ពីរសប្តាហ៍នៃសវនាការសាធារណៈនៅក្នុងការស៊ើបអង្កេតប្តឹងដកប្រធានាធិបតីត្រាំចេញពីតំណែងពាក់ព័ន្ធនឹងប្រទេសអ៊ុយក្រែន បានធ្វើឲ្យមានការបែកបាក់យ៉ាងខ្លាំងរួចទៅហើយរវាងពួកគណបក្សប្រជាធិបតេយ្យ និងគណបក្សសាធារណរដ្ឋ ហើយបានបណ្តាលឲ្យសមាជិកសភាជាច្រើនគិតពីភាពស្មោះត្រង់ដល់គណបក្សជាងគុណភាពនៃការផ្តល់សក្ខីកម្មនេះ។ នេះតាមការវិភាគនយោបាយខ្លះ។
ដោយការបោះឆ្នោតប្រធានាធិបតីនិងសភានៅឆ្នាំ២០២០ ខិតមកកាន់តែជិត ពួកសមាជិកសភាកំពុងធ្វើទៅតាមគោលនយោបាយរបស់មេដឹកនាំគណបក្សរបស់ខ្លួន។
នៅក្នុងការបោះឆ្នោតសភាតំណាងរាស្រ្តសហរដ្ឋអាមេរិកកាលពីពេលថ្មីៗនេះ ដែលបានបង្កើតនីតិវិធីសម្រាប់ចាប់ផ្តើមស៊ើបអង្កេតប្តឹងដកប្រធានាធិបតីចេញពីតំណែង មិនមានសមាជិកគណបក្សសាធារណរដ្ឋណាម្នាក់ បានបោះឆ្នោតគាំទ្រគណបក្សប្រជាធិបតេយ្យដើម្បីធ្វើការស៊ើបអង្កេតទេ។ មានតែសមាជិកខាងគណបក្សប្រជាធិបតេយ្យ២រូប បានបោះឆ្នោតប្រឆាំងនឹងការស៊ើបអង្កេតនោះ។
ចំនួនសមាជិកសភាទាំងនោះខុសគ្នាស្រឡះទៅនឹងការបោះឆ្នោតឆ្នាំ១៩៩៨ ដើម្បីចាប់ផ្តើមនីតិវិធីស៊ើបអង្កេតប្តឹងដកតំណែងលោកប្រធានាធិបតី Bill Clinton ខាងគណបក្សប្រជាធិបតេយ្យ។ នៅក្នុងការបោះឆ្នោតនោះ សមាជិកសភា៣១រូបរបស់គណបក្សលោកប្រធានាធិបតីគ្លីនតុន បានយល់ស្រប់ទៅនឹងការសម្រេចរបស់គណបក្សសាធារណរដ្ឋដែលជាគូប្រជែងរបស់ខ្លួនដើម្បីចាប់ផ្តើមធ្វើការស៊ើបអង្កេត៕
