ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ឥណ្ឌូនេស៊ី​អនុញ្ញាត​ឲ្យ​ក្រុម​ហ្វាលូនគង់​មាន​សកម្មភាព​បាន​តែ​មិន​ឲ្យ​សិទ្ធិ​ស្រប​ច្បាប់


ក្រុម​អ្នក​ហាត់​ប្រាណ​​ហ្វាលូន​គង់ (Falun Gong) លេង​ឧបករណ៍​ភ្លេង​​ក្នុង​អំឡុង​ការ​ធ្វើ​បាតុកម្ម​នៅ​មុខ​ស្ថានទូត​ចិន​​ក្នុង​ទី​ក្រុង​ហ្សាការតា​​​ប្រទេស​ឥណ្ឌូនេស៊ី​កាល​ពី​ថ្ងៃ​ទី​១៤​ខែ​សីហា​ឆ្នាំ​២០១០។
ក្រុម​អ្នក​ហាត់​ប្រាណ​​ហ្វាលូន​គង់ (Falun Gong) លេង​ឧបករណ៍​ភ្លេង​​ក្នុង​អំឡុង​ការ​ធ្វើ​បាតុកម្ម​នៅ​មុខ​ស្ថានទូត​ចិន​​ក្នុង​ទី​ក្រុង​ហ្សាការតា​​​ប្រទេស​ឥណ្ឌូនេស៊ី​កាល​ពី​ថ្ងៃ​ទី​១៤​ខែ​សីហា​ឆ្នាំ​២០១០។

ប្រទេស​ឥណ្ឌូនេស៊ី​នៅ​ពេល​ថ្មីៗ​នេះ​ បាន​បដិសេធ​មិន​ព្រម​ផ្ដល់​ឋានៈ​ស្របច្បាប់​ដល់​ក្រុម​សាសនា​ចិន​មួយ​ហៅ​ថា​ក្រុម​ហ្វាលូនគង់ (Falun Gong)។ ប្រទេស​ចិន​ បាន​ហាម​ឃាត់​ក្រុម​នោះ​នៅ​ក្នុង​ប្រទេស​ចិន ​ហើយ​ក្រុម​ការពារ​សិទ្ធិ​មនុស្ស​ និយាយ​ថា​ ការ​សម្រេច​ចិត្ដ​ដើម្បី​រឹត​បន្ដឹង​មក​លើ​ក្រុម​ហ្វាលូនគង់​នៅ​ក្នុង​ប្រទេស​ឥណ្ឌូនេស៊ី​ ធ្វើ​ឡើង​ដើម្បី​រក្សា​ទំនាក់​ទំនង​ល្អ​ជាមួយ​ប្រទេស​ចិន​ ដែល​ជា​ដៃគូ​ពាណិជ្ជកម្ម​ដ៏​ធំ​មួយ​នេះ។

កាល​ពី​ព្រឹក​ថ្ងៃ​អាទិត្យ​ នៅ​មុខ​កីឡាដ្ឋាន​ធំ​ របស់​ទី​ក្រុង​ហ្សាការតា​ អ្នក​ប្រតិបត្ដិ​សាសនា​ ហ្វាលូនគង់ ​យ៉ាប ​ស៊ុងកូណូ​ (Yap Sungkono) ​ដឹកនាំ​អ្នក​ហាត់​ប្រាណមាន​សមាជិក ​២០​នាក់។​ សេចក្ដី​សម្រេច​ចិត្ដ​ថ្មីៗ​ ធ្វើ​ឡើង​ដោយ​ក្រសួង​មហាផ្ទៃ​របស់​ប្រទេស​ឥណ្ឌូនេស៊ី​មិន​ទទួល​ស្គាល់​ក្រុម​នោះ​ ជា​អង្គការ​សង្គម​ស្របច្បាប់​ មិន​បាន​បញ្ឈប់​ក្រុម​នោះ​មិន​ឲ្យ​ប្រមូល​ផ្ដុំ​គ្នា​ប្រចាំ​សប្ដាហ៍​ទេ។ ​តែ​លោក​ ស៊ុងកូណូ ​ថ្លែង​ថា ​វា​បាន​រារាំង​ក្រុម​នោះ​ មិន​ឲ្យ​រៀបចំ​ការ​តវ៉ា​ជា​ទ្រង់ទ្រាយ​ធំ​បាន​ឡើយ។

គាត់​និយាយ​ថា​ចំពោះ​ព្រឹត្ដិការណ៍​ធំៗ ​ដូច​ជា​ការ​ដង្ហែ​ក្បួន​ គេ​បាន​ពើប​ប្រទះ​នឹង​បញ្ហា​ខ្លះ ​បង្ក​ឡើង​ដោយ​អាជ្ញាធរ​ ហើយ​ក្រុម​នោះ​តែងតែ​មិន​មាន​ភាព​ប្រាកដ​ប្រជា​អំពី​ភាព​ស្រប​ច្បាប់​របស់​ខ្លួន។

