ប្រទេសឥណ្ឌាបានផ្ដល់នាវាចម្បាំងច្រមុជទឹកមួយគ្រឿងដល់ប្រទេសមីយ៉ាន់ម៉ា ដែលជាផ្នែកមួយនៃការពង្រីកឥទ្ធិពលផ្នែកយោធារបស់ខ្លួនទៅកាន់ប្រទេសនេះ ដែលជាប្រទេសជិតខាងនៅប៉ែកខាងកើត។ ក្រុមអ្នកវិភាគយុទ្ធសាស្ត្រនិយាយថា នេះគឺជាកិច្ចខិតខំប្រឹងប្រែងរបស់ឥណ្ឌាក្នុងការទប់ទល់នឹងកំណើនឥទ្ធិពលរបស់ចិននៅក្នុងតំបន់អាស៊ីអាគ្នេយ៍។
នាវាចម្បាំងនោះត្រូវបានដាក់ឈ្មោះថា UMS Minye Theinkhathu។ នាវានោះត្រូវបានដាក់បង្ហាញនៅក្នុងសមយុទ្ធយោធាជើងទឹកមួយ ដែលធ្វើឡើងដោយទាហានជើងទឹកមីយ៉ាន់ម៉ាកាលពីពាក់កណ្ដាលខែតុលា។ នាវានោះអាចប្រតិបត្តិការបានក្នុងទឹករហូតដល់ជម្រៅ ៣០០ ម៉ែត្រ។
នាវាចម្បាំងនេះ ដែលជានាវាដំបូងបង្អស់ដែលឥណ្ឌាផ្ដល់ដល់ប្រទេសដទៃ គឺជាផ្នែកមួយនៃកិច្ចខិតខំប្រឹងប្រែងរបស់ខ្លួនក្នុងការបង្កើនទំនាក់ទំនងផ្នែកយោធាជាមួយនឹងប្រទេសមីយ៉ាន់ម៉ា។ ឥណ្ឌាព្យាយាមទប់ទល់នឹងវត្តមានកាន់តែខ្លាំងក្លារបស់ចិននៅក្នុងប្រទេសមីយ៉ាន់ម៉ា ដែលជាផ្លូវឆ្ពោះទៅកាន់ឈូងសមុទ្រ Bay of Bengal ដែលជាផ្លូវទឹកយុទ្ធសាស្ត្រមួយនៅប៉ែកឦសាននៃមហាសមុទ្រឥណ្ឌា។
ឥណ្ឌានិងមីយ៉ាន់ម៉ាមានព្រំដែនផ្លូវទឹកជាប់គ្នាប្រវែង ៧២៥ គីឡូម៉ែត្រនៅក្នុងឈូងសមុទ្រ Bay of Bengal។
ការសម្រេចរបស់ឥណ្ឌាក្នុងការផ្ដល់នាវាចម្បាំងច្រមុជទឹកមួយគ្រឿងដល់មីយ៉ាន់ម៉ានេះ ត្រូវបានធ្វើឡើងក្នុងរយៈពេល ៤ ឆ្នាំក្រោយមក បន្ទាប់ពីប្រទេសបង់ក្លាដែស ដែលមានព្រំប្រទល់ជាប់ទាំងឥណ្ឌានិងមីយ៉ាន់ម៉ា ទទួលបាននាវាចម្បាំងច្រមុជទឹកចំនួន ២ គ្រឿងពីប្រទេសចិន។
រដ្ឋាភិបាលក្រុងប៉េកាំងក៏កំពុងជួយដល់ប្រទេសបង់ក្លាដែសក្នុងការសាងសង់មូលដ្ឋាននាវាចម្បាំងច្រមុជទឹក ផ្ដល់ថវិកាសម្រាប់សាងសង់កំពង់ផែ Chittagong របស់ខ្លួន និងកំពុងសាងសង់កំពង់ផែទឹកជ្រៅមួយនៅខេត្ត Kyaukpyu ក្នុងប្រទេសមីយ៉ាន់ម៉ានៅក្នុងឈូងសមុទ្រ Bay of Bengal ផងដែរ។
ក្រុមអ្នកវិភាគនិយាយថា សម្រាប់រដ្ឋាភិបាលក្រុងញូវដេលី គម្រោងទាំងនេះគឺជាកិច្ចខិតខំប្រឹងប្រែងរបស់ចិននៅក្នុងការពង្រីកវត្តមានទាហានជើងទឹករបស់ខ្លួនក្នុងបណ្ដាប្រទេសនៅជុំវិញប្រទេសឥណ្ឌា ដែលធ្វើឲ្យឥណ្ឌាត្រូវពង្រឹងភាពជាដៃគូរបស់ខ្លួននៅក្នុងតំបន់៕
