រូបថតកុមារម្នាក់ដែលប្រឡាក់ឈាមជោកខ្លួន ដោយសារការទម្លាក់គ្រាប់បែកនៅទីក្រុង Aleppo នៃប្រទេសស៊ីរីនោះ បានទាក់ទាញអារម្មណ៍របស់មនុស្សនៅជុំវិញពិភពលោក តាមរយៈការផ្សព្វផ្សាយតាមបណ្តាញផ្សាយព័ត៌មានធម្មតា និងតាមបណ្តាញសង្គម។
ក្រុមសកម្មជនប្រឆាំងនៃប្រទេសស៊ីរី បានបញ្ចេញរូបថតកុមារម្នាក់ ដែលមានភាពតក់ស្លុត និងនឿយហត់ ពេលដែលខ្លួនអង្គុយនៅលើកៅអីពណ៌ទឹកក្រូចមួយនៃរថយន្តពេទ្យមួយគ្រឿង ដោយមានឈាមនៅលើមុខ និងនៅលើសម្លៀកបំពាក់។
វេជ្ជបណ្ឌិតម្នាក់នៅទីក្រុង Aleppo បាននិយាយថា កុមារអាយុ៥ឆ្នាំនោះមានឈ្មោះថា Omran Dagneesh។ លោកបញ្ជាក់ថាកុមារនោះត្រូវគេដឹកទៅកាន់មន្ទីពេទ្យមួយ ឈ្មោះ «M10» កាលពីយប់ថ្ងៃពុធ ហើយបានទទួលការព្យាបាលរបួសក្បាល មុននឹងអនុញ្ញាតឲ្យចេញពីមន្ទីពេទ្យ។
កុមារនោះបានរងរបួសក្រោយពីការទម្លាក់គ្រាប់បែកមួយលើតំបន់ដែលពួកឧទ្ទាមកាន់កាប់។ វេជ្ជបណ្ឌិតម្នាក់នៅមន្ទីពេទ្យ M 10 បាននិយាយថា មនុស្ស៨នាក់ស្លាប់ ដែលក្នុងនោះមានកុមារ៥នាក់៕
