កិច្ចចរចាតឹងតែងពីរថ្ងៃរវាងសហរដ្ឋអាមេរិកនិងប្រទេសចិន ក្នុងរដ្ឋ Alaska បានបញ្ចប់ កាលពីថ្ងៃសុក្រ ទី ១៩ ខែមីនា ដោយគណៈប្រតិភូចិនបានចាកចេញដោយគ្មានធ្វើអត្ថាធិប្បាយអ្វីទេ។
ការខ្វែងមតិគ្នានៅតែមានពាក់ព័ន្ធនឹងការប្រព្រឹត្តរបស់អាជ្ញាធរចិនលើជនអំបូរភាគតិច Uyghur និងសកម្មភាពគឃ្លើនរបស់ចិននៅក្រុងហុងកុង តំបន់ទីបេត៍ និងកោះតៃវ៉ាន់។
លោករដ្ឋមន្ត្រីការបរទេសសហរដ្ឋអាមេរិក Anthony Blinken បានថ្លែងថា៖
«គ្មានអ្វីគួរឲ្យភ្ញាក់ផ្អើលទេ ដែលនៅពេលយើងលើកយកបញ្ហាទាំងនេះមកនិយាយយ៉ាងច្បាស់លាស់និងចំៗតែម្តង យើងបានទទួលការឆ្លើយតបការពារខ្លួន»។
លោក Zhao Lijian អ្នកនាំពាក្យក្រសួងការបរទេសចិន បានថ្លែងថា៖
«ប្រទេសចិនមិនសម្របសម្រួលបញ្ហាអធិបតេយ្យភាព សន្តិសុខ និងផលប្រយោជន៍ស្នូលរបស់ខ្លួនទេ។ ការប្តេជ្ញារបស់យើងនិងការថែរក្សាផលប្រយោជន៍ស្នូលរបស់យើង មិនងាករេឡើយ»។
លោករដ្ឋមន្ត្រីការបរទេសសហរដ្ឋអាមេរិក Antony Blinken បានមានប្រសាសន៍ថា បញ្ហាសេដ្ឋកិច្ច ពាណិជ្ជកម្ម បច្ចេកវិជ្ជា និងការប្រហារតាមអនឡាញ នឹងត្រូវពិនិត្យសើរើជាថ្មីជាមួយសភានិងសម្ព័ន្ធមិត្តសហរដ្ឋអាមេរិក ដើម្បីជំរុញផលប្រយោជន៍របស់ធុរកិច្ចនិងក្រុមអ្នកធ្វើការងារ។
ជំនួបដំបូងរបស់រដ្ឋបាលលោក Biden រវាងមហាអំណាចទាំងពីរនេះបានធ្វើឡើង នៅក្រោយការធ្វើដំណើររបស់លោក Blinken ទៅជូបសម្ព័ន្ធមិត្តសហរដ្ឋអាមេរិក គឺកូរ៉េខាងត្បូងនិងជប៉ុន នៅពេលដែលប្រទេសចិនបានចាត់វិធានការកាន់តែមោះមុតជាងមុននៅតំបន់អាស៊ី។
លោក Blinken បានមានប្រសាសន៍ថា គោលដៅនៃជំនួបនេះ គឺបង្ហាញអាទិភាពរបស់រដ្ឋបាលលោក Biden។ នៅពេលមានបញ្ហាជាច្រើនដែលប្រទេសទាំងពីរមិនយល់ស្របគ្នា ចិននិងសហរដ្ឋអាមេរិកយល់ស្របគ្នាលើបញ្ហាមួយចំនួន។
«ចំពោះបញ្ហាប្រទេសអ៊ីរ៉ង់ កូរ៉េខាងជើង អាហ្វហ្គានីស្ថាន និងបញ្ហាអាកាសធាតុ យើងមានផលប្រយោជន៍ដូចគ្នា»។
