នាយករដ្ឋមន្ត្រីលោក ហ៊ុន សែន បានព្រមានចាប់ខ្លួនលោក សម រង្ស៊ី ប្រធានស្តីទីអតីតគណបក្សសង្គ្រោះជាតិ ប្រសិនបើប្រធានអតីតគណបក្សជំទាស់នេះមកដល់កម្ពុជានោះ។
លោក ហ៊ុន សែន បានព្រមានដូច្នេះ ក្នុងកិច្ចប្រជុំគណៈកម្មាធិការកណ្តាលគណបក្សប្រជាជនកម្ពុជា ក្នុងរាជធានីភ្នំពេញនាថ្ងៃព្រហស្បតិ៍នេះ។ នេះបើតាមការឲ្យដឹងរបស់លោក សុខ ឥសាន អ្នកនាំពាក្យគណបក្សប្រជាជនកម្ពុជា។
«សម្តេចបានលើកឡើងបញ្ហាហ្នឹងដែរ។ គាត់ថា សាលដីកា សាលក្រមតុលាការមានហើយ ដីកាចាប់ខ្លួនមានហើយ គ្រាន់តែឃើញមុខមកគឺថា ឲ្យកូនប៉ូលិសតែពីរនាក់ទៅដាក់ខ្នោះហើយយកទៅដាក់គុកទៅ អាហ្នឹងវាចប់ទៅហើយ»។
ការព្រមាននេះធ្វើឡើងប៉ុន្មានថ្ងៃប៉ុណ្ណោះក្រោយពីលោកសម រង្ស៊ី ដែលកំពុងនិរទេសខ្លួននៅក្រៅប្រទេស បានប្រកាសថា លោកនឹងវិលត្រឡប់ចូលប្រទេសកម្ពុជាវិញនៅថ្ងៃទី៩ខែវិច្ឆិកាខាងមុខ។
លោកស្រី មួរ សុខហ៊ួរ អនុប្រធានអតីតគណបក្សសង្គ្រោះជាតិដែលត្រូវរំលាយមិនបានឆ្លើយតបនឹងសំណួររបស់វីអូអេទាក់ទងនឹងការព្រមានរបស់លោកនាយករដ្ឋមន្ត្រីខ្មែរនោះទេ។
ទោះជាយ៉ាងណាក្នុងបទសម្ភាសន៍ជាមួយវីអូអេពីប្រទេសអូស្ត្រាលី លោក សម រង្ស៊ី បញ្ជាក់ថា លោកនៅតែរក្សាជំហរវិលត្រឡប់មកកាន់ប្រទេសកម្ពុជាដូចការគ្រោងទុក។
ថ្លែងប្រាប់ VOA តាមទូរស័ព្ទនៅលា្ងចព្រហស្បតិ៍នេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា មានប្រសាសន៍ប្រាប់ VOA ថា លោកនាយករដ្ឋមន្ត្រី ហ៊ុន សែនបានប្រាប់សមាជិកគណបក្សចំនួន១០៥៨នាក់ ក្នុងនោះមានសមាជិកគណៈកម្មាធិការកណ្តាលបក្សចំនួន៨៥០នាក់ថា ការត្រៀមវិលត្រឡប់មកវិញរបស់លោក សម រង្ស៊ី មិនបានបង្ហាញសញ្ញាគំរាមកំហែងណាមួយនោះទេ ហើយថា ការចាប់ខ្លួនលោក សម រង្ស៊ី នឹងត្រូវធ្វើឡើងភ្លាមៗ។ ការចាប់ខ្លួននោះអាចធ្វើឡើងដោយ«កូនប៉ូលិសតែ២នាក់»ប៉ុណ្ណោះ។
លោក សម រង្ស៊ី បច្ចុប្បន្នកំពុងរងបណ្តឹងព្រហ្មទណ្ឌជាច្រើនក្នុងប្រទេសកម្ពុជានិងបណ្តឹងរដ្ឋប្បវេណីស្តីពីបទបរិហារកេរ្តិ៍នៅតុលាការបារាំង។
ដោយឡែក ទាក់ទងនឹងកិច្ចប្រជុំគណៈកម្មការកណ្តាលគណបក្សប្រជាជនកម្ពុជាវិញ លោក សុខ ឥសាន អ្នកនាំពាក្យគណបក្សនេះ បន្ថែមថា លោកនាយករដ្ឋមន្ត្រី ហ៊ុន សែន ដែលជាប្រធានគណបក្សកាន់អំណាច បានធ្វើបច្ចុប្បន្នភាពទៅដល់ក្រុមសមាជិកគណបក្សអំពីសភាពការណ៍ទូទៅក្នុងតំបន់ និងពិភពលោក ក្នុងនោះលោក ហ៊ុន សែន ក៏បានលើកពីសន្និបាតអង្គការសហប្រជាជាតិ ការប្រជុំរបស់សមាគមអាស៊ាន ក៏ដូចជាការប្រឈមដាក់គ្នារវាងអាមេរិកនិងចិន ក្នុងបញ្ហាពាណិជ្ជកម្មនិងការត្រៀមចាកចេញរបស់ចក្រភពអង់គ្លេសពីសហភាពអឺរ៉ុបផងដែរ។
លោក សុខ ឥសាន បានបន្ថែមថា លោកនាយករដ្ឋមន្ត្រី ហ៊ុន សែន ក៏បានលើកពីបញ្ហាផ្ទៃក្នុង ដោយបានបរិយាយពីការខិតខំធ្វើកំណែទម្រង់ផ្ទៃក្នុងក្រោយការបោះឆ្នោតជាតិឆ្នាំ២០១៨។
ដំណាលគ្នានេះ លោកនាយករដ្ឋមន្ត្រីខ្មែរក៏បានបញ្ជាក់ជាថ្មីទៀតថា កម្ពុជាមិនអាចយកអធិបតេយ្យភាពជាតិទៅដោះដូរយកជំនួយ ឬការគាំទ្រណាមួយ ដូចយ៉ាងឋានៈអនុគ្រោះពន្ធ«អ្វីៗទាំងអស់លើកលែងតែអាវុធ» ឬហៅថា EBA របស់សភាពអឺរ៉ុប និងប្រព័ន្ធឋានៈអនុគ្រោះពន្ធទូទៅ GSP របស់សហរដ្ឋអាមេរិកនោះទេ៕
