លោកប្រធានាធិបតីចិន ស៊ី ជីងពីង (Xi Jinping) បានធ្វើដំណើរមកដល់ប្រទេស អ៊ីរ៉ង់ហើយដើម្បីបំពេញទស្សនកិច្ចជាផ្លូវការ ដែលគេរំពឹងថា នឹងឃើញប្រទេសទាំងពីរពង្រីកទំនាក់ទំនងការទូតនិងទំនាក់ទំនងសេដ្ឋកិច្ច។
បន្ទាប់ពីបានអញ្ជើញទៅដល់ក្រុង តេរ៉ង់ (Tehran) កាលពីល្ងាចថ្ងៃសុក្រ លោក ប្រធានាធិបតី ស៊ី ថ្លែងថា រដ្ឋាភិបាលក្រុងប៉េកាំងទន្ទឹងរង់ចាំមើល យុគសម័យថ្មីមួយក្នុងទំនាក់ទំនងចិន និងអ៊ីរ៉ង់។ នេះបើតាមទីភ្នាក់ងារព័ត៌មាន អ៊ីរ៉ង់ IRNA ។
ប្រទេសចិនជាអតិថិជនប្រេងធំបំផុតមួយរបស់អ៊ីរ៉ង់ ទោះបីជាអ៊ីរ៉ង់ស្ថិតក្នុងទណ្ឌ កម្មអន្តរជាតិរយៈពេលបីឆ្នាំដោយសារតែកម្មវិធីនុយក្លេអ៊ែអ៊ីរ៉ង់ក្តី។ តែឥឡូវដោយសារតែទណ្ឌ កម្មនានាបានលើករួចហើយៗការផលិតប្រេងមានកំណើនឡើងវិញ ទំនាក់ទំនងរបស់អ៊ីរ៉ង់ជាមួយចិនអាចកើនឡើងថែមទៀត។
ក្នុងអំឡុងពេលបំពេញទស្សនកិច្ចរបស់លោកប្រធានាធិបតី ស៊ី គេរំពឹងថានឹង មានការចុះហត្ថលេខាលើឯកសារចំនួន១៧ ជាមួយអ៊ីរ៉ង់ទាក់ទងនឹងកិច្ចសហប្រតិបត្តិការថែមទៀតលើបញ្ហាសេដ្ឋកិច្ច ឧស្សហកម្ម វប្បធម៌ វិស័យតុលាការជាដើម៕
