ភ្ជាប់​ទៅ​គេហទំព័រ​ទាក់ទង

កម្ពុជា​ច្រានចោល​ព័ត៌មាន​របស់​បង់ក្លាដែស​ពី​សុខភាព​លោក​ហ៊ុន សែន

  • ហេង រស្មី

លោក​នាយករដ្ឋមន្ត្រី​ ហ៊ុន សែន នៅ​កោះពេជ្រ រាជធានី​ភ្នំពេញ។ (រូបថត​ឯកសារ)
មន្ត្រី​ជាន់ខ្ពស់​កម្ពុជា​បាន​ច្រាន​ចោល​សេចក្តី​រាយការណ៍​ដែល​ថា​លោក​នាយករដ្ឋមន្ត្រី ​ហ៊ុន សែន​ មាន​ជំងឺ​ហើយ​បាន​វិល​ត្រឡប់​ពីបំពេញ​ទស្សនកិច្ច​នៅ​ក្នុង​ប្រទេស​បង់ក្លាដែស​វិញ​ដោយ​សុខភាព​ល្អ។

កាសែត​បង់​ក្លាដែស​ឈ្មោះ​ថា Banglanews 24​ បានចេញ​ផ្សាយ​កាល​ពី​ថ្ងៃ​អង្គារ​ថា​ លោក​នាយក​រដ្ឋមន្ត្រី​ហ៊ុន សែន​បាន​ធ្លាក់​ខ្លួន​ឈឺ​ហើយ​បាន​លុប​ចោល​កិច្ច​ប្រជុំ​កម្រិត​ខ្ពស់​ជាមួយ​រដ្ឋមន្ត្រីការបរទេស​និង​រដ្ឋ​មន្ត្រី​ក្រសួង​ពាណិជ្ជ​កម្ម​របស់​ប្រទេស​បង់ក្លាដែស។​

លោក​ កៅ គឹម​ហួន​ រដ្ឋមន្ត្រី​ប្រតិភូ​អម​នាយក​រដ្ឋ​មន្ត្រី​មាន​ប្រសាសន៍​បដិសេធ​នៅ​ថ្ងៃ​ពុធ​នេះ​ខណៈ​ដែល​លោក​ហ៊ុន សែន ​បាន​វិល​ត្រឡប់​ពី​បំពេញ​ទស្សនកិច្ច​រយៈ​ពេល​បី​ថ្ងៃ​នៅ​ប្រទេស​បង់​ក្លាដែស​វិញថា​លោក​នាយក​រដ្ឋ​មន្ត្រី​មិន​មាន​ជំងឺ​ទេ​គឺ​លោក​មាន​សុខភាព​ធម្មតា​តែ​ប៉ុណ្ណោះ។​ចំណែក​ឯការ​លុប​ចោល​កិច្ច​ប្រជុំ​កម្រិត​ខ្ពស់​ជាមួយ​នឹង​មន្ត្រី​បង់ក្លា​ដែស​ដោយ​សារ​តែ​មាន​កម្មវិធី​មួយ​ចំនួន​ត្រូវ​បាន​ផ្លាស់​ប្តូរ។

​លោក​ថ្លែង​ថា៖ «អត់​ទេ​ជា​ធម្មតា​កម្មវិធី​តែង​តែ​មាន​ការ​ប្រែប្រួល​ហើយ​កម្មវិធី​ណា​ក៏​ដូច​ជា​កម្មវិធី​ណា​ដែរ។​ហើយ​ការ​ទស្សនកិច្ច​របស់​សម្តេច​តេជោ​ទៅ​ប្រទេស​បង់​ក្លាដែស​ហ្នឹង​មាន​កម្មវិធី​ជាច្រើន​ហើយ​កម្មវិធី​បាន​កែ​សម្រួល​ខ្លះៗ​ទៅ​តាម​ស្ថាន​ភាព​ជាក់​ស្តែង។ ដូច្នេះ​ សម្តេច​តេជោ​ អត់មាន​ឈឺទេ​បាទ»។

​លោកហ៊ុន សែន បាន​ចាកចេញពី​ប្រទេស​កម្ពុជាទៅ​ធ្វើ​ទស្សនកិច្ច​នៅ​ប្រទេស​បង់ក្លាដែស​រយៈពេល​បី​ថ្ងៃ​កាល​ពី​ថ្ងៃ​ច័ន្ទ​ដោយ​អម​ជាមួយ​នឹង​មន្ត្រី​ជាន់​ខ្ពស់​រដ្ឋាភិបាល​មួយ​ចំនួនទៀត។

​នៅ​ក្នុង​ពេល​បំពេញ​ទស្សនកិច្ចលោក​ហ៊ុនសែន​បាន​ចុះ​ហត្ថលេខា​ជាមួយ​លោកស្រី​នាយក​រដ្ឋមន្ត្រី​ បង់ក្លាដែស​ Sheikh Hasina​ លើកិច្ចព្រមព្រៀង​ស្តីពី​ពាណិជ្ជកម្មវិ​និយោគ​និង​វប្បធម៌​និង​ការ​ចុះហត្ថលេខា​លើ​អនុស្សរណៈ​ស្តីពី​កិច្ចសហ​ប្រតិបត្តិការ​កសិកម្ម​ផង​ដែរ។

រដ្ឋមន្ត្រី​ក្រសួង​ការ​បរទេស​បង់​ក្លា​ដែស​លោក​ M Shahriar Alam ​ត្រូវ​កាសែត​ក្នុង​ស្រុក​ស្រង់​សំដី​ថា​លោក​នាយក​រដ្ឋ​មន្ត្រី​ហ៊ុន សែន​មាន​អារម្មណ៍​ថា​មិន​ស្រួល​ខ្លួន​ហើយ​បាន​លុប​ចោល​កិច្ច​ប្រជុំ​នៅ​ពេល​ព្រឹកថ្ងៃ​អង្គារ។ លោក​បញ្ជាក់​ថា៖ «លោក​ ហ៊ុន សែន មិន​ស្រួល​ខ្លួន​ចាប់​តាំង​ពី​យប់​ថ្ងៃ​ច័ន្ទ ​ទោះបី​ជា​គាត់​មិន​មាន​ស្ថានភាព​ធ្ងន់ធ្ងរ​ក៏ដោយ»។​

លោក​ កឹម សុខា​ ប្រធាន​ស្តីទី​គណបក្ស​សង្គ្រោះជាតិ​មាន​ជំនឿ​ថា​អ្វី​ដែល​ជា​ការ​ចុះ​ផ្សាយ​ក្នុង​ទំព័រ​សារព័ត៌មាន​បរទេស​គឺ​ជា​ការ​ពិត។​

លោក​និយាយ​ថា៖​ «ព័ត៌មានដែល​ផ្សាយ​អញ្ចឹង​ហើយ​គួរ​ឱ្យ​ជឿទុក​ចិត្ត​បាន​ពី​ព្រោះ​សារ​ព័ត៌មាន​បរទេស​គេ​មិន​សូវ​និយាយ​អ្វី​ដែល​មិន​ពិត​ទេ។​ហើយ​យើង​ក៏​ដឹង​ហើយ​ថា​កន្លង​មក​ក៏​ធ្លាប់​មាន​ព័ត៌មាន​ដែរ​ប៉ុន្តែ​ពួក​គាត់​បដិសេធ។ ​តែ​ម្តង​នេះ​មិន​ដឹង​ជា​បដិសេធ​យ៉ាង​ម៉េច​ទេ​បើ​កាសែត​គេ​ចេញ​ផ្លូវ​ការ»។​

លោក​ បណ្ឌិត​ ឡៅ ម៉ុង​ហៃ​ អ្នក​វិភាគ​ឯក​រាជ្យ​មាន​ប្រសាសន៍​ថា​លោក​សង្ស័យ​ថា​លោក​នាយក​រដ្ឋមន្ត្រី​ហ៊ុន​ សែន​អាច​មាន​ជំងឺ​ការ​ទូត​ដោយ​សារ​តែ​មាន​កិច្ច​ព្រម​ព្រៀង​ខ្លះ​មិន​ចង់​ចុះ​ហត្ថលេខា។​

លោក​និយាយ​ថា៖​ «អ្នក​នយោបាយ​ជួន​កាល​គេ​មិន​ពេញ​ចិត្ត​ត្រង់​ណា​គេ​ថា​មិន​ស្រួល​ខ្លួន​អញ្ចឹង​ទៅ»។​

​កាល​ពី​សប្តាហ៍​មុន​មាន​ពាក្យ​ចចាមអារ៉ាម​លេច​ឮ​ថា ​លោក​នាយក​រដ្ឋ​មន្ត្រី​ហ៊ុន សែន​មាន​ជំងឺ​ដាច់​សរសៃ​ឈាម​ខួរ​ក្បាលប៉ុន្តែ​លោក​ហ៊ុន សែន ​បាន​ធ្វើ​ប្រតិកម្ម​យ៉ាង​ខ្លាំង​ចំពោះ​ការ​លេច​ឮព័ត៌មាន​ពាក់​ព័ន្ធ​នឹង​សុខភាព​របស់​លោក​ដោយ​លោក​ទំនង​ជាចង់​វាយ​ប្រហារ​ទៅ​លើ​មេដឹក​នាំ​គណបក្ស​ប្រឆាំង​ដោយ​មិន​ចំ​ឈ្មោះ​ថា​ឱ្យ​ត្រៀម​វេច​បង្វិច​ឱ្យហើយ​ទៅ​បើ​លោក​ស្លាប់​ក៏​ដោយនោះ៕
XS
SM
MD
LG