ប្រធានាធិបតីអ៊ុយក្រែនលោក Volodymyr Zelenskyy បាននិយាយថា លោកសង្ឃឹមថានឹងអាចសន្ទនាតាមទូរស័ព្ទជាមួយនឹងប្រធានាធិបតីអាមេរិកលោក Joe Biden នៅក្នុងរយៈពេលប៉ុន្មានថ្ងៃខាងមុខដើម្បីពិភាក្សាអំពីការអំពាវនាវរបស់អ៊ុយក្រែនឱ្យមានការអញ្ជើញខ្លួនចូលជាសមាជិកអង្គការអូតង់ (NATO)។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។
នៅក្នុងការថ្លែងក្នុងសន្និសីទកាសែតមួយជាមួយនឹងមេដឹកនាំបក្សប្រឆាំងអាល្លឺម៉ង់លោក Friedrich Merz នៅក្នុងប្រទេសអ៊ុយក្រែនកាលពីថ្ងៃចន្ទ លោក Zelenskyy បានបន្ថែមថា វាមានប្រយោជន៍តិចតួចប៉ុណ្ណោះនៅក្នុងការលើកឡើងអំពីបញ្ហានេះជាមួយនឹងប្រធានាធិបតីជាប់ឆ្នោតអាមេរិកលោក Donald Trump ដោយសារតែលោក Trump មិនទាន់ស្បថចូលកាន់តំណែងនៅឡើយ។
លោកបានប្រាប់អ្នកយកព័ត៌មានតាមរយៈអ្នកបកប្រែភាសាថា៖ «ខ្ញុំមានបំណងទូរស័ព្ទទៅប្រធានាធិបតី [អាមេរិកលោក Joe] Biden នៅពេលខាងមុខនេះដើម្បីពិភាក្សាអំពីសំណួរនៃការអញ្ជើញ [អ៊ុយក្រែន] ឱ្យចូលជាសមាជិកអង្គការអូតង់។ លោក [Biden] គឺជាប្រធានាធិបតី [អាមេរិក] បច្ចុប្បន្នហើយវាគឺអាស្រ័យលើទស្សនៈរបស់លោកទាំងស្រុង។ ការពិភាក្សារឿងនេះជាមួយនឹងលោក Trump មុនពេលលោក Trump ចូលកាន់តំណែងគឺមិនទំនងនោះទេ»។
កាលពីថ្ងៃចន្ទនោះផងដែរ លោក Zelenskyy បានបង្ហើបគំនិតនៃការដាក់ពង្រាយកងទ័ពបរទេសនៅអ៊ុយក្រែនរហូតទាល់តែដល់ពេលដែលអ៊ុយក្រែនបានចូលជាសមាជិកអង្គការអូតង់។
លោក Zelenskyy ថ្លែងដូច្នេះថា៖ «កងកម្លាំងមកពីប្រទេសណាមួយអាចមានវត្តមាននៅក្នុងប្រទេសអ៊ុយក្រែនបាន ដរាបណាប្រទេសនោះមិនមែនជាសមាជិកអង្គការអូតង់។ ប៉ុន្តែសម្រាប់រឿងនេះ យើងចាំបាច់ត្រូវដឹងឱ្យបានច្បាស់អំពីថាតើពេលណាអ៊ុយក្រែនអាចក្លាយជាសមាជិករបស់សហភាពអឺរ៉ុបនិងពេលណាអាចក្លាយជាសមាជិកអង្គការអូតង់»។
កន្លងមក អ៊ុយក្រែនបានជំរុញដោយមានការសម្របសម្រួលឱ្យធ្វើយ៉ាងណាបានការអញ្ជើញឱ្យចូលជាសមាជិកអង្គការអូតង់។ ប្រទេសនេះបានទទូចជាច្រើនលើកច្រើនសារក្នុងអំឡុងពេលសង្គ្រាមនេះថាខ្លួនត្រូវការការធានាផ្នែកសន្តិសុខដើម្បីបង្ការរុស្ស៊ីមិនឱ្យធ្វើការឈ្លានពានមួយទៀតនៅពេលណាដែលអរិភាពនៅពេលបច្ចុប្បន្ននេះត្រូវបានបញ្ចប់៕
វេទិកាបញ្ចេញមតិ