សហគមន៍ជនជាតិដើមភាគតិចកួយក្នុងខេត្តព្រះវិហារ បានអះអាងថាពួកគេរកឃើញបទល្មើសព្រៃឈើកើនឡើងក្នុងតំបន់អភិរក្សដែនជម្រកសត្វព្រៃព្រះរការ ក្នុងស្រុកត្បែងមានជ័យ ដែលនាំឱ្យមានការព្រួយបារម្ភយ៉ាងខ្លាំងពីការកាប់បំផ្លាញព្រៃឈើដែលចេះកើនឡើង។ នេះបើតាមសេចក្តីប្រកាសព័ត៌មានរបស់សហគមន៍ចេញផ្សាយនៅថ្ងៃអង្គារនេះ។
សេចក្តីប្រកាសព័ត៌មានរបស់សហគមន៍ឱ្យដឹងថាចាប់ពីថ្ងៃទី១៥ ដល់១៧ ខែកក្កដា ឆ្នាំ២០២២ សហគមន៍បានចុះប្រមូលព័ត៌មាន ក៏ដូចជាធ្វើបច្ចុប្បន្នភាពពីស្ថានភាពដែនជម្រកសត្វព្រៃព្រះរការ ហើយក៏ប្រទះឃើញបទល្មើសព្រៃឈើកើតមានជាច្រើន ដោយរកឃើញប្រភេទឈើរងការកាប់បំផ្លាញមានដូចជាឈើទាល គគីរ កកោះ ពពេល និងផ្តៀក។ ពួកគេរកឃើញបទល្មើសចំនួន២៦០ករណី និងឈើចំនួន៣៦៧ក្តារបន្ទះ។
សហគមន៍បានលើកឡើងនៅក្នុងសេចក្តីប្រកាសព័ត៌មានថា៖ «ការកើនឡើងនូវបទល្មើសព្រៃឈើជារៀងរាល់ថ្ងៃនេះឆ្លុះបញ្ចាំងឱ្យឃើញពីកង្វះសមត្ថភាព និងឆន្ទៈក្នុងការការពារព្រៃឈើ ធនធានធម្មជាតិ ពីសំណាក់ក្រសួងបរិស្ថាន និងអាជ្ញាធរពាក់ព័ន្ធ ដែលវាបានបង្កផលប៉ះពាល់យ៉ាងធ្ងន់ធ្ងរមកលើជីវភាពរស់នៅរបស់ប្រជាពលរដ្ឋប្រកបរបរដងជ័រច្បោះ បរិស្ថាន និងទំនៀមទម្លាប់របស់សហគមន៍ជនជាតិដើមភាគតិចកួយ»។
លោក ថាប់ សុខឃីម សមាជិករបស់សហគមន៍ ប្រាប់វីអូអេនៅថ្ងៃអង្គារថាបទល្មើសព្រៃឈើចេះតែបន្តកើតឡើងជារៀងរាល់ថ្ងៃ ខណៈអ្នកប្រព្រឹត្តបទល្មើសក៏មានចំនួនច្រើនគួរឱ្យកត់សម្គាល់។ លោកបន្តថាលោកមិនដឹងថាក្រុមហ៊ុនណាជាអ្នកបញ្ជាឱ្យកាប់នោះទេ ខណៈឈើត្រូវបានដឹកចេញទាំងយប់ទាំងថ្ងៃ។
បុរសវ័យ៣៥ឆ្នាំរូបនេះបារម្ភអំពីផលប៉ះពាល់លើជីវភាពរបស់សហគមន៍ជនជាតិដើមភាគតិចដែលអាស្រ័យផលលើព្រៃឈើ។ សហគមន៍ចាត់ទុកកន្លែងកាប់ឈើនោះជាមណ្ឌលវប្បធម៌ និងទីផ្គត់ផ្គង់ជីវភាពជាអចិន្ត្រៃយ៍របស់ពួកគេ។
លោក សុខឃីម បង្ហាញការសោកស្តាយ និងបារម្ភពីការបាត់បង់ព្រៃឈើសម្រាប់អ្នកជំនាន់ក្រោយ។
លោកថ្លែងថា៖«ខ្ញុំព្រួយបារម្ភថាកាលណាចេះតែបន្តកាប់ជារៀងរាល់ថ្ងៃទៅ យូរៗទៅអនាគតកូនចៅជំនាន់ក្រោយទៅវាអត់មានព្រៃឈើសម្រាប់អាស្រ័យផល»។
