សន្និសីទស្ដីពីជំងឺអេដស៍ ដែលបានប្រព្រឹត្តទៅកាលពីពេលថ្មីៗកន្លងទៅនេះ បានឆ្លុះបញ្ចាំងឲ្យឃើញពីសុទិដ្ឋិនិយមអំពីការព្យាបាលថ្មីៗ និងអំពីក្ដីកង្វល់អំពីសំណើកាត់បន្ថយថវិកាជំនួយចំពោះការប្រយុទ្ធប្រឆាំងនឹងមេរោគហ៊ីវ និងជំងឺអេដស៍នេះ ជាពិសេសពីសំណាក់រដ្ឋាភិបាលសហរដ្ឋអាមេរិក។
លោកស្រី Anne Hidalgo ដែលជាអភិបាលក្រុងប៉ារីស បានគូសបញ្ជាក់អំពីកង្វះថវិកានេះយ៉ាងដូច្នេះថា៖ «ខ្ញុំចង់រំឭកថា យើងមានការខ្វះខាតថវិកាចំនួន ៧ ពាន់លានដុល្លារអាមេរិក ក្នុងមួយឆ្នាំ ដើម្បីប្រយុទ្ធប្រឆាំងនឹងជំងឺអេដស៍នៅក្នុងពិភពលោក។ នេះជាចំនួនថវិកាដែលយើងត្រូវការរកឱ្យបាន។ ហើយដោយសារការអង្គាសរបស់យើង យើងអាចចាត់ចែងថវិកាទាំងនេះដើម្បីប្រយុទ្ធប្រឆាំងនឹងជំងឺអេដស៍បាន»។
ទោះបីជាមានបច្ចេកវិទ្យាជឿនលឿននាពេលថ្មីៗនេះក៏ដោយ ក៏មេរោគហ៊ីវដែលបណ្ដាលឱ្យកើតជំងឺអេដស៍នេះ នៅតែជាសត្រូវដ៏គួរឲ្យខ្លាចមួយដដែល ដោយសារវាមានសមត្ថភាពដែលមិនធ្លាប់មានពីមុនមក នៅក្នុងការបង្កើតភាពស៊ាំនឹងថ្នាំព្យាបាលទាំងនេះ។
ថ្នាំពេទ្យថ្មីៗអាចទប់ទល់ជាមួយនឹងជំងឺនេះបាន ប៉ុន្តែឱសថទាំងនេះមិនអាចរកបាន ឬក៏បើរកបាន មនុស្សភាគច្រើនក៏គ្មានលទ្ធភាពទិញបានដែរ។ អ្នកជំនាញនានា ដូចជាអ្នកស្រី
Linda-Gail Bekker ប្រធានសមាគមអេដស៍អន្តរជាតិ (International AIDS Society) ជាដើម ក៏មានការសង្ស័យអំពីករណីឆ្លងមេរោគហ៊ីវ និងករណីកើតជំងឺអេដស៍ ដែលមិនបានរាយការណ៍ជាច្រើនករណីផងដែរ។
អ្នកស្រី Linda-Gail Bekker បាននិយាយថា៖ «យើងដឹងថាយើងកំពុងព្យាបាលមនុស្ស ១៩ លាន ៥ សែននាក់ ប៉ុន្តែនៅមានមនុស្សចំនួន ១៧ លាននាក់ទៀត ដែលត្រូវការការព្យាបាលនៅពេលឥឡូវនេះ ហើយយើងមិនទាន់បានរកឃើញជនទាំងនោះនៅឡើយនោះទេ។ ជនទាំងនោះភាគច្រើនរស់នៅក្នុងតំបន់នានាក្នុងពិភពលោក ដូចជាទ្វីបអាហ្វ្រិកខាងលិច ទ្វីបអាហ្វ្រិកកណ្ដាល ទ្វីបអឺរ៉ុបខាងកើត និងទ្វីបអាស៊ីកណ្ដាល ដែលយើងមិនទាន់បានទៅដល់។ ហើយនេះគឺជាក្ដីព្រួយបារម្ភយ៉ាងខ្លាំងជាទីបំផុត»។
ក៏ប៉ុន្តែ ទោះជាយ៉ាងណាក៏ដោយ ក៏លោក Michel Sibide នាយកប្រតិបត្តិនៃអង្គការ UNAIDS មានសុទិដ្ឋិនិយមចំពោះបញ្ហានេះ ដោយលោកបាននិយាយថា ដំណើរការប្រយុទ្ធប្រឆាំងនឹងមេរោគហ៊ីវ និងជំងឺអេដស៍នៅទូទាំងពិភពលោកកំពុងមានដំណើរការល្អទៅមុខ៕
ប្រែសម្រួលដោយ ឈឹម សុមេធ