ក្រុម​ហ្វាលូនគង់​ ឬ​ខ្លះ​ហៅថា ​ហ្វាលូន​ដាហ្វា (Falun Dafa) ​ផ្ដើម​ឡើង​នៅ​ក្នុង​ប្រទេស​ចិន​កាល​ពី​ទសវត្សរ៍​ឆ្នាំ​១៩៩០។ ​ក្រុម​នោះ​អនុវត្ដ​ភាព​ស្មឹងស្មាធិ៍​និង​ការ​ពត់​ខ្លួន​ប្រាណ​ ដើម្បី​ដាស់​តឿន​អារម្មណ៍។ ​ក្រុម​នោះ​និយាយ​ថា ​ខ្លួន​មិន​ធ្វើ​នយោបាយ​ទេ ​ហើយ​មិន​មែន​ជា​សាសនា​ដែរ។​សមាជិក​ឥណ្ឌូនេស៊ី​របស់​ខ្លួន​ជា​ច្រើន​កាន់​សាសនា​អ៊ីស្លាម។

ទីទី​ រ៉ាក​ម៉ន​ (Titi ​Rachman) ​ដូច​ជា​អ្នក​ដទៃ​ដែរ​ ដែល​ហាត់​ប្រាណ​ដើរ​នឹង​រត់​ ជិត​ក្រុម​អ្នក​ហាត់ប្រាណ​ហ្វាលូន​ដាហ្វា ​យល់ថា​ការ​ហាត់​ប្រាណ​ដូច្នោះ​នាំ​ឲ្យ​មាន​សុខភាព​ល្អ។

នាង​និយាយ​ថា​ការ​ហាត់​ប្រាណ​នេះ​ជា​ការ​ល្អ​ដល់​សតិ​អារម្មណ៍​និង​ដល់​ខ្លួន​ប្រាណ​ហើយ​ នេះ​ជា​ការ​ហាត់​ប្រាណ​ដូច​គ្នា​ និង​របៀប ​វ៉ៃ ​តាន់ ​គុង​ (wai tan kung) ឬ​ តាយ​ ជី(tai chi)។​ វ៉ៃ​តាន់​គុង ​និង​ តាយ​ជី ​ជា ​ការ​ហាត់​ប្រាណ​ប្រពៃណី​នៅក្នុង​ប្រទេស​ចិន។ ​អ្នក​អនុវត្ដ​ហ្វាលូន ដាហ្វា ​ហាត់​ប្រាណ​នៅ​លើ​ទី​កន្លែង​សាធារណៈ​ទូទាំង​ប្រទេស​ ដើម្បី​ជ្រើស​យក​សមាជិក។ ​ក្រុម​នោះ​អះអាង​ថា​ ខ្លួន​មាន​សមាជិក​ជាង ​៧.០០០​ពាន់​នាក់ ​នៅ​ក្នុង​ប្រទេស​ អិនដូណេស៊ី។​អ្នក​ហាត់​ប្រាណ​ក៏​ប្រើ​ប្រាស់​ព្រឹត្ដ​ការ​ណ៍​នោះ​ដើម្បី​ធ្វើ​ឲ្យ​គេ​យល់​ដឹង​អំពី​ការ​ធ្វើ​ទុក្ខ​បុក​ម្នេញ​មក​លើ​សមាជិក​ហ្វា​លុង​គង់ ​នៅ​ក្នុង​ប្រទេស​ចិន។

ការ​រឹត​ត្បឹត​មក​លើ​ក្រុម​ហ្វាលូនគង់​ដោយ​អាជ្ញាធរ​ឥណ្ឌូនេស៊ី ​មាន​សភាព​ទន់​ខ្សោយ​ប្រៀបធៀប​ នឹង​ការ​ហាម​ប្រាម​ដោយ​អាជ្ញាធរ​នៅ​ក្នុង​ប្រទេស​ចិន។ ​ចិន​បាន​ចាត់​ទុក​ក្រុម​នោះ​ ជា​ក្រុម​គោរព​ជំនឿ​ខុស​ពី​សាសនា​ធម្មតា​ ហើយ​បា​នចាប់​ដាក់​គុក​សមាជិក​ជា​ច្រើន​នាក់។​ ចិន​ បដិសេធ​ថា​មិន​បាន​ធ្វើ​បាប​ក្រុម​ហ្វាលូនគង់​ទេ​ តែ ​អសប​ បាន​ចងក្រង​ឯកសារ​មាន​ករណី​ជា​ច្រើន​នៃ​បទ​រំលោភ​លើ​សិទ្ធិ​មនុស្ស ​ធ្វើ​ឡើង​ដោយ​អាជ្ញាធរ​ចិន ​មក​លើ​សមាជិក​របស់​ក្រុម​ ហ្វាលូនគង់។

គេ​មិន​ឃើញ​មាន​សមាជិក​ហ្វាលូនគង់​ចិន​ច្រើន​ទេ​ នៅ​ក្នុង​ទី​ក្រុង​ហ្សាការតា។

ឥណ្ឌូនេស៊ី​មិន​អនុញាត​ឲ្យ​ក្រុម​នោះ​រស់​នៅ​ជា​អចិន្ដ្រៃយ៍ ​ហើយ​ធ្វើការ​នៅ​ក្នុង​ប្រទេស​ឥណ្ឌូនេស៊ី​ទេ ​ខណៈ​ដែល​ក្រុម​នោះ​ស្វែងរក​ការ​ជ្រកកោន​នយោបាយ ​នៅ​ក្នុង​ប្រទេស​ដទៃ។

