដកស្រង់​ពី​ Facebook/គណបក្សកម្ពុជានិយម-Kampucheaniyum Party)

គណ​បក្ស​នយោបាយ​ថ្មី​មួយ​ទៀត គឺ​«គណ​បក្ស​កម្ពុជានិយម» ឬ Kampucheaniyum Party(KP) ត្រូវ​បាន​ក្រសួង​មហាផ្ទៃ​ទទួល​ស្គាល់​កាល​ពី​សប្តាហ៍​មុន ដែល​គណបក្ស​នេះ​នឹង​ដឹកនាំ​ដោយ​អតីតមន្រ្តី​ជាន់​ខ្ពស់​គណ​បក្ស​សង្រ្គោះ​ជាតិ​ម្នាក់ ដែល​ស្និទ្ធ​នឹង​លោក កឹម សុខា មេដឹកនាំ​គណបក្ស​សង្គ្រោះ​ជាតិ។ នេះ​បើ​តាម​សេចក្តី​សម្រេច​របស់​ក្រសួង​មហា​ផ្ទៃ​ដែល​វីអូអេ​ទទួល​បាន និង​តំណាង​គណបក្ស​ថ្មី​នេះ។

សេចក្តី​សម្រេច​របស់​ក្រសួង​មហាផ្ទៃ ចុះ​ថ្ងៃ​ទី​២៣ ខែ​កក្កដា ឲ្យ​ដឹង​ថា​ គណ​បក្ស​មួយ​នេះ​ត្រូវ​បាន​បង្កើត​ឡើង​ដោយ​ស្ថាបនិក មាន​ឈ្មោះ អូក អ៊ី ដែល​គេ​ស្គាល់​ថា​ជា​យុវជន​គណ​បក្ស​ប្រឆាំង​មួយ​រូប។

លោក យី សីហា តំណាង​យុវជន​ដែល​បាន​ចូល​រួម​បង្កើត​គណបក្ស​នេះ បាន​ប្រាប់វី​អូអេ​នៅ​ថ្ងៃ​ច​ន្ទ​នេះ​ថាគណបក្ស​នេះ​មិន​ទាន់​បាន​រៀបចំ​រចនា​សម្ព័ន្ធ​របស់​គណបក្ស​ជា​ផ្លូវ​ការ​នៅ​ឡើយ​ទេ ប៉ុន្តែ​លោក​បញ្ជាក់​ថា​លោក យ៉ែម បុញ្ញឫទ្ធិ អតីតតំណាង​រាស្រ្ត​គណបក្ស​សង្រ្គោះ​ជាតិ​នឹង​ធ្វើ​ជា​ប្រធាន​គណបក្ស​មួយ​នេះ។

អតីត​តំណាង​រាស្រ្ត​គណបក្ស​សង្រ្គោះ​ជាតិ និង​ជា​មន្រ្តី​ម្នាក់​ដែល​ស្និទ្ធ​នឹង​លោក កឹម សុខា គឺ​លោក យ៉ែម បុញ្ញឫទ្ធិ បាន​ទទួល​សិទ្ធិ​ធ្វើ​នយោបាយ​កាល​ពី​ថ្ងៃ​ទី​១៧ ខែ​មេសា តាម​ការ​ស្នើ​សុំ​របស់​លោក។

វីអូអេ មិន​ទាន់​អាច​ទាក់ទង​លោក យ៉ែម បុញ្ញឫទ្ធិ ដើម្បី​បញ្ជាក់​អំពី​រឿង​នេះ​បាន​នៅ​ឡើយ​ទេ​ត្រឹម​ល្ងាច​ថ្ងៃ​ច័ន្ទ​នេះ។

នៅ​ពេល​សួរ​ថា​តើ​គណបក្ស​មួយ​នេះ​មាន​ទំនាក់​ទំនង​ជាមួយ លោក កឹម សុខា ឬ​យ៉ាង​ណា លោក យី សីហា បញ្ជាក់​ថា​លោកមិន​មាន​ព័ត៌មាននេះ​ទេ ហើយ​ក៏​មិន​ដឹង​ថា​តើ​លោក កឹម សុខា ដែល​កំពុង​ជាប់​បណ្តឹង​នៅ​តុលាការ​ក្នុង​សំណុំ​រឿង​ក្បត់​ជាតិ នឹង​មក​ដឹក​នាំ​គណបក្ស​មួយ​នេះ ឬ​យ៉ាងណា នៅ​ពេល​ខាង​មុខ។

លោក​បន្ថែម​ថា​លោក មុត ចន្ថា ដែល​ជា​ជំនួយ​ការ​របស់​លោក កឹម សុខា និង​ទទួល​បាន​សិទ្ធិ​ធ្វើ​នយោ​បាយ​កាល​ពី​ខែ​មេសា​ដែរ មិន​បាន​ចូលរួម​ជាមួយ​គណ​បក្ស​កម្ពុជា​និយម​នេះ​ទេ បើ​ទោះ​លោកធ្លាប់​ចូលរួម​កិច្ច​ប្រជុំ​របស់​គណបក្ស​ កាល​ពី​កន្លង​ទៅ​ក៏​ដោយ។

បើ​តាម​លោក យី សីហា មាន​ថ្នាក់​ដឹកនាំ​សំខាន់ៗ​របស់​គណបក្ស​សង្រ្គោះ​ជាតិ​មួយ​ចំនួន​ទៀត នឹង​ចូលរួម​ជាមួយ​គណ​បក្ស ប៉ុន្តែ​លោក​មិន​ទាន់​អាច​បញ្ជាក់​បាន​ទេ​នៅ​ពេល​នេះ។

ឆ្លើយតប​នឹង​សំណួរ​របស់​វីអូអេ​នៅ​ថ្ងៃ​ច័ន្ទ​នេះ លោក​ មុត ចន្ថា អត្ថាធិប្បាយ​ថា៖«គណបក្ស​តូចៗ​នេះ អាច​ឈ្នះ​សម្រាប់​ខ្លួន​ឯង​តិចតួច ប៉ុន្តែ​មិន​អាច​ឈ្នះ​ដើម្បី​ជាតិ​ទាំង​មូល​ឡើយ»។

បើ​តាម​ហ្វេស​ប៊ុក​របស់​គណបក្ស «គណបក្ស​កម្ពុជា​និយម» សហការ​គ្នា រួម​គ្នា​ថែរក្សា​ ការពារ​អត្ត​សញ្ញាណ​ជាតិ និង​រៀប​ចំ​សង្គម​ស៊ីវិល័យ​ជឿន​លឿន​ថ្លៃថ្នូរ គោរព​សិទ្ធិ​មនុស្ស តាម​គោល​ការណ៍​នីតិរដ្ឋ ប្រជា​ធិប​តេយ្យ សេរី ពហុ​បក្ស ដោយ​ប្រឆាំង​នឹង​អំណាច​ប្រមូល​ផ្ដុំ​ផ្ដាច់​ការ៕

XS
SM
MD
LG