ក្រុមប៉ូលិសស៊ើបអង្កេតរបស់ថៃបានថ្លែងថា មានមនុស្សរហូតដល់ទៅ២០នាក់មានជាប់ពាក់ព័ន្ធនឹងការវាយប្រហារគ្រាប់បែកកាលពីថ្ងៃសុក្រសប្តាហ៍មុន ហើយថាការស្វែងរកអត្តសញ្ញាណរបស់ជនដៃដល់ទាំងនោះ គឺជាប្រធានាបទដ៏ក្តៅគគុកមួយ។
ប្រភពពីប៉ូលិសបានប្រាប់ VOA ថា មនុស្សយ៉ាងហោចណាស់ ៧នាក់ត្រូវបានចាប់ខ្លួនដើម្បីធ្វើការសាកសួរអំពីការវាយប្រហារទៅលើទីតាំងដែលមានភ្ញៀវទេសចរច្រើន ដែលបានធ្វើឲ្យមនុស្សជាង ៣០នាក់បាត់បង់ជីវិត និងរងរបួស។
រដ្ឋាភិបាលយោធាថៃ ដែលមានឈ្មោះថា ក្រុមប្រឹក្សាជាតិដើម្បីសន្តិភាពនិងសណ្តាប់ធ្នាប់ (NCPO) បានឲ្យដឹងថា ក្រុមអ្នកនយោបាយប្រឆាំងនឹងរដ្ឋាភិបាលយោធា គឺជាអ្នកដែលនៅពីក្រោយការវាយប្រហារដែលបានកើតឡើងចំថ្ងៃបុណ្យខួបកំណើតរបស់មហាក្សត្រីថៃ ដែលជាថ្ងៃបុណ្យជាតិនោះ។
ប៉ុន្តែក្រុមបក្សប្រឆាំង រួមមានគណបក្ស Pheu Thai ដែលត្រូវបានទម្លាក់ពីអំណាចនៅក្នុងរដ្ឋប្រហារកាលពីខែឧសភា ឆ្នាំ២០១៤ និងក្រុម រួបរួមជាតិនាំមុខដើម្បីលទ្ធិប្រជាធិបតេយ្យនិងប្រឆាំងនឹងអំពើផ្តាច់ការ UDD និងអ្នកគាំទ្ររបស់គណបក្សនេះ បានធ្វើការបដិសេធថាមិនមានជាប់ពាក់ព័ន្ធនឹងការដាក់គ្រាប់បែកនេះនោះទេ៕