លោក ​ហេ ​យុង​ហ្វេង​ (He Yungfeng) ​និយាយ​ថា​ មុន​គាត់​រត់​ចេញ​រួច​ពី​ប្រទេស​ចិន​ ដែល​នៅ​ទី​នោះ​ គាត់​បាន​ត្រូវ​ជាប់​គុក​ជា​ច្រើន​ឆ្នាំ ​ដោយសារ​តែ​បាន​ប្រកាស​ប្រាប់​សាធារណជន​ អំពី​ជំនឿ​របស់​គាត់ ​ហើយ​បាន​ត្រូវ​រង​ទារុណកម្ម ​ដោយ​ក្រុម​ប៉ូលិស។

គាត់​និយាយ​ថា​ នៅ​រដូវ​ធ្លាក់​ទឹក​កក ​ពេល​រងា​ខ្លាំង​ នៅ​ក្នុង​គុក​ គេ​បាន​សម្រាត​យក​ខោ​អាវ​គាត់​ ចេញ ​ហើយ​យក​ទឹក​ត្រជាក់​មក​ចាក់​ពី​លើ​ប្រាណ រួច​កោស​ស្បែក​គាត់ ​រហូត​ដល់​ជិតដាច់​សាច់។ ​មន្ដ្រី​នៃ​ក្រសួង​មហាផ្ទៃ​ឥណ្ឌូនេស៊ី​ ថ្លែង​ប្រាប់​វីអូអេ​ថា​ ទំនាក់ទំនង​ល្អ​ជាមួយ​ចិន​ ជា ​មូលហេតុ​មួយ​ ដែល​មិន​ទទួលស្គាល់​ក្រុម​ហ្វាលូនគង់។ ​ឯកសារ​របស់​តុលាការ​ ដែល​ក្រសួង​មហាផ្ទៃ​ដាក់​ពាក្យ​បណ្ដឹង​និយាយ​ថា ​ចិន​ទាមទារ​ឲ្យ​អាជ្ញាធរ​ឥណ្ឌូនេស៊ី​ចេញ​ការ​ហាមប្រាម​មក​លើ​ក្រុម​ហ្វាលូនគង់។

ហារីស ​អាស្សារ (Harris Azhar) ​អ្នក​សម្រប​សម្រួល​របស់​អង្គការ​ការពារ​សិទ្ធិ​មនុស្ស ​«កុងត្រាស» (Kontras) និយាយ​ថា ​កិច្ចប្រឹងប្រែង​របស់​ចិន​ ក្នុង​ការ​គាប​សង្កត់​មក​លើ​ប្រទេស​ដទៃ​ដើម្បី​ដាក់​ទោស​មក​លើ​ក្រុម​ហ្វាលូនគង់​ដែល​ទី​ក្រុង​ប៉េកាំង​មិន​ចូល​ចិត្ដ មិន​ជា​រឿង​ធ្វើ​ឲ្យ​គេ​ភ្ញាក់​ផ្អើល​ទេ។​ តែ​លោក​និយាយ​ថា ក្នុង​លក្ខណៈ​ជា​ប្រទេស​គោរព​លទ្ធិ​ប្រជាធិបតេយ្យ​ឥណ្ឌូនេស៊ី​ គួរ​ការពារ​សិទ្ធិ​ជន​ភាគ​តិច​មិនមែន​ធ្វើ​ការ​រឹតត្បឹត​មក​លើ​ក្រុម​នោះ។

«យើង​មាន​ការ​ព្រួយ​បារម្ភ​ខ្លាំង​ចំពោះ​រដ្ឋាភិបាល​មួយ​ដែល​ស្ទាក់ស្ទើរ​មក​លើ​ការ​ផ្ដល់​សុវត្ថិភាព​ដល់​ក្រុម​នោះ​ ដើម្បី​ការពារ​ក្រុម​នោះ​ពី​ក្រុម​មួយ​ទៀត​ដែល​ចង់​ធ្វើ​ទុក្ខបុកម្នេញ​មក​លើ​ក្រុម​នេះ»។

លោក ​មាន​ការ​ព្រួយ​បារម្ភ​ថា​ ខណៈ​ដែល​ឥទ្ធិពល​សេដ្ធកិច្ច​របស់​ចិន​សង្កត់​កាន់​តែ​ខ្លាំង​មក​លើ​តំបន់​(អាស៊ី​អាគ្នេយ៍) ប្រទេស​ឥណ្ឌូនេស៊ី​និង​ប្រទេស​ដទៃ​នឹង​រឹតត្បឹត​មក​លើ​ក្រុម​ហ្វាលូនគង់​ ដើម្បី​រក្សា​ឲ្យ​ទំនាក់ទំនង​ល្អ​ជា​មួយ​ប្រទេស​ចិន៕

ប្រែ​សម្រួល​ដោយ អ៊ូ ធួក

XS
SM
MD
LG