ប្រទេសឥណ្ឌានិងចិនបានឯកភាពគ្នាថា នឹងមិនបញ្ជូនកងទ័ពបន្ថែមទៅកាន់តំបន់ព្រំដែននៅជួរភ្នំហិមាល័យ (Himalayas) ដែលមានជម្លោះដែលនៅទីនោះកងទ័ពទាំងសងខាង បានប្រយុទ្ធគ្នាដោយមិនប្រើកាំភ្លើងរហូតធ្វើឲ្យមានស្លាប់ទាហានទាំងសងខាង កាលពីខែមិថុនាកន្លងទៅ។
នៅក្នុងសេចក្តីថ្លែងការណ៍រួមមួយ ដែលចេញផ្សាយនៅថ្ងៃអង្គារបានឲ្យដឹងថា កិច្ចព្រមព្រៀងមួយត្រូវបានធ្វើឡើង បន្ទាប់ពីមានការជួបពិភាក្សាគ្នារវាងមន្ត្រីយោធាជាន់ខ្ពស់នៃប្រទេសទាំងពីរ កាលពីថ្ងៃចន្ទ។ សេចក្តីថ្លៃងការណ៍រួមនោះបានគូសបញ្ជាក់ថា ប្រទេសទាំងពីរបានឯកភាពគ្នា ក្នុងការជៀសវាងការយល់ច្រឡំ និងការសម្រេចចិត្តខុស ដែលអាចនាំទៅរកការប៉ះទង្គិចគ្នាជាថ្មីបន្ថែមទៀតក្នុងតំបន់ជាយដែន Ladakh ដែលជាតំបន់វាលលំហខ្សាច់យុទ្ធសាស្ត្រដ៏ត្រជាក់ និងជាប់ព្រំប្រទល់ជាមួយដែនដីទីបេត៍របស់ចិននោះ។
ការប្រឈមមុខដាក់គ្នា បានកើតមានឡើងដំបូង កាលខែឧសភា ហើយស្ថានភាពនោះកាន់តែអាក្រក់ទៅក្នុងខែមិថុនា នៅពេលដែលកងទ័ពនៃប្រទេសទាំងពីរបានប៉ះទង្គិចដោយការដាល់គ្នា និងប្រើអាវុធសាមញ្ញ ដូចជាដុំថ្មនិងដំបងជាដើម ដែលធ្វើឲ្យទាហានឥណ្ឌាស្លាប់ចំនួន ២០ នាក់ របួសជាច្រើននាក់ ហើយខាងភាគីចិន ក៏មានអ្នកស្លាប់និងអ្នករបួស ដែលគេមិនបានដឹងចំនួនច្បាស់លាស់ផងដែរ។
ប្រទេសចិននិងឥណ្ឌាតែងមានភាពតានតឹងជារឿយៗ អំពីព្រំដែនមានជម្លោះនេះ ក្រោយពីប្រទេសទាំងពីរធ្លាប់បានធ្វើសង្គ្រាមនឹងគ្នារយៈពេលខ្លី កាលពីឆ្នាំ ១៩៦២ ប៉ុន្តែប្រទេសទាំងពីរបានព្យាយាមពង្រឹងទំនាក់ទំនងខាងសេដ្ឋកិច្ច។
ភាពតានតឹងចុងក្រោយនេះបាននាំឲ្យរដ្ឋាភិបាលឥណ្ឌាសម្រេចហាមឃាត់កម្មវិធី app ពេញនិយមរបស់ចិនមួយចំនួនដូចជា TikTok និងរឹតត្បិតក្រុមហ៊ុនចិនពីការដេញថ្លៃក្នុងគម្រោងហេដ្ឋារចនាសម្ព័ន្ធនានា៕