ប្រធានមន្ទីរបរិស្ថានខេត្តព្រះវិហារ លោក សុង ច័ន្ទសុជាតិ មិនធ្វើការអត្ថាធិប្បាយ នៅពេលវីអូអេទាក់ទងទៅតាមទូរស័ព្ទនាថ្ងៃអង្គារនេះ។
បើតាមអនុក្រឹត្យរបស់រដ្ឋាភិបាលចុះថ្ងៃទី៩ ខែឧសភា ឆ្នាំ២០១៦ ដែនជម្រកសត្វព្រៃព្រះរការ មានទំហំជាង៩ម៉ឺនហិកតា ត្រូវបានទទួលស្គាល់ជាតំបន់ដែលត្រូវគ្រប់គ្រង ការពារ និងអភិរក្សជីវៈចម្រុះ និងធនធានធម្មជាតិក្នុងតំបន់។
ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា(CYN) លោក ហេង គឹមហុង កត់សម្គាល់ថាព្រៃឈើនៅតែបន្តបាត់បង់នៅក្នុងតំបន់ការពារដោយអនុក្រឹត្យ ជាពិសេសក្នុងរយៈ២ទសវត្សរ៍ចុងក្រោយនេះព្រៃឈើត្រូវបានបំផ្លាញអស់ជាង១០% ដែលនេះបង្កការព្រួយបារម្ភយ៉ាងខ្លាំង ហើយក៏ជាសញ្ញាបរាជ័យនៃការប្តេជ្ញាចិត្តរបស់រដ្ឋាភិបាលផងដែរ។
លោកថ្លែងថា៖ «ដែលបង្ហាញឱ្យឃើញពីនិន្នាការនៃការបន្តធ្លាក់ចុះយ៉ាងព្រួយបារម្ភ ដែលអាចធ្វើឱ្យកម្ពុជាបរាជ័យម្តងទៀតនូវក្នុងការប្តេជ្ញាចិត្តរបស់ខ្លួនក្នុងការការពារធនធានធម្មជាតិ»។
មន្ត្រីរូបនេះស្នើឱ្យមានការសហការគ្នាគ្រប់ជ្រុងជ្រោយ ហើយរដ្ឋាភិបាលគួរតែពិនិត្យមើលនូវវិធានការការពារព្រៃឈើនិងសមត្ថភាពមន្ត្រីឧទ្យានុរក្ស ជាពិសេសអំពើពុករលួយដែលកើតមានឡើង។
នៅក្នុងសន្និសីទសារព័ត៌មានមួយនាថ្ងៃអង្គារនេះ ដែលរៀបចំដោយអង្គភាពអ្នកនាំពាក្យរបស់រដ្ឋាភិបាល លោក កែវ អូម៉ាលីស្ស ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលព្រៃឈើ បានថ្លែងថារដ្ឋាភិបាលបាន«ខិតខំប្រឹងប្រែងយ៉ាងខ្លាំង» ដើម្បីបង្ការ និងទប់ស្កាត់បទល្មើសព្រៃឈើ។ ទោះជាយ៉ាងណា លោកថាបទល្មើសតូចៗនៅតែបន្តកើតមាន។
នៅក្នុងសេចក្តីប្រកាសព័ត៌មាន សហគមន៍ជនជាតិដើមភាគតិចកួយក្នុងភូមិប្រមេរុ ក៏បានស្នើឱ្យរដ្ឋាភិបាលបើកទូលាយចំពោះការចូលរួមរបស់ប្រជាពលរដ្ឋនៅតាមមូលដ្ឋាន និងអង្គការសង្គមស៊ីវិល នៅក្នុងការការពារធនធានធម្មជាតិ ហើយធានាថាមិនមានការរារាំងពីអាជ្ញាធរឡើយ។ ពួកគេអំពាវនាវឱ្យរដ្ឋាភិបាលពង្រឹងការអនុវត្តច្បាប់ឱ្យបានតឹងរ៉ឹង និងមានយន្តការតាមដាន និងពិនិត្យមើលការអនុវត្តច្បាប់របស់មន្ត្រីមូលដ្ឋាន៕
