ព្យុះ Ida បានធ្វើឲ្យពលរដ្ឋអាមេរិកាំងរាប់លាននាក់នៅក្នុងរដ្ឋ Louisiana ភាគអាគ្នេយ៍សហរដ្ឋអាមេរិកគ្មានអគិ្គសនីនិងទឹកស្អាតប្រើប្រាស់។
បង្គោលអគ្គិសនីដែលតភ្ជាប់ទីក្រុងទេសចរណ៍ New Orleansនិងផ្នែកជាច្រើនទៀតនៃរដ្ឋ Louisiana ភាគខាងត្បូង ត្រូវទទួលរងការខូចខាតឬបំផ្លាញដោយសារខ្យល់ព្យុះ Ida ដែលបានបោកបក់មកលើតំបន់នេះកាលពីថ្ងៃអាទិត្យកន្លងទៅនៅតាមបណ្តោយឆ្នេរសមុទ្ររបស់រដ្ឋមួយនេះក្នុងល្បឿនខ្យល់២៤០គីឡូម៉ែត្រក្នុងមួយម៉ោង ដោយធ្វើឲ្យបង្គោលចែកចាយចរន្តអគ្គិសនីមួយកន្លែងដួលរលំចូលក្នុងទន្លេ Mississippi។
អាជ្ញាធររដ្ឋនិងក្រុមហ៊ុនផ្គត់ផ្គង់ថាមពលក្នុងតំបន់និយាយថា វាអាចប្រើពេលរហូតដល់៣០ថ្ងៃក្នុងការស្តារចរន្តអគ្គិសនីទាំងស្រុងឡើងវិញ ដែលការណ៍នេះធ្វើឲ្យពលរដ្ឋក្នុងតំបន់រងគ្រោះមានការបារម្ភពីការគ្មានម៉ាស៊ីនត្រជាក់ប្រើប្រាស់ និងអាចធ្លាក់ខ្លួនឈឺដែលអាចកើតចេញពីអាកាសធាតុក្តៅហួតហែងនៅចុងរដូវក្តៅនេះ។ អ្នកព្យាករណ៍អាកាសធាតុ បានឲ្យដឹងថា អាកាសធាតុក្តៅ អាចមានក្នុងចន្លោះពី៣២ទៅ៣៧អង្សារសេ។ សាលារៀនត្រូវបានបិទទ្វារដោយគ្មានពេលកំណត់ ហើយមន្ទីរ ពេទ្យជាច្រើនកន្លែងដែលពោរពេញទៅដោយអ្នកជំងឺកូវីដ១៩នោះ កំពុងដំណើរការដោយប្រើប្រាស់ម៉ាស៊ីនភ្លើង។
មន្ត្រីក្នុងទីក្រុងNew Orleans បានបង្កើតមជ្ឈមណ្ឌលគ្រាអាសន្នជាច្រើនកន្លែងជុំវិញទីក្រុងដើម្បីឲ្យពលរដ្ឋទទួលបានកន្លែងត្រជាក់ ទទួលបានម្ហូបអាហារ ទឹក និងសាកថ្មទូរសព្ទដៃរបស់គេផងដែរ។
ពលរដ្ឋក្នុងតំបន់ទាំងមូលបានរង់ចាំក្នុងជួរដ៏វែងអស់ជាច្រើនម៉ោងដើម្បីទិញប្រេងឥន្ធនៈសម្រាប់ចាក់ម៉ាស៊ីនភ្លើងប្រើប្រាស់ក្នុងលំនៅដ្ឋានរបស់ពួកគេ។
ពួកមន្ត្រីថាមពលនិយាយថា អគ្គិសនីត្រូវបានស្តារឡើងវិញខ្លះៗហើយដល់អតិថិជន៨៥.០០០នាក់ កាលពីយប់ថ្ងៃអង្គារ ហើយសេវាមួយចំនួនទៀត អាចត្រូវបានស្តារឡើងវិញនៅក្រុងNew Orleans នៅត្រឹមល្ងាចថ្ងៃពុធ។
នៅខាងក្រៅទីក្រុង New Orleans ឯណោះវិញ កិច្ចខិតខំប្រឹងប្រែងដោយកម្លាំងសមត្ថកិច្ចនិងអ្នកស្ម័គ្រចិត្តកាលពីថ្ងៃអង្គារ កំពុងបន្តជួយសង្គ្រោះអ្នកដែលជាប់នៅក្នុងលំនៅដ្ឋានរបស់ខ្លួនជាច្រើនកន្លែងក្នុងតំបន់លិចទឹក។ តំបន់ជាច្រើនត្រូវបានកាត់ផ្តាច់ដោយសារការដួលរលំដើមឈើនិងកម្ទេចកម្ទីផ្សេងៗទៀតដែលបានបិទផ្លូវ។
យ៉ាងហោចណាស់មានមនុស្ស៤នាក់ បានស្លាប់ដោយសារខ្យល់ព្យុះIdaនេះដែលក្នុងនោះ២នាក់ បានស្លាប់ក្នុងការបាក់ផ្លូវ Highwayដ៏សំខាន់មួយនៅក្នុងរដ្ឋជិតខាងគឺរដ្ឋ Mississippi។
មជ្ឈមណ្ឌលជាតិត្រួតពិនិត្យខ្យល់ព្យុះនិយាយថា ព្យុះIda ត្រូវគេរំពឹងថា នឹងធ្វើការគំរាមកំហែងអាយុជីវិតមនុស្សតាមរយៈការបង្កឲ្យមានទឹកជំនន់ និងខ្សល់គួចនៅទូទាំងរដ្ឋTennessee និងនៅតាមបណ្តារដ្ឋមួយចំនួនផ្សេងៗទៀត ដូចជារដ្ឋ North Carolina រដ្ឋVirginia រដ្ឋMaryland រដ្ឋ Pennsylvania រដ្ឋ New York រដ្ឋ New Jersey និងរដ្ឋ Connecticut ផងដែរ៕
