ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Blinken សន្យា​លើកស្ទួយ​អង្គការ​អូតង់​និង​សហការ​លើ​បញ្ហា​អាហ្វហ្គានីស្ថាន


រដ្ឋមន្រ្តី​ក្រសួង​ការបរទេស​សហរដ្ឋ​អាមេរិក​លោក Antony Blinken បាន​ថ្លែង​ទៅកាន់​អគ្គលេខាធិការ​អង្គការ​អូតង់​លោក Jens Stoltenberg មុន​កិច្ចប្រជុំ​រដ្ឋមន្រ្តី​ការបរទេស​នៃ​អង្គការ​អូតង់​នៅ​ទីស្នាក់ការ​កណ្តាល​របស់​អង្គការ​អូតង់​នៅ​ទីក្រុង​ប្រ៊ុចសែល នៅ​ថ្ងៃអង្គារទី២៣ ខែមីនា ឆ្នាំ២០២១។

រដ្ឋមន្ត្រី​ការបរទេស​សហរដ្ឋ​អាមេរិក​លោក Antony Blinken នៅ​ថ្ងៃ​អង្គារ​នេះ បាន​សន្យា​ស្ថាបនា​និង​ស្រោចស្រង់​ឡើង​វិញ​នូវ​សម្ព័ន្ធភាព​ផ្នែក​យោធា​របស់​អង្គការ​សន្ធិសញ្ញា​អាត្លង់ទិក​ខាង​ជើង (NATO) ឬ​អូតង់ និង​ចែក​រំលែក​នូវ​ផែនការ​របស់​សហរដ្ឋ​អាមេរិក​អំពី​លទ្ធភាព​នៃ​ការ​ដក​កងទ័ព​ចេញពី​ប្រទេស​អាហ្វហ្គានីស្ថាន។

ថ្លែង​ក្នុង​ដំណើរ​ទស្សនកិច្ច​លើក​ដំបូង​របស់​លោក​ទៅកាន់​ទីស្នាក់ការ​កណ្ដាល​របស់​អង្គការ​អូតង់​ក្នុង​ទីក្រុង​ប្រ៊ុចសែល ប្រទេស​ប៊ែលហ្សិក លោក Blinken បាន​មាន​ប្រសាសន៍​ថា អង្គការ​អូតង់​ស្ថិត​ក្នុង​ដំណាក់កាល​សំខាន់​មួយ​នៅ​ក្នុង​ការ​ប្រឈម​នឹង​បញ្ហា​គំរាមកំហែង​ជុំវិញ​ពិភពលោក ដែល​ក្នុង​នោះ​មាន​ទាំង​បញ្ហា​ប្រែប្រួល​អាកាសធាតុ​ផងដែរ។

លោក Blinken បាន​ប្រាប់​ក្រុម​អ្នក​យក​ព័ត៌មាន​នៅពេល​ដែល​លោក​បាន​ជួប​ពិភាក្សា​ជាមួយ​អគ្គលេខាធិការ​អង្គការ​អូតង់​លោក Jens Stoltenberg ថា៖ «ខ្ញុំ​មក​ទីនេះ​ដើម្បី​បញ្ជាក់​អំពី​ការ​តាំង​ចិត្ត​មិន​ងាករេ​របស់​សហរដ្ឋ​អាមេរិក​ចំពោះ​អង្គការ​អូតង់។ សហរដ្ឋ​អាមេរិក​ចង់​កសាង​ភាព​ជា​ដៃគូ​ឡើង​វិញ​ជាមួយ​សម្ព័ន្ធមិត្ត​ដែល​ជា​សមាជិក​របស់​អង្គការ​អូតង់។ យើង​ចង់​ស្រោចស្រង់​សម្ព័ន្ធភាព​នេះ​ឡើង​វិញ»។

លោក Stoltenberg បាន​កំណត់​អំពី​វិស័យ​ដែល​អង្គការ​អូតង់​អាច​ធ្វើ​ទំនើបកម្ម​បាន​នៅ​ក្នុង​រយៈពេល​មធ្យម ដែល​មាន​តាំងពី​វិធានការ​សម្រាប់​បញ្ហា​ប្រែប្រួល​អាកាសធាតុ​រហូត​ដល់​វិធានការ​ផ្ដល់​ថវិកា​ជា​និរន្ត​ដល់​កិច្ច​ប្រតិបត្តិការ​យោធា ក៏​ដូចជា​តម្រូវការ​ឲ្យ​មាន​ការ​គាំទ្រ​ពី​សហរដ្ឋ​អាមេរិក​ផងដែរ។

នៅ​ពេល​សួរ​អំពី​លទ្ធភាព​នៃ​ការ​ដក​កងទ័ព​ចេញ​ពី​ប្រទេស​អាហ្វហ្គានីស្ថាន លោក Blinken បាន​និយាយ​ថា សហរដ្ឋ​អាមេរិក​កំពុង​ពិនិត្យ​លើ​ជម្រើស​នានា ហើយ​លោក​នឹង​ស្ដាប់​នឹង​ប្រឹក្សា​ជាមួយ​នឹង​សម្ព័ន្ធមិត្ត​ទាក់ទិន​នឹង​រឿង​នេះ។ រដ្ឋមន្ត្រី​ការបរទេស​នៃ​បណ្ដា​ប្រទេស​ជា​សមាជិក​អង្គការ​អូតង់​នឹង​ពិភាក្សា​អំពី​រឿង​អាហ្វហ្គានីស្ថាន​នេះ​នៅ​ក្នុង​ពេល ២ ថ្ងៃ​ខាង​មុខ​នៅ​ក្នុង​ទីក្រុង​ប្រ៊ុចសែល៕

XS
SM
MD
LG