លោកប្រធានាធិបតីចិនស៊ី ជីនពីង (Xi Jinping) និងលោកប្រធានាធិបតីសហរដ្ឋអាមេរិកបារ៉ាក់ អូបាម៉ា (Barack Obama) ដែលជាមេដឹកនាំកំពូលនៃប្រទេសដែលបំពុលបរិស្ថានធំបំផុតក្នុងពិភពលោកបានសន្យាកាលពីថ្ងៃច័ន្ទថា នឹងសហការគ្នាក្នុងការអនុវត្តអនុសញ្ញាស្តីពីការប្រែប្រួលអាកាសធាតុ ដែលមានលក្ខណៈប្រវត្តិសាស្រ្តដែលបានសម្រេចឡើងនៅក្នុងទីក្រុងប៉ារីស។
នៅក្នុងកិច្ចសន្ទនាតាមទូរស័ព្ទមួយ លោក ស៊ី បានប្រាប់ដល់លោកអូបាម៉ាអំពីកិច្ចព្រមព្រៀងដែលត្រូវបានសម្រេចកាលពីថ្ងៃសៅរ៍ គឺជាលទ្ធផលនៃសហប្រតិបត្តិការជាសាកល និងបានកំណត់នូវមាគ៌ាដ៏ច្បាស់លាស់មួយសម្រាប់កិច្ចខិតខំប្រឹងប្រែងអន្តរជាតិនានានៅពេលអនាគត។ នេះបើយោងតាមគណនីរបស់រដ្ឋមន្រ្តីក្រសួងការបរទេសប៉េកាំង។ លោក ស៊ីបានមានប្រសាសន៍ថា ចិនមានឆន្ទៈក្នុងការសហការជាមួយនឹងសហរដ្ឋអាមេរិក និងភាគីពាក់ព័ន្ធផ្សេងៗទៀតក្នុងការធ្វើឲ្យប្រាកដនូវ ការអនុវត្តកិច្ចព្រមព្រៀងនៅទីក្រុងប៉ារីស ហើយក៏ដើម្បីព្រមព្រៀងទៅលើអនុសញ្ញាទ្វេភាគីថ្មីៗផងដែរ។
លោក ស៊ី បាននិយាយថា ចិនមានបំណងចង់រក្សាការសម្របសម្រួល និងសហប្រតិបត្តិការជាមួយនឹងសហរដ្ឋអាមេរិកទៅលើបញ្ហាអន្តរជាតិដទៃទៀត។
សេតវិមានបានឲ្យដឹងថា លោកអូបាម៉ាបានស្ងើចសរសើរទៅលើអនុសញ្ញានៅទីក្រុងប៉ារីស ដែលនឹងអាចជួយដោះស្រាយបញ្ហាការបញ្ចេញផ្សែងពុលក្នុងរយៈពេលប៉ុន្មានឆ្នាំខាងមុខនេះ។ លោកអូបាម៉ាបានមានប្រសាសន៍ថា មានការសម្របសម្រួលដ៏ជិតស្និទ្ធរវាងក្រុមចរចារបស់ចិន និងសហរដ្ឋអាមេរិកនៅទីក្រុងប៉ារីសដើម្បីធ្វើឲ្យប្រាកដថា កិច្ចព្រមព្រៀងស្តីពីអាកាសធាតុនេះនឹងត្រូវបានគេអនុម័ត៕
