ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មន្ត្រី​ឥណ្ឌូណេស៊ី​រក​ឃើញ​ប្រអប់​ខ្មៅ​របស់​យន្តហោះ​ដែល​ធ្លាក់​កាល​ពីថ្ងៃ​សៅរ៍


ក្រុម​អ្នក​មុជ​ទឹក​ឥណ្ឌូណេស៊ី​ ​រក​ឃើញ​ឧបករណ៍​កំណត់ត្រា​ទិន្នន័យ​ហោះ​ហើរ ឬ​ប្រអប់​ខ្មៅ​របស់​យន្តហោះ​ក្រុមហ៊ុន Sriwijaya Air ដែល​បាន​ធ្លាក់​ចូល​ក្នុង​សមុទ្រ​ជ្វា កាល​ពី​ថ្ងៃ​សៅរ៍ ទី៩ ខែមករា ឆ្នាំ២០២១។

រដ្ឋមន្ត្រី​ក្រសួងទទួល​បន្ទុក​ការ​ធ្វើ​ដំណើរ​របស់​ឥណ្ឌូនេស៊ី​ បាន​ប្រកាស​កាល​ពី​ថ្ងៃ​អង្គារ​ថា​ ក្រុម​អ្នក​មុជ​ទឹក​រក​ឃើញ​ឧបករណ៍​កំណត់ត្រា​ទិន្នន័យ​ហោះ​ហើរ ឬ​ប្រអប់​ខ្មៅ​របស់​យន្តហោះ​ក្រុមហ៊ុន Sriwijaya Air ដែល​បាន​ធ្លាក់​ចូល​ក្នុង​សមុទ្រ​ជ្វា កាល​ពី​ថ្ងៃ​សៅរ៍ ដោយ​មាន​មនុស្ស​លើ​យន្តហោះចំនួន៦២នាក់។​

ឧបករណ៍​កំណត់ត្រា​ទិន្នន័យ​ហោះ​ហើរ ​នោះ​ត្រូវ​បាន​បញ្ចូន​ទៅកាន់​កំពង់ផែ​មួយ​ក្នុង​រដ្ឋធានី​ហ្សាការតា (Jakarta) ដើម្បី​បង្ហាញដល់​ប្រព័ន្ធ​ផ្សព្វផ្សាយ។ នៅ​ក្នុង​សន្និសីទ​ព័ត៌មាន​ ប្រធាន​គណ:កម្មាធិការ​សុវត្ថិភាព​ដឹក​ជញ្ជូន​ លោក Soerjanto Tjahjono បាន​និយាយ​ថា ពួក​គេ​បាន​ឮ​សំឡេង «ពីង»​ ពីរ​ដង នៅ​ពេល​ពួក​គេ​រកឃើញ​ឧបករណ៍​កំណត់ត្រា​ទិន្នន័យ​ហោះ​ហើរ ដែល​នេះ​បង្ហាញថា​ ឧបករណ៍​ថត​សំឡេង​នៅ​ក្នុង​កាប៊ីន​យន្តហោះ​នៅក្បែរ​នោះ ហើយ​ពួកគេ​មាន​ទំនុក​ចិត្ត​ថា ​នឹង​រក​ឧបករណ៍​នោះ​ឃើញក្នុង​ពេល​ឆាប់ៗ។​

ឧបករណ៍​ទំាង​ពីរ​ត្រូវ​បាន​គេ​រំពឹង​ថា ​នឹង​ជួយ​ដល់​អ្នក​ស៊ើប​អង្កេត​កំណត់​ពី​មូល​ហេតុ​ដែល​ធ្វើ​ឲ្យ​យន្តហោះ​ស៊េរី Boeing 737-500 ធ្លាក់​ចូល​ក្នុង​សមុទ្រ​ជ្វា​ រយៈពេល​បួន​នាទី​បន្ទាប់​ពី​ហោះ​ចេញ​ពីអាកាសយានដ្ឋាន​ចម្បង​របស់​ក្រុង​ហ្សាការតា។

យន្តហោះ​ឆ្ពោះ​ទៅ​កាន់​ទីក្រុង​ Pontianak នៅ​លើ​កោះ Borneo ចម្ងាយ​ប្រហែល ៧៤០​ គីឡូម៉ែត្រ​ពីរដ្ឋធានី​ហ្សាការតា មុនពេល​បាត់​ខ្លួន​ពី​អេក្រង់​រ៉ាដា។

លោក Tjahjono បាន​ប្រាប់​អ្នកសារព័ត៌មាន​ថា ការ​ស៊ើបអង្កេត​ដំបូង​បង្ហាញ​ថា យន្តហោះ​មិន​បាន​ផ្ទុះ​ទេ​ និង​មាន​ទ្រង់ទ្រាយ​ល្អពេល​វាបុកនឹង​ផ្ទៃទឹក។ ពួក​គេ​កំណត់​ថា ម៉ាស៊ីន​មួយ​ក្នុង​ចំណោម​ម៉ាស៊ីន​ទាំង​អស់​នៅដំណើរការ​ នៅ​ពេល​យន្តហោះ​ប៉ះទង្គិច។​

សាកសព​ជា​ច្រើន​ត្រូវ​បាន​គេរក​ឃើញ និង​ច្រក​ក្នុង​ថង់​ច្រក​សាកសព បញ្ជូន​ឲ្យ​ប៉ូលិស​ជំនាញ​រក​អត្តសញ្ញាណ។​ អាជ្ញាធរ​បាន​ឲ្យ​ដឹង​កាល​ពី​ថ្ងៃ​ចន្ទ​ថា ពួក​គេ​បាន​កំណត់​អត្តសញ្ញាណ​សព​ជន​រង​គ្រោះ​ដំបូង ​គឺលោក Okky Bisma ជា​អ្នក​បម្រើ​តាម​យន្តហោះ​អាយុ​២៩​ឆ្នាំ៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG