ភ្ជាប់​ទៅ​គេហទំព័រ​ទាក់ទង

ឥណ្ឌា​ប្រកាស​អំពី​គម្រោង​បង្កើត​អង្គការ​សុវត្ថិភាព​នុយក្លេអ៊ែរ​ថ្មី


ក្រុម​សកម្មជន​ប្រឆាំង​នឹង​នុយក្លេអ៊ែរ​បាន​លើក​ពាក្យ​ស្លោក​តវ៉ា ក្នុង​បាតុកម្ម​មួយ​កាល​ពី​ថ្ងៃ​ទី​​២១​ខែមេសា​​ឆ្នាំ​២០១១​ នៅ​ក្នុង​ទី​ក្រុង​ញូដេលី។

លោក​នាយក​រដ្ឋមន្ត្រី​របស់​ប្រទេស​ឥណ្ឌា ​មាន​ប្រសាសន៍​ថា ​នៅ​ពេល​ឆាប់ៗ​នេះ លោក​នឹង​ដាក់​ជូន​រដ្ឋសភា​នូវ​ច្បាប់​មួយ​ស្តីពី​ការបង្កើត​អង្គការ​ថ្មី​មួយ ​ដើម្បី​ត្រួត​ពិនិត្យ​សុវត្ថិភាព​នុយក្លេអ៊ែរ​នៅ​ឥណ្ឌា។ ច្បាប់​នេះគឺ​ជា​វិធានការ​មួយ​ក្នុង​ចំណោម​វិធានការ​មួយ​ចំនួន ​ដែល​ធ្វើឡើង​ដោយ​រដ្ឋាភិបាលសំដៅ​ធ្វើ​ឲ្យ​ការរំជួលចិត្តរបស់​សាធារណ​ជន​ស្ងប់​ស្ងាត់ ​ទាក់ទង​ទៅ​នឹងទីតាំង​រោងចក្រ​នុយក្លេអ៊ែរ​នៅ​តាម​ឆ្នេរ​សមុទ្រដែល​ត្រូវ​បាន​គ្រោង​ធ្វើ ​ដែល​មនុស្ស​មួយ​ចំនួន ​ព្រួយ​បារម្ភ​ថា​អាច​នាំ​ឲ្យ​កើត​មាន​សា​រជា​ថ្មីនូវ​គ្រោះ​មហន្តរាយ​នុយក្លេអ៊ែរ​ដូច​នៅ​ប្រទេស​ជប៉ុន។

រដ្ឋាភិបាល​ឥណ្ឌា ​បាន​ឲ្យ​ដឹង​ថា​ ទីភ្នាក់ងារ​ថ្មី​ដែល​បាន​ស្នើ​ឡើង ​ដើម្បី​ត្រួត​ពិនិត្យ​សុវត្ថិភាព​នុយក្លេអ៊ែរ ​នឹង​ទទួល​ការងារ​បន្ត​ពី​ក្រុមប្រឹក្សា​នីយ័តកម្ម​ផ្នែក​ឋាមពល​អាតូមិច (Atomic Energy Regulatory Board) របស់​ប្រទេស​នេះ ​ប៉ុន្តែ​ទីភ្នាក់ងារ​នេះ ​នឹង​នៅ​ជា​ស្វយ័ត​និង​ឯករាជ្យ។

លោក វី ណារ៉ាយ៉ាណាសាមី (V. Narayanasamy) រដ្ឋមន្ត្រី​ នៃ​ខុទ្ទកាល័យ​នាយក​រដ្ឋមន្ត្រី​ឥណ្ឌា ​បាន​ប្រកាស​ឲ្យ​ដឹង​ពី​សេចក្តី​សម្រេច​ចិត្ត​នេះ ​កាលពី​ថ្ងៃ​អង្គារ។

