ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ហ៊ុន សែន រំពឹង​ខាតបង់​ថវិកា​ជាតិ​ជាង​១០០​លាន​ដុល្លារ ដោយសារ​ទប់​ការឡើង​ថ្លៃ​អគ្គិសនី


រូបឯកសារ៖ នាយករដ្ឋមន្ត្រីកម្ពុជាលោក ហ៊ុន សែន ថ្លែងក្នុងពិធីគម្រប់ខួប ៧១ ឆ្នាំនៃការបង្កើតគណបក្សប្រជាជនកម្ពុជា នៅរាជធានីភ្នំពេញ កាលពីថ្ងៃទី ២៨ ខែមិថុនា ឆ្នាំ ២០២២។

លោក​នាយក​រដ្ឋមន្ត្រី ហ៊ុន សែន​ នៅ​ថ្ងៃ​ពុធ​នេះ បាន​អះអាង​ថា ​រដ្ឋាភិបាល​រំពឹង​ខាត​បង់​ប្រាក់​ជាង​១០០​លាន​ដុល្លារ​អាមេរិក​នៅ​ឆ្នាំ​នេះ ដើម្បី​ទប់​ទល់​នឹង​ការ​មិន​បង្កើន​តម្លៃ​អគ្គិសនី​ក្នុង​ប្រទេស ខណៈ​ការ​ផលិត​អគ្គិសនី​ត្រូវ​ការ​ចំណាយ​ប្រាក់​បន្ថែម ដោយ​សារ​រង​ផល​ប៉ះពាល់​ពី​សង្រ្គាម​នៅ​អ៊ុយ​ក្រែន។

លោក​នាយក​រដ្ឋមន្រ្តី​ក៏​បាន​អំពាវនាវ​ឱ្យ​សន្សំ​សំចៃ​ទៅ​លើ​ការ​ប្រើ​ប្រាស់​អគ្គិសនី បើ​ទោះ​លោក​មិន​ទាន់​ព្រមាន​អំពី​ហានិភ័យ​នៃ​កង្វះ​ខាត​អគ្គិសនី​ក្នុង​ប្រទេស​កម្ពុជា​ទៅ​ថ្ងៃ​ខាង​មុខ​ក៏​ដោយ។ លោក ហ៊ុន សែន បាន​ថ្លែង​បែប​នេះ​នៅ​ក្នុង​ពិធី​សំណេះ​សំណាល​ជា​មួយ​គណៈ​ប្រតិ​ភូ​កីឡា អា​ស៊ាន​ប៉ា​រ៉ា​ហ្គេម (ASEAN Para Games) នៅ​ព្រឹក​ថ្ងៃ​ទី​៦ ខែ​កក្កដា ឆ្នាំ​២០២២ ស្រប​ពេល​ដែល​វិបត្តិ​សង្គ្រាម​រុស្ស៊ី និង​អ៊ុយ​ក្រែន កំពុង​តែ​ឡើង​កម្តៅ ហើយបាន​និង​កំពុង​ជះ​ឥទ្ធិ​ពល​យ៉ាង​អាក្រក់​ដល់​សេដ្ឋ​កិច្ច​ពិភព​លោក ជា​ពិសេស​តម្លៃ​ប្រេង​សាំង​ហក់​ឡើង​យ៉ាង​គំហុក។

បើ​តាម​លោក ហ៊ុន សែន រដ្ឋាភិបាល​រំពឹង​ខាត​បង់​ប្រាក់​ជាង​១០០​លាន​ដុល្លារ​អាមេរិក​នៅ​ក្នុង​ការ​ផ្គត់​ផ្គង់​អគ្គិសនី ដោយ​សារ​មិន​មាន​ការ​ដំឡើង​ថ្លៃ​នា​ពេល​នេះ បើ​ទោះ​ត្រូវ​ចំណាយ​ច្រើន​ក្នុង​ការ​ផលិត​អគ្គិសនី។

លោក ហ៊ុន សែន ថ្លែង​ថា៖ «បើ​សិន​រាជ​រដ្ឋា​ភិបាល​គិត​តែ​ពីរឿង​ប្រាក់​ចំណេញ​របស់​អគ្គិសនី មក​ដល់​ពេល​នេះ​ប្រជាពល​រដ្ឋ​ប្រើ​អគ្គិសនី​ថ្លៃ​មួយ​ជា​ពី​ររួច​ស្រេច​ទៅ​ហើយ»។

លោក ហ៊ុន សែន ក៏​បាន​អំពាវ​នាវ​ឲ្យ​ស្ថាប័ន​រដ្ឋ​ប្រើ​ប្រាស់​ភ្លើង ដោយ​សន្សំ​សំចៃ​នា​ពេល​នេះ។ ទោះ​ជា​យ៉ាងណា លោក​នាយករដ្ឋមន្រ្តី​បាន​លើក​ឡើង​អំពីកម្រិត​ទឹក​ភ្លៀង​ច្រើន​ក្នុង​ប្រទេស ដែល​នាំ​ឲ្យ​កម្ពុជា​អាច​ផលិត​ថាម​ពល​អគ្គិសនី​បាន តាម​រយៈ​ទំនប់​វារី​អគ្គិសនី​ក្នុង​ប្រទេស។

លោក​ថ្លែង​ថា៖ «ឆ្នាំ​នេះ​ចេះ​ទេវតា​ជួយ​យើង។ នៅ​ត្រង់​ថា​ភ្លៀង​ច្រើន​ ទឹក​ចូល​អាង​វារីអគ្គិសនី​យើង​បាន​ដើរ បូក​ជាមួយ​នឹង​ពន្លឺ​ព្រះអាទិត្យ យើង​កាត់​បន្ថយ​បាន​ចំនួន​ខាត​បង់​មួយ​ចំនួន»។

ប្រទេស​កម្ពុជា​ពឹង​ផ្អែក​លើ​ការ​ផលិត​អគ្គិសនី ដែល​បាន​មក​ពី​ទំនប់​វារី​អគ្គិសនី និង​ការ​ដុត​ធ្យូង​ថ្ម ដែល​មាន​ប្រមាណ​៨០%​នៃ​ទំហំ​ថាម​ពល​ប្រើប្រាស់​សរុប​ក្នុង​ប្រទេស ក្នុង​រយៈ​ពេល​មួយ​ឆ្នាំ។

បើ​តាម​លោក ហ៊ុន​ សែន ប្រទេស​តូច​ដូច​ជា​កម្ពុជា​មិន​មាន​ឥទ្ធិពល ដើម្បី​ឱ្យ​ប្រទេស​ធំៗ​ពិចារណា​ពី​ការ​ឈប់​ដាក់​ទណ្ឌកម្ម​ឡើយ។ លោក​បន្ថែម​ថា​ នៅ​ពេល​ទណ្ឌកម្ម​ត្រូវ​បាន​ដាក់​រវាង​ប្រទេស​មហា​អំណាច​ នោះ​វា​ក៏​បាន​ធ្វើ​ឱ្យ​ប៉ះពាល់​ជា​អវិជ្ជមាន​ដល់​សេដ្ឋកិច្ច​ប្រទេស​តូចៗ​ផង​ដែរ។

លោក​បន្ថែម​ថា៖ «អ៊ីចឹង​ចំណុច​នេះ លទ្ធផល​វា​បាន​ឃើញ​ហើយ។ តើ​សង្គ្រាម​រុស្ស៊ី​និង​អ៊ុយ​ក្រែន​វា​ដល់​ណា​ចប់ ហើយ​អា​មធ្យោបាយ​ទណ្ឌកម្ម​ពេល​ណា​ទើប​វា​ចប់? ទណ្ឌកម្ម​វា​មិន​ខុស​គ្នា​ជាមួយ​ហ្នឹង​ការ​ដែល​យើង​បិទ​ទ្វារ។ ​យើង​ក៏​ចេញ​មិន​បាន គេ​ក៏​ចូល​មិន​បាន»។

មេដឹក​នាំ​សហភាព​សហជីព​កម្ពុជា​ លោក រ៉ុង ឈុន ប្រាប់​វីអូអេ​ថា ​តម្លៃ​ប្រេង​ឡើង​ថ្លៃ​បង្ក​កា​រលំ​បាក​យ៉ាង​ខ្លាំង​ដល់​ប្រជាពល​រដ្ឋ​ខ្មែរ​ ជាពិសេស​ពល​រដ្ឋ​ដែល​មាន​ចំណូល​តិច​តួច។ លោក​ស្នើ​ឱ្យ​រដ្ឋាភិបាល​កម្ពុជា​កាត់​បន្ថយ​ពន្ធ​លើ​ការ​នាំ​ចូល​ប្រេង​ឥន្ធនៈ និង​បញ្ចេញ​កញ្ចប់​ថវិកា​ជាតិ​ ដើម្បី​ទប់​ស្កាត់ និង​បញ្ចុះ​តម្លៃ​ប្រេង​ឥន្ធនៈ​ត្រឹម​តម្លៃ​មួយ​សមរម្យ ក្នុង​ការ​សម្រួល​ដល់​ការ​ប្រើប្រាស់​ និង​ជីវភាព​រស់​នៅ​របស់​ប្រជាពលរដ្ឋ។ មេដឹកនាំ​សហជីព​រូប​នេះ​ជំរុញ​ឱ្យ​រដ្ឋាភិបាល​មាន​ចំណាត់​ការ​បន្ថែម​ទៀត​ បើ​ទោះ​ជា​រដ្ឋា​ភិបាល​អះអាង​ថា ​រដ្ឋ​បាន​ចំណាយ និង​ខាតថវិកា​យ៉ាង​ច្រើន​ទៅ​លើ​ការ​ផលិត​ថាម​ពល​អគ្គិសនី​ក៏​ដោយ។

លោក​ថ្លែង​ថា៖ «ក៏​ប៉ុន្តែ​យើង​ក្នុង​នាម​ជា​អ្នក​ដឹកនាំ​នៃ​ប្រទេស​មួយ​ត្រូវ​តែ​គិត​គូរ​ធ្វើ​ម៉េច ដើម្បី​ឱ្យ​មាន​ការ​ទប់​ទល់​ រក​វិធី រក​វិធាន​ដោះ​ស្រាយ​ជូន​ប្រជាពល​រដ្ឋ។ យើង​មិន​ត្រូវ​ទុក​ឱ្យ​ចេះ​តែ​ឡើង​តាម​អំពើ​ចិត្ត​នោះ​ទេ»។

អ្នក​ជំនាញ​សេដ្ឋកិច្ច​នៃ​រាជបណ្ឌិត្យ​សភា​កម្ពុជា ដែល​ជា​ស្ថាប័ន​របស់​រដ្ឋាភិបាល លោកបណ្ឌិត គី សេរីវឌ្ឍ ថ្លែង​ថា​ ការ​ដែល​រដ្ឋាភិបាលមិន​ដំឡើង​ថ្លៃ​អគ្គិសនី​ ហើយ​សុខ​ចិត្ត​ខាត​បង់​ថវិកា​ជាតិ គឺជា​ឧបត្ថម្ភ​ធន​មួយ។ ទោះ​ជាយ៉ាង​ណា លោក​ថា​ដើម្បី​ទប់​ស្កាត់​កុំ​ឱ្យ​មាន​បញ្ហា​កង្វះ​ថាម​ពល​អគ្គិសនី រដ្ឋាភិបាល​គួរ​តែ​ដំឡើង​ថាម​ពល​ដែល​ដើរ​ដោយ​ពន្លឺ​ព្រះអាទិត្យ ឬ​ហៅ​ថា​សូឡា ក៏ដូច​ជា​ថាម​ពល​ខ្យល់​ឱ្យ​បាន​ច្រើន។

លោក​ប្រាប់​វីអូអេ​នៅ​ថ្ងៃ​ពុធ​នេះ​ថា៖ «ដោយ​សារ​តែ​កា​រប្រើប្រាស់​ប្រេង ហើយ​និង​ការ​ទិញ​អគ្គិសនី​ពី​ប្រទេស​ជិត​ខាង​នៅ​មាន​កម្រិត​ដែល​យើង​មិន​អាចគ្រប់​គ្រង​បាន ការ​ប្រើប្រាស់​សូឡា ហើយ​នឹង​ថាម​ពល​ខ្យល់ វា​អាច​ជួយ​ឱ្យ​កម្ពុជា​អាច​នឹង​បង្គ្រប់​នូវ​អគ្គិសនី ដែល​យើង​កំពុង​តែ​ប្រើ​ប្រាស់ ដែល​យើង​កំពុង​តែ​មាន​ការ​ខ្វះ​ខាត»។

គួរ​បញ្ជាក់​ថា ​តម្លៃ​ប្រេង​សាំង​បាន​បន្ត​ហក់​ឡើង​ខ្ពស់​ក្នុង​រយៈ​ពេល​ប៉ុន្មាន​ខែ​ចុង​ក្រោយ​នេះ​ គឺ​ក្រោយ​ការ​ផ្ទុះ​សង្គ្រាម​នៅ​ប្រទេស​អ៊ុយក្រែន​ កាល​ពី​ខែ​កុម្ភៈ​ ឆ្នាំ​២០២២៕

XS
SM
MD
LG