ប្រែសម្រួលដោយ ឌី ខាំបូលី
គណៈកម្មាធិការកាកបាទក្រហមអន្តរជាតិ (International Committee of the Red Cross) ឬហៅកាត់ថា ICRC កំពុងអំពាវនាវសុំជំនួយថវិការជិត១,២៥ពាន់លានដុល្លា ដើម្បីថែរក្សាប្រជាពលរដ្ឋរាប់លាននាក់ ដែលជាប់នៅក្នុងជម្លោះប្រដាប់អាវុធ និងស្ថានភាពនៃអំពើហិង្សាផ្សេងៗទៀត នៅជុំវិញពិភពលោក នៅក្នុងឆ្នាំខាងមុខនេះ។ ប្រតិបត្តិការធំបំផុតទាក់ទងនឹងការចំណាយនៅក្នុងឆ្នាំ២០១៣ គឺប្រជាពលរដ្ឋអាហ្វកានីស្ថាន ហើយដូចកាលពីឆ្នាំមុនៗដែរ ទ្វីបអាហ្រ្វិកនឹងត្រូវចំណាយជាង៤០ភាគរយនៃថវិការបស់ ICRC។
គណៈកម្មាធិការកាកបាទក្រហមអន្តរជាតិថ្លែងថា ខ្លួនមើលឃើញលទ្ធភាពតិចតួចណាស់ សម្រាប់ភាពប្រសើរឡើងជាចម្បងៗនៅក្នុងជីវិតរស់នៅប្រចាំថ្ងៃរបស់ប្រជាពលរដ្ឋរាប់លាននាក់ ដែលជាប់នៅក្នុងជម្លោះប្រដាប់អាវុធដ៏ស្មុគស្មាញដែលកំពុងតែកើនឡើង។
លោក ភីតធឺ មូរ័រ (Peter Maurer) ប្រធាន ICRC មានប្រសាសន៍ថា លោកមានការព្រួយបារម្ភយ៉ាងខ្លាំងអំពីអត្រានៃការស្លាប់របស់ជនស៊ីវិលនៃជម្លោះដែលកំពុងតែកើនឡើងនៅក្នុងប្រទេស ស៊ីរ៉ី (Syria) ក៏ដូចជាការប្រយុទ្ធសារជាថ្មី និងការរំលោភបំពានជាច្រើន ដែលបានកើតមានឡើងនៅភាគខាងកើតនៃសាធារណរដ្ឋប្រជាធិបតេយ្យកុងហ្គោ (Democratic Republic of Congo)។
លោកថ្លែងថា ការខ្វះខាតម្ហូបអាហារនិងការបាត់បង់សេវាកម្មមូលដ្ឋាននៅភាគខាងជើងនៃប្រទេស ម៉ាលី កំពុងធ្វើឱ្យប្រជាពលរដ្ឋនៅទីនោះ ទទួលរងគ្រោះកាន់តែខ្លាំងឡើង។
ខណៈដែលការចាប់អារម្មណ៍ជាសាធារណ ត្រូវបានផ្តោតទៅលើចំណុចដ៏ក្តៅគគុកទាំងនេះ ដែលបានក្លាយជាចំណងជើងធំៗរបស់កាសែត លោក មូរ័រ និយាយថា ICRC ក៏កំពុងតែធ្វើការឆ្ពោះទៅរកការកាត់បន្ថយការឈឺចាប់ នៅតាមទីកន្លែងដែលត្រូវបានបំភ្លេចចោលដូចជាប្រទេសហ្វីលីពីន (the Philippines) ម៉ាដាហ្គាស្ការ៍ (Madagascar) និងសាធារណរដ្ឋអាហ្រ្វិកកណ្តាល (Central African Republic)ជាដើម។
លោកថ្លែងថា ការខ្វះខាតលទ្ធភាពនិងភាពអសន្តិសុខកាន់តែខ្លាំងឡើង គឺជាឧបសគ្គយ៉ាងធំធេងចំពោះលទ្ធភាពរបស់ទីភ្នាក់ងារនេះក្នុងការផ្តល់ជំនួយ។ លោកនិយាយថា លទ្ធភាពក្នុងការទទួលបានរបស់ប្រជាពលរដ្ឋដែលកំពុងត្រូវការជំនួយនៅលើពិភពលោក កំពុងតែរួញតូចទៅៗ។
លោកនិយាយថា ករណីជាក់ស្តែងមួយគឺប្រទេស ស៊ីរ៉ី ដែលនៅទីនោះ ជម្លោះកំពុងតែរីកសាយ ហើយលទ្ធភាពក្នុងការចូលទៅដល់ប្រជាពលរដ្ឋ គឺមិនវិវឌ្ឍទៅមុខនោះទេ។
«ការព្រួយបារម្ភជាចម្បងរបស់យើងនៅស៊ីរ៉ី នាពេលបច្ចុប្បន្ននេះ គឺលទ្ធភាពក្នុងការចូលទៅដល់ប្រជាពលរដ្ឋ ដែលកំពុងទទួលរងគ្រោះពីផលប៉ះពាល់នៃសង្រ្គាម។ ប៉ុន្តែ ទោះជាមានការលំបាកទាំងនេះក៏ដោយ យើងនៅតែរក្សាបាននូវសកម្មភាពមនុស្សធម៌សំខាន់ៗនៅក្នុងប្រទេសស៊ីរ៉ីដដែល។ វាជាឧទាហរណ៍មួយសម្រាប់អ្នក កាលពីខែវិច្ឆិកាឆ្នាំមុន យើងនៅតែបន្តចែកចាយគ្រឿបរិក្ខាប្រចាំគ្រួសារចំនួន២ម៉ឺន៤ពាន់ ទាក់ទងទៅនឹងកញ្ចប់ម្ហូបអាហារសម្រាប់ក្រុមគ្រួសារ ដែលមានសមាជិក៥ឬ៦នាក់ ដែលអាចផ្តល់អាហារដល់ក្រុមគ្រួសារទាំងនោះ សម្រាប់រយៈពេលមួយខែ»។
លោក មូរ័រ និយាយថា កិច្ចខិតប្រឹងប្រែងរបស់ ICRC ដើម្បីទស្សនកិច្ចពន្ធនាគារធំៗចំនួន២៥និងកន្លែងឃុំឃាំងដ៏ទៃទៀត នៅស៊ីរ៉ី ត្រូវបានផ្អាក។ ប្រធានកាកបាទក្រហមបានទស្សនកិច្ច ទីក្រុងដាម៉ាស់ (Damascus) នៅក្នុងខែកញ្ញា ដើម្បីស្នើសុំឱ្យបង្កើនលទ្ធភាពក្នុងការចូលទៅមើលអ្នកជាប់ឃុំឃាំង។ ទោះបីជាមានការធានាអះអាងបែបនោះក្តី លោកនិយាយថា ការចរចារទាំងឡាយស្តីពីការទស្សនាគុកនេះកំពុងត្រូវបានអូសបន្លាយ ហើយ ICRC នៅតែរង់ចាំលទ្ធភាពនេះ។
ថវិការបស់ទីភ្នាក់ងារនេះមួយផ្នែកធំបំផុត ត្រូវផ្តល់ទៅឱ្យទ្វីបអាហ្រ្វិក។ សូម៉ាលី (Somali) សាធារណរដ្ឋប្រជាធិបតេយ្យកុងហ្គោ ស៊ូដង់ខាងត្បូង (South Sudan) ស៊ូដង់ (Sudan) និង ម៉ាលី/នីហ្គឺ (Mali/Niger) គឺស្ថិតនៅក្នុងចំណោមបណ្តាប្រទេស ដែលប្រតិបត្តិការមានទំហំធំធេងបំផុត និងចំណាយសោហ៊ុយច្រើនបំផុត ដែលទីភ្នាក់ងារនេះធ្វើការ៕