«ចេតនា​របស់​រដ្ឋាភិបាល ​គឺ​ត្រូវ​ធានា​ឲ្យ​ប្រាកដ​ថា​ថាមពល​អគ្គិសនី​ប្រើប្រាស់នុយក្លេអ៊ែរ​ ត្រូវ​តែ​មាន​សុវត្ថិភាព ​សន្តិសុខ ​និង​សន្សំ​សំចៃ។ ក្រៅពី​កិច្ចការ​នេះ ​ការប្តេជ្ញា​ចិត្តចំពោះ​កម្មវិធី​ថាមពល​នុយក្លេអ៊ែរ​ក្នុង​ស្រុក​ចែក​ជា​បី​ដំណាក់​កាលរបស់​ឥណ្ឌា ​ត្រូវ​បាន​បញ្ជាក់​ឲ្យដឹងសារ​ជា​ថ្មី»។

សេចក្តី​ប្រកាស​នេះ ​ត្រូវ​បាន​ធ្វើ​ឡើង ​បន្ទាប់​ពី​ការជួបប្រជុំ​រវាង​លោក ម៉ានមហាន ស៊ីង (Manmohan Singh) នាយក​រដ្ឋមន្ត្រី​ឥណ្ឌា ​និង​ លោក ចៃរ៉ាម រ៉ាម៉េស (Jairam Ramesh) រដ្ឋមន្ត្រី​បរិស្ថាន ​ព្រម​ទាំង​លោក ព្រីវីរ៉ាជ ចាវ៉ាន (Prithviraj Chavan) ប្រមុខ​រដ្ឋមន្ត្រី​នៃ​រដ្ឋ​ម៉ាហារ៉ាសត្រា (Maharashtra) ​របស់​ឥណ្ឌា។ មនុស្ស​ម្នាក់ ​ត្រូវ​បាន​សម្លាប់ ​នៅ​ក្នុង​រដ្ឋម៉ាហារ៉ាសត្រា ​កាល​ពី​សប្តាហ៍​មុន នៅ​ពេលដែល​ការតវ៉ា​របស់​ពួកគេ ​បាន​ក្លាយ​ទៅ​ជា​ហិង្សា។ ពួកគេ​តវ៉ា​ប្រឆាំង​ទៅ​លើរោងចក្រនុយក្លេអ៊ែរនៅ​តាមឆ្នេរ​សមុទ្រ ​ដែល​បាន​គ្រោង​រួច​ហើយ ​នៅ​ក្នុង​តំបន់​ចៃតាពួរ (Jaitapur) ។

កិច្ចព្រម​ព្រៀង​ដើម្បី​ស្ថាបនា​រោងចក្រ​នុយក្លេអ៊ែរ ​នៅ​តំបន់​ចៃតាពួរ ​ត្រូវ​បាន​ចុះ​ហត្ថលេខា​ជាមួយ​ក្រុមហ៊ុន​បារាំង​មួយ ​ក្នុង​អំឡុងដំណើរ​ទស្សនកិច្ច​ របស់​លោក​ប្រធានាធិបតីបារាំង ​នីកូឡា សាកូហ្សី (Nicholas Sarkozy) ទៅ​កាន់​ប្រទេស​ឥណ្ឌា ​កាលពី​ខែ​ធ្នូ។ កិច្ចព្រមព្រៀង​ គ្រោង​នឹង​បង្កើតម៉ាស៊ីនភ្លើង​ដើរ​ដោយ​ថាមពល​នុយក្លេអ៊ែរ​ សរុបទាំង​អស់ចំនួន​៦។ ក្រុម​មន្ត្រីឥណ្ឌា ថ្លែង​ថា ថាមពល​នុយក្លេអ៊ែរ ​ជា​គ្រឿងផ្សំ​ដ៏​ចាំបាច់ ​និង​មាន​សារៈសំខាន់ ​ក្នុង​ការផ្តល់​ការរីក​លូត​លាស់​ផ្នែក​សេដ្ឋកិច្ច និង​សេវាកម្ម​ជា​មូលដ្ឋាន ​សម្រាប់​ពលរដ្ឋ​រាប់​សិប​លាន​នាក់។

