លោកនាយករដ្ឋមន្រ្តី ហ៊ុន សែន បានបញ្ជាក់សារជាថ្មីនៅថ្ងៃអង្គារថា កម្ពុជាត្រូវតែអនុម័តច្បាប់មួយចំនួនដែលចាំបាច់ និងដែលមាននៅក្នុងផែនការដោយមិនបង្អង់ឡើយ។
ការប្រកាសរបស់លោកនាយករដ្ឋមន្ត្រីបានធ្វើឡើង ក្រោយពីមានប្រតិកម្មរិះគន់ជាបន្តបន្ទាប់ពីអង្គការសង្គមស៊ីវិល និងស្ថានទូតបរទេសឱ្យព្យួរច្បាប់ដ៏ចម្រូងចម្រាសដើម្បីគ្រប់គ្រងអង្គការសង្គមស៊ីវិល ឬក៏ត្រូវបើកចំហរឱ្យមានការពិភាក្សាគ្នាលម្អិតថែមទៀត។
លោក ហ៊ុន សែន បញ្ជាក់ថា សង្គមស៊ីវិល និងអង្គទូតមិនមែនជាអ្នកអនុម័តច្បាប់នោះទេ ក៏ប៉ុន្តែលោកថា រដ្ឋាភិបាលស្វាគមន៍នឹងការចូលរួមជាយោបល់។
«យើងនឹងបន្តចេញច្បាប់តាមផែនការរបស់យើង ព្រោះមានតែរដ្ឋសភាទេដែលមានសិទ្ធិអនុម័តច្បាប់ មិនមែនអង្គការក្រៅរដ្ឋាភិបាល ឬទូតបរទេសនោះទេដែលមានសិទ្ធិអនុម័តច្បាប់នោះ»។
រហូតមកដល់ពេលនេះ សំណៅចុងក្រោយនៃសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលមិនត្រូវបានចែកចាយឱ្យអង្គការសង្គមស៊ីវិលបានឃើញនៅឡើយទេ។ សេចក្តីព្រាងចុងក្រោយ ដែលបានចែកចាយឱ្យអង្គការសង្គមស៊ីវិលមើល គឺមានសំណៅតាំងពីឆ្នាំ២០១១ ដែលមាន៣៤មាត្រា ហើយមានលក្ខណៈតឹងរឹងតិចតួច។ ប៉ុន្តែយោងតាមសំណៅចុងក្រោយដែល VOA ទទួលបានមានរហូតដល់ទៅចំនួន៥៨មាត្រា ដែលអ្នកជំនាញមើលឃើញថា អាចនឹងមានបញ្ហាលើការតម្រូវដ៏ស្មុគស្មាញលើនីតិវិធីចុះឈ្មោះ ការធ្វើរបាយការណ៍ហិរញ្ញវត្ថុ និងផែនការសកម្មភាពជាដើម។
ទន្ទឹមគ្នានោះដែរ ក៏មានអង្គភាពរដ្ឋមួយចំនួនចូលរួមពាក់ព័ន្ធនឹងការចុះបញ្ជី និងតាមដានការងាររបស់អង្គការក្រៅរដ្ឋាភិបាល ក្នុងនោះរួមមានដូចជា ក្រសួងមហាផ្ទៃ ឬស្ថាប័នរដ្ឋបាលថ្នាក់ក្រោមជាតិ ក្រសួងការបរទេស ក្រសួងសេដ្ឋកិច្ចនិងហិរញ្ញវត្ថុ អាជ្ញាធរសវនកម្មជាតិ និងក្រុមប្រឹក្សាអភិវឌ្ឍន៍កម្ពុជាជាដើម។
មាត្រាទី៤៤នៃសេចក្តីព្រាងច្បាប់នេះបានបើកផ្លូវឱ្យដាក់ទោសទណ្ឌសមាគម ឬអង្គការមិនមែនរដ្ឋាភិបាល ដែលប្រព្រឹត្តល្មើសលក្ខន្តិកៈ ឬអនុស្សរណៈក្រសួងមហាផ្ទៃ ឬស្ថាប័នរដ្ឋបាលថ្នាក់ក្រោមជាតិ ឬក្រសួងការបរទេសទៅតាមច្បាប់នៃប្រទេសកម្ពុជា។
លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណរដ្ឋមន្ត្រី បានបញ្ជាក់ប្រាប់វីអូអេនៅថ្ងៃអង្គារថា ច្បាប់នេះកំពុងស្ថិតនៅក្នុងដៃរបស់ក្រសួងមហាផ្ទៃ ដើម្បីកែសម្រួលពាក្យពេចន៍មួយចំនួននៅឡើយ ហើយមិនទាន់មកដល់ទីស្តីការគណរដ្ឋមន្ត្រីដើម្បីពិនិត្យមើលទេ។ លោកសង្ឃឹមថានឹងអាចមកដល់នៅពេលណាមួយឆាប់ៗនេះ ដែលនឹងទាន់ពេលដាក់ជូនអង្គប្រជុំគណរដ្ឋមន្ត្រីពិភាក្សានៅថ្ងៃសុក្រសប្តាហ៍ក្រោយ ដើម្បីឱ្យបានចេញរួចតាមការចង់បានរបស់រដ្ឋាភិបាលកម្ពុជានៅមុនដំណាច់ខែឧសភា។
លោក ផៃ ស៊ីផាន ស្នើឱ្យអង្គការសង្គមស៊ីវិលព្រមទទួលយកច្បាប់នេះជាជាងការប្រឆាំង៖
«ការព្រួយបារម្ភរបស់អង្គការសង្គមស៊ីវិលហាក់បីដូចជាឆាប់ពេកក្នុងការព្រួយបារម្ភហើយក៏ វាក្លាយទៅជាទម្លាប់មួយ ដែលសង្គមស៊ីវិលមិនដែលឱ្យតម្លៃច្បាប់ណាមួយទេ មិនមែនច្បាប់សង្គមស៊ីវិលនេះសូម្បីតែច្បាប់ប្រឆាំងអំពើពុករលួយ។ សូម្បីតែ ចូលទៅក្នុងអាស៊ានក៏គាត់មិនឱ្យតម្លៃដែរ ដូច្នេះសង្គមស៊ីវិលទាំងនោះត្រូវពិចារណាជំហររបស់ខ្លួនឯង ថាតើជាអង្គការដើម្បីប្រឆាំងនឹងរាជរដ្ឋាភិបាល ឬជាដៃគូរាជរដ្ឋាភិបាល? នេះត្រូវពិចារណាសារជាថ្មី។ ហើយការភ័យខ្លាចថាច្បាប់ហ្នឹងទៅគ្រប់គ្រងសង្គមស៊ីវិល គឺមិនមានអញ្ចឹងទេ ប៉ុន្តែច្បាប់បង្ហាញអំពីវប្បធម៌អំពីការទទួលខុសត្រូវរបស់សង្គមស៊ីវិល»។
អង្គការសង្គមស៊ីវិលក្នុងស្រុក និងអន្តរជាតិបានសម្តែងការជំទាស់នឹងការចេញច្បាប់ស្តីពីសមាគម និងអង្គការមិនមែនរដ្ឋាភិបាល ហើយព្រមានឲ្យដឹងកាលពីដើមខែនេះថា ការអនុម័តច្បាប់នេះដោយមិនមានការចូលរួមពិគ្រោះយោបល់ពីអង្គការពាក់ព័ន្ធវានឹងអាចធ្វើឲ្យមានផលប៉ះពាល់ដល់ការអភិវឌ្ឍន៍សេដ្ឋកិច្ច និងសង្គមជាតិទាំងមូល។
ពួកគេលើកឡើងថា ច្បាប់នេះនឹងប៉ះពាល់ដល់គម្រោងជាង៤ពាន់របស់អង្គការសង្គមស៊ីវិលនានា ដែលកំពុងអនុវត្តន៍នាពេលបច្ចុប្បន្ន។ ជាងនេះទៀតវាអាចធ្វើឲ្យមនុស្សជាង១លាននាក់ប្រឈមនឹងការបាត់បង់ការងារធ្វើ៕
