ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ហ៊ុន សែន​ រិះគន់​មេដឹកនាំ​សិង្ហ​បុរី​ខ្លាំងៗ​អំពី​អត្ថាធិប្បាយ​ពី​តួនាទី​កងទ័ព​វៀតណាម​នៅ​កម្ពុជា


រូបឯកសារ៖ លោកនាយករដ្ឋមន្ត្រី ហ៊ុន សែន ថ្លែងនៅក្នុងពិធីសម្ពោធគម្រោងការពារទឹកជំនន់ក្រោមការឧបត្ថម្ភពីប្រទេសជប៉ុន នៅរាជធានីភ្នំពេញ ថ្ងៃទី៤ ខែមីនា ឆ្នាំ២០១៩។ (រូបថត Reuters)

លោក​​នាយក​រដ្ឋមន្ត្រី ហ៊ុនសែន​​​ចាត់​ទុកថា​ ការ​លើក​ឡើង​បែប​នេះ​បង្ហាញ​ថា​ កាល​នោះ​សិង្ហបុរី​ បាន​គាំ​ទ្រ​របប​ប្រល័យ​ពូជសាសន៏​ និង​ចង់​ឲ្យ​របប​ប្រល័យ​ពូជ​សាសន៏​វិល​ត្រឡប់​មក​កម្ពុជា​វិញ​ដែរ។

មេដឹកនាំ​កម្ពុជា​លោក​នាយក​រដ្ឋមន្ត្រី ​ហ៊ុន​ សែន​នៅ​ថ្ងៃសុក្រ​នេះ​ បាន​ថ្លែង​ថា លោក​លី​ ស៊ានឡុង (Lee Hsien Loong) មេដឹកនាំ​សិង្ហបុរី​ គឺជាអ្នកគាំទ្រ​របប​ប្រល័យ​ពូជសាសន៍​ខ្មែរក្រហម​ ដោយ​សារ​អត្ថាធិប្បាយ​របស់​លោក​ដែល​ថា​ កងទ័ព​វៀតណាម​ បាន​ឈ្លានពាន​ប្រទេស​កម្ពុជា​ ក្នុងពេល​វាយ​ផ្តួល​រំលំ​កងទ័ព​ខ្មែរ​ក្រហម​របស់​ប៉ុល​ ពត​ដែល​ជាមេដឹកនាំ​របបកម្ពុជា​ប្រជាធិបតេយ្យ​ពីឆ្នាំ​១៩៧៥​ដល់​ឆ្នាំ​១៩៧៩​។

លោក​ហ៊ុន សែន​ ដែល​ជា​អតីត​ទាហាន​ខ្មែរ​ក្រហម​ បានរំឭកឡើង​អំពី​អត្ថាធិប្បាយ​របស់​លោក​ Lee ​លើ​ទំព័រ​ហ្វេសប៊ុក​របស់​លោក​ថា​ ​លោក​ Lee ​បាន​បង្ហោះ​តាម​ទំព័រ​ ហ្វេស​ប៊ុក​ កាល​ពី​ថ្ងៃ​ទី​៣១​ ខែ​ឧសភាក​ន្លងទៅ ​ដោយ​លើក​ឡើង​ថា​ «ពេល​ដែល​គាត់​ (​ឧត្តមសេនីយ៏ ​ព្រេម) ធ្វើ​ជា​នាយក​រដ្ឋមន្ត្រី (ថៃ) គាប់​ជួន​នឹង​ពេល​ដែល​សមាជិក​ ASEAN​ (កាល​នោះ​គ្នា​យើង​៥ប្រទេស​) រួម​គ្នា​ប្រឆាំង​ការ​ឈ្លាន​ពាន​របស់​វៀត​ណាម​មក​លើ​កម្ពុជា​និង​ប្រឆាំង​រដ្ឋាភិបាល​កម្ពុជា​ដែល​បាន​ជំនួស​ខ្មែរ​ក្រហម»។​

រូប Screenshot ពី​ទំព័រ​ហ្វេសប៊ុក​របស់​លោក Lee Hsien Loong នាយក​រដ្ឋ​មន្ត្រី​ប្រទេស​សិង្ហបុរី។ (Screenshot from PM Lee Hsien Loong Facebook Page)
រូប Screenshot ពី​ទំព័រ​ហ្វេសប៊ុក​របស់​លោក Lee Hsien Loong នាយក​រដ្ឋ​មន្ត្រី​ប្រទេស​សិង្ហបុរី។ (Screenshot from PM Lee Hsien Loong Facebook Page)

លោក​ហ៊ុន សែន​ បាន​ប្រតិកម្ម​ទៅ​នឹង​អត្ថាធិប្