តែ​ទោះ​យ៉ាង​ណា គ្រោះ​មហន្តរាយ​នុយក្លេអ៊ែរ​កាលពី​ពេល​ថ្មីៗ​នេះ ​នៅ​ក្នុង​ប្រទេស​ជប៉ុន ​បាន​ជំរុញ​ឲ្យ​មាន​ការជំទាស់​ទៅ​នឹង​គម្រោង​ចៃតាពួរ​នេះ​ ដោយ​ផ្អែក​លើ​មូលដ្ឋាន​ថា ​ទីតាំង​នោះ ​ក៏​ជា​តំបន់ងាយ​ទទួលរង​នូវ​ការរញ្ជួយ​ដី ​និង​រលក​ស៊ូណាមី ​ដូច​ទៅ​នឹង​រោងចក្រ​នុយក្លេអ៊ែរហ្វូគូស៊ីម៉ា ​របស់​ជប៉ុន​ដែរ។

លោក ចៃរ៉ាម រ៉ាម៉េស រដ្ឋមន្ត្រីបរិស្ថាន ​បាន​ឲ្យ​ដឹង​ថា ​រដ្ឋាភិបាល ​កំពុង​រៀបចំការរចនា​ទ្រង់ទ្រាយសំខាន់ៗ ​ដែល​មាន​ភាពប្លែក​គ្នា​ សម្រាប់​ទីតាំងរោង​ចក្រចៃតាពួរ។

«សព្វថ្ងៃ​នេះ ​សេចក្តី​សម្រេច​ចិត្ត​ដ៏​សំខាន់​មួយ ​ត្រូវ​បាន​ធ្វើឡើង​នៅ​ក្នុង​តំបន់​ចៃតាពួរ។ ម៉ាស៊ីន​ភ្លើង​ដើរ​ដោយ​ថាមពល​នុយក្លេអ៊ែរ​នីមួយៗ ​នឹងមាន​ប្រព័ន្ធ​សុវត្ថិភាព​ដាច់​ដោយ​ឡែក​ពី​គ្នា ​ដែលជាប្រព័ន្ធ​ប្រតិបត្តិការ ​និង​ថែរក្សា​ឯករាជ្យ​ពីគ្នា។ នេះ​ជា​ការបោះ​ជំហាន​ទៅ​មុខ​យ៉ាង​សំខាន់»។

សេចក្តី​រាយការណ៍​របស់​សារព័ត៌មាន ​នៅ​ទីនេះ ​ក្នុង​ប្រទេស​ឥណ្ឌា ​បាន​ដកស្រង់​សម្តី​របស់​លោក រ៉ាម៉េស កាលពី​ថ្ងៃ​សៅរ៍ ​ដោយ​និយាយ​ថា វា​ប្រហែល​ជា​មាន​ភាពចាំបាច់​ក្នុង​ការ«ផ្អាក» ​គម្រោងចៃតាពួរ ​ដោយសារ​ហេតុផល​សុវត្ថិភាព។ លោក ​បាន​និយាយ​សម្រាលដល់​ការអត្ថាធិប្បាយ​បែប​នោះ ​កាលពី​ថ្ងៃ​អង្គារ។ លោក ឆាវ៉ាន ​ប្រមុខ​រដ្ឋមន្ត្រី ​បាន​ផ្តល់ការធានា​អះអាង​ថា ​គ្មាន​អ្វី​នឹង​ត្រូវ​បាន​កសាង​ឡើង​ដោយ​ប្រញ៉ាប់​ប្រញ៉ាល់​ទេ។

ទីតាំង​រោងចក្រ​ចៃតាពួរ ​ទំនង​ជា​នឹង​ប្រឈមមុខ​ការជំទាស់​បន្ត​ទៀត ​ដែល​មិន​គ្រាន់តែ​ឈរ​លើ​មូលដ្ឋានសុវត្ថិភាព​ប៉ុណ្ណោះ​ទេ ​ប៉ុន្តែ​ថែម​ទាំងពីសំណាក់អ្នកមានលំនៅក្នុង​មូលដ្ឋាន ​ដែលថ្លែង​ថា រោងចក្រនេះ ​នឹង​ដក​ហូត​ផ្ទះ​សម្បែង ​និង​ការចិញ្ចឹម​ជីវិត​ ពីពួកគេ៕

ប្រែសម្រួល​ដោយ លី​ សុខឃាង

XS
SM
MD
LG