លោកនាយករដ្ឋមន្រ្តី ហ៊ុន សែន ប្រកាសថា លោកនឹងធ្វើដំណើរទៅចូលរួមកិច្ចប្រជុំអាស៊ាននៅទីក្រុងហ្សាការតា ប្រទេសឥណ្ឌូណេស៊ី នៅសប្តាហ៍ក្រោយ ដែលទំនងពិភាក្សាអំពីស្ថានភាពនយោបាយក្នុងប្រទេសមីយ៉ាន់ម៉ា។
លោក ហ៊ុន សែន បានបង្ហោះសារនៅលើហ្វេសប៊ុករបស់លោកនៅថ្ងៃសុក្រនេះថា លោកនឹងធ្វើ ដំណើរទៅទីក្រុងហ្សាការតា នៅថ្ងៃទី ២៤ ខែមេសា ដើម្បីចូលរួមកិច្ចប្រជុំអាស៊ាន ដែលលោកថាជា «ភារកិច្ចខានមិនបាន»។ ប៉ុន្តែលោកមិនបានបញ្ជាក់ថាជាកិច្ចប្រជុំអ្វីនោះទេ។
លោក កុយ គួង អ្នកនាំពាក្យក្រសួងការបរទេសកម្ពុជា មិនទាន់អាចបញ្ជាក់ព័ត៌មានអំពីកិច្ចប្រជុំនោះទេ ដោយប្រាប់ឲ្យរង់ចាំសេចក្តីប្រកាសព័ត៌មានរបស់ក្រសួងការបរទេសនាពេលក្រោយ។
កាលពីថ្ងៃទី ៥ ខែមេសា ប្រទេសព្រុយណេដែលជាប្រធានអាស៊ាននៅឆ្នាំនេះ បានគាំទ្រជំនួបរបស់មេដឹកនាំអាស៊ាន ដើម្បីពិភាក្សាអំពីស្ថានការណ៍នៅក្នុងប្រទេសមីយ៉ាន់ម៉ា និងបានបញ្ជាក់ថា ខ្លួនបានស្នើឲ្យក្រុមមន្ត្រីត្រៀមរៀបចំកិច្ចប្រជុំមួយនៅក្នុងរដ្ឋធានីហ្សាការតា ប្រទេសឥណ្ឌូណេស៊ី។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
វិបត្តិនយោបាយនៅក្នុងប្រទេសមីយ៉ាន់ម៉ាបានកើតឡើងចាប់តាំងពីថ្ងៃទី ១ ខែកុម្ភៈ នៅពេលដែលយោធាធ្វើរដ្ឋប្រហារ ហើយមនុស្សរាប់រយនាក់ត្រូវបានសម្លាប់នៅក្នុងការបង្ក្រាបរបស់កងកម្លាំងសន្តិសុខលើការតវ៉ានៅទូទាំងប្រទេស។
ដោយសារដំណើរទៅក្រៅប្រទេសនេះចំពេលការរាតត្បាតជំងឺកូវីដ១៩ លោក ហ៊ុន សែន ឲ្យដឹងថាលោកត្រូវប្តូរថ្ងៃចាក់វ៉ាក់សាំងលើកទី ២ របស់លោក ដែលដើមឡើយកំណត់ចាក់នៅថ្ងៃទី ២៩ ខែមេសា មកថ្ងៃទី ២០ ខែមេសាវិញ។ លោកបន្ថែមថា លោកក៏ត្រូវយកសំណាកនៅថ្ងៃទី ២៣ ខែមេសា ដើម្បីបញ្ជាក់សុខភាពរបស់លោកថា មិនមានជំងឺកូវីដ១៩ ឲ្យអាជ្ញាធរសុខាភិបាលឥណ្ឌូណេស៊ី។
បើតាមលោក ហ៊ុន សែន នៅពេលបញ្ចប់កិច្ចប្រជុំអាស៊ាន លោកនឹងត្រឡប់មកភ្នំពេញវិញភ្លាម។
គួរបញ្ជាក់ថា លោក ហ៊ុន សែន មិនបានធ្វើដំណើរទៅក្រៅប្រទេសជាងមួយឆ្នាំមកហើយ ក្នុងពេលពិភពលោកកំពុងប្រឈមនឹងជំងឺកូវីដ១៩។ លោកបានធ្វើដំណើរទៅទីក្រុងប៉េកាំង ប្រទេសចិន កាលពីខែកុម្ភៈ ឆ្នាំមុន ក្នុងពេលប្រទេសចិនកំពុងប្រឈមការឆ្លងជំងឺកូវីដ១៩ ធ្ងន់ធ្ងរ៕
