បាតុកររាប់រយនាក់នាំគ្នាធ្វើបាតុកម្មនៅខាងមុខស្ថានកុងស៊ុលចិននៅក្នុងប្រទេសហ្វីលីពីនកាលពីថ្ងៃច័ន្ទដើម្បីប្រារព្ធខួបទី៥នៃការសម្រេចជាប្រវត្តិសាស្ត្រក្នុងការតម្កល់សិទ្ធិដែនសមុទ្ររបស់ប្រទេសហ្វីលីពីននៅក្នុងសមុទ្រចិនខាងត្បូង។
កាលពីឆ្នាំ២០១៦ តុលាការអាជ្ញាកណ្ដាលអចិន្ត្រៃយ៍របស់អង្គការសហប្រជាជាតិបានសម្រេចជាឯកច្ឆន្ទថាចិនគ្មានមូលដ្ឋានច្បាប់ដើម្បីទាមទារសិទ្ធិភាគច្រើននៅក្នុងសមុទ្រចិនខាងត្បូងនោះទេ។
មេដឹកនាំបាតុកម្មលោក Joshua Mata បានថ្លែងថា៖ «យើងមកទីនេះនៅថ្ងៃនេះដើម្បីប្រារព្ធខួបទី៥នៃជ័យជម្នះរបស់ប្រទេសហ្វីលីពីនអំពីសមុទ្រចិនខាងត្បូង។ ប៉ុន្តែយើងមកទីនេះនៅថ្ងៃនេះក៏ដើម្បីតវ៉ាចំពោះការពិតដែលថាលោកប្រធានាធិបតី Rodrigo Duterte បានបរាជ័យក្នុងការរក្សានិងការពារការសម្រេចរបស់តុលាការទីក្រុងឡាអេកាលពី៥ឆ្នាំមុន»។
ក្រុមបាតុករបានអំពាវនាវឲ្យចិនគោរពតាមសេចក្ដីសម្រេចរបស់តុលាការអន្តរជាតិ។ពួកគេបានលើករូបថតរបស់អតីតប្រធានាធិបតី Benigno Aquino III ដែលបានទទួលមរណភាពទៅហើយនោះដើម្បីរំឭកដល់ «កេរតំណែលស្នេហាជាតិ» ការពារសមុទ្រចិនខាងត្បូងឬពលរដ្ឋហ្វីលីពីនហៅថាសមុទ្រហ្វីលីពីនខាងលិច។
ការទាមទាររបស់ចិនលើដែនសមុទ្រភាគច្រើននៅក្នុងសមុទ្រចិនខាងត្បូងគឺជាន់គ្នាជាមួយនឹងការទាមទាររបស់ប្រទេសហ្វីលីពីន និងប្រទេសចំនួន៤ផ្សេងទៀតនៅក្នុងតំបន់៕
