ពីរថ្ងៃក្រោយពីអាជ្ញាធរខេត្តកំពតចាប់ឃុំខ្លួនលោក នុត ពេជ អង្គការការពារសិទ្ធិមនុស្សមួយរបស់សហរដ្ឋអាមេរិកបានអំពាវនាវឲ្យតុលាការកម្ពុជាទម្លាក់ចោលការចោទប្រកាន់លើរូបលោក។ ប៉ុន្តែមន្ត្រីផ្លូវការរបស់រដ្ឋាភិបាលនិយាយថាការអំពាវនាវរបស់អង្គការក្រៅរដ្ឋាភិបាលនេះមិនមានអត្ថន័យគួរពិចារណានោះទេ។
អង្គការឃ្លាំមើលសិទ្ធិមនុស្ស Human Rights Watch បានអំពាវនាវឲ្យអាជ្ញាធរកម្ពុជាទម្លាក់ចោលបទចោទប្រកាន់ប្រឆាំងលោក នុត ពេជ អតីតមន្ត្រីនយោបាយមូលដ្ឋានរបស់គណបក្សសង្គ្រោះជាតិ ដែលទទួលរងការរំលាយចោល។
សកម្មជននយោបាយអាយុ៦៣ឆ្នាំរូបនេះត្រូវអាជ្ញាធរខេត្តកំពតចាប់ខ្លួនកាលពីថ្ងៃទី១៧ខែសីហាក្រោមការចោទប្រកាន់ពីបទមិនអនុវត្តសេចក្តីសម្រេចរបស់តុលាការ (ប្រឆាំងសាលដីការបស់តុលាការកំពូល) ប្រមូលផ្តុំញុះញង់ឲ្យប្រព្រឹត្តបទឧក្រិដ្ឋជាអាទិ៍ ប្រព្រឹត្តនៅស្រុកដងទង់ ខេត្តកំពត កាលពីខែមេសា ឧសភាឆ្នាំ២០១៩។
តុលាការជាន់ខ្ពស់នេះបានសម្រេចរំលាយអតីតគណបក្សសង្គ្រោះជាតិកាលពីឆ្នាំ២០១៧។
ក្នុងសេចក្តីថ្លែងការណ៍របស់ខ្លួនកាលពីល្ងាចថ្ងៃច័ន្ទ អង្គការ Human Rights Watch លើកឡើងថា «អាជ្ញាធរកម្ពុជាគួរទម្លាក់ចោលរាល់ការចោទប្រកាន់ដែលមានជាប់ពាក់ព័ន្ធនឹងរឿងនយោបាយប្រឆាំងលោកនុត ពេជ វ័យ៦៣ឆ្នាំនិងដោះលែងរូបគាត់ដោយគ្មានលក្ខខណ្ឌ»។
កាលពីខែឧសភាកន្លងទៅ សាលាដំបូងខេត្តកំពតបានចេញដីកាតាមចាប់ខ្លួនលោកនុត ពេជ ក្រោយពីលោកជួបជុំបរិភោគនំបញ្ចុកជាមួយសកម្មជននយោបាយរបស់អតីតបក្សសង្គ្រោះជាតិក្រោយពីតុលាការកំពូលចេញសាលដីកាសម្រេចរំលាយគណបក្សជំទាស់នេះចោល។
លោក Phil Robertson នាយករងអង្គការឃ្លាំមើលសិទ្ធិមនុស្សប្រចាំតំបន់អាស៊ី ត្រូវបានគេស្រង់សម្តីក្នុងន័យដើមថា៖ «អាជ្ញាធរកម្ពុជាបានប្រើសកម្មភាពច្រងេងច្រងាងដើម្បីរកការចោទប្រកាន់មកលើលោកនុត ពេជ ដែលគា្រន់តែអនុវត្តសិទ្ធិមូលដ្ឋានរបស់គាត់ដើម្បីសេរីភាពបញ្ចេញមតិ និងការជួបជុំប៉ុណ្ណោះ»។
លោកជិន ម៉ាលីន អ្នកនាំពាក្យក្រសួងយុត្តិធម៌ វាយបកទៅអង្គការឃ្លាំមើលសិទ្ធិមនុស្សវិញថា សេចក្តីថ្លែងការណ៍របស់អង្គការនេះគ្មានតម្លៃណាមួយដែលអាចយកមកពិចារណាក្នុងប្រព័ន្ធយុត្តិធម៌កម្ពុជានោះទេ។
«បើសិនជាគាត់ចង់ជួយអ្នកទាំងអស់នេះគឺមានតែចូលរួមក្នុងដំណើរការនីតិវិធីតុលាការ ហើយធ្វើការការពារក្តីតាមផ្លូវច្បាប់ទៅដើម្បីបញ្ជាក់ថា សកម្មជនមិនបានធ្វើសកម្មភាពបំពានសាលដីការបស់តុលាការ ឬមួយក៏មិនមានពិរុទ្ធដូចអ្វីដែលគេចោទនោះទេ បាទ»។
រហូតមកទល់ពេលនេះ ចំនួនអតីតសកម្មជននយោបាយគណបក្សសង្គ្រោះជាតិបានកើនដល់ចំនួន១៥៦នាក់ហើយដែលត្រូវតុលាការក្នុងខេត្តមួយចំនួនកោះហៅដើម្បីសាកសួរទាក់ទងនឹងការចោទប្រកាន់អំពីការរំលោភលើសាលដីការំលាយគណបក្សប្រឆាំង។
លោកអំ សំអាត នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ (Licadho) បានប្រាប់ VOA បន្ថែមនៅថ្ងៃអង្គារនេះថា មានអ្នកគាំទ្រគណបក្សប្រឆាំង១០នាក់ត្រូវបានចាប់ខ្លួនដោយសារការជួបជុំថ្លែងសារនយោបាយ គាំទ្រក្រុមមេដឹកនាំអតីតគណបក្សប្រឆាំង ដោយសារនយោបាយខ្លះផ្តោតសំខាន់លើការវិលត្រឡប់មកវិញរបស់លោកសម រង្ស៊ី អតីតប្រធានគណបក្សសង្គ្រោះជាតិដែលត្រូវបានរំលាយ។
«ទោះបីជាយើងឃើញថា សហគមន៍អឺរ៉ុបដែលគេដាក់បានន័យថា គេសុំឲ្យកម្ពុជាយើងស្តារឡើងវិញលទ្ធិប្រជាធិបតេយ្យ សិទ្ធិមនុស្សក្នុងហ្នឹងបានលើកឡើងអំពីការធ្វើទុក្ខបុកម្នេញទៅអតីតគណបក្សប្រឆាំងហ្នឹងផងដែរក៏ដោយ ក៏ប៉ុន្តែអាករណីនេះយើងឃើញថា នៅតែមានការកើតឡើងបន្តទៅទៀត»។
លោកស៊ឹង សែនករុណា អ្នកនាំពាក្យសមាគមសិទ្ធិមនុស្សអាដហុក មានប្រសាសន៍ថា សកម្មភាពរបស់លោកនុត ពេជមិនគួររងការធ្វើបាបពីអាជ្ញាធរកម្ពុជានោះទេ ដោយសារតែអតីតមន្ត្រីគណបក្សប្រឆាំងរូបនេះ អនុវត្តសិទ្ធិនយោបាយរបស់លោកតែប៉ុណ្ណោះ៕