លោក Jamese Jay Carafano នៃមូលនិធិ Heritage បាននិយាយថា ទោះណាគេនៅមិនទាន់អាចសន្និដ្ឋានអំពីគោលនយោបាយរបស់លោក Biden ចំពោះប្រទេសចិននៅឡើយក៏ដោយ ក៏ក្រុមអ្នកវិភាគមិនរំពឹងថានឹងខុសគ្នាច្រើនពីគោលនយោបាយរបស់រដ្ឋបាលលោក Trump នោះទេ។
«មកដល់ពេលនេះ ខ្ញុំឃើញមានការបន្តច្រើនជាងការផ្លាស់ប្តូរនៅក្នុងគោលនយោបាយរបស់សហរដ្ឋអាមេរិកពីរដ្ឋបាល Trump ទៅកាន់រដ្ឋបាលលោក Biden។ យើងត្រូវសម្គាល់ចំណុចទាំងឡាយដែលយើងនិងចិនមិនយល់ស្របគ្នា ហើយព្យាយាមដោះស្រាយបញ្ហាទាំងនោះ និងបង្ហាញឆន្ទៈរបស់យើង ដើម្បីការពារផលប្រយោជន៍របស់យើង។ ការធ្វើដូច្នេះទំនងជានាំឱ្យយើងមានទំនាក់ទំនងប្រកបដោយស្ថិរភាពឆាប់ជាងមុន»។
ក្រុមអ្នកវិភាគនិយាយថា ទោះជាចិនបានប្រើប្រាស់វោហារសាស្ត្រតឹងរ៉ឹង ដែលភាគច្រើនដើម្បីបង្ហាញពលរដ្ឋចិនក៏ដោយ ប្រទេសចិនចង់កាត់បន្ថយភាពតានតឹងជាមួយសហរដ្ឋអាមេរិក។
អ្នកស្រី Abby Bard ដែលធ្វើការនៅឯមជ្ឈមណ្ឌលនៃការជឿនលឿនអាមេរិកាំង បាននិយាយថា៖ «ប្រទេសចិនស្រមៃថា សហរដ្ឋអាមេរិកនឹងដកថយពីការចង់ធ្វើជាមហាអំណាចមួយក្នុងតំបន់ឥណ្ឌូ-ប៉ាស៊ីហ្វិក។ ខ្ញុំមិនយល់ថា រឿងនេះនឹងកើតឡើងទេ»។
ជាពិសេសក្រោយពីអ្វីដែលលោក Michael Kugelman នៃមជ្ឈមណ្ឌលស្រាវជ្រាវ Wilson បានពណ៌នាថាជា «ទំនាក់ទំនងអាក្រក់»រ វាងប្រទេសចិននិងសហរដ្ឋអាមេរិក ក្នុងអំឡុងរដ្ឋបាល Trump។
លោកបានថ្លែងថា៖ «មានការរំពឹងថារដ្ឋបាលលោក Biden នឹងអាចលើកទឹកចិត្តឱ្យមានការបន្ថយភាពតានតឹងរវាងប្រទេសទាំងពីរ។ តែយើងឃើញថា មកទល់នឹងពេលនេះ ការទាក់ទងគ្នានេះកាន់តែធ្លាក់ដុនដានថែមទៀត»។
ការប្រជុំគ្នានេះគ្រាន់តែជាជំហានដំបូងប៉ុណ្ណោះ។ ក្រុមអ្នកវិភាគនិយាយថា សហរដ្ឋអាមេរិកនិងប្រទេសចិន នឹងបោះជំហានទៅមុខតែនឹងត្រូវការពេលវេលា ដើម្បីឱ្យថ្នាក់ដឹកនាំនៃប្រទេសទាំងពីរនេះសម្រេចថា តើទំនាក់ទំនងប្រកបដោយចីរភាពរវាងប្រទេសទាំងពីរនឹងមានលក្ខណៈយ៉ាងដូចម្តេច។
ប្រែសម្រួលដោយលោក ឈឹម សុមេធ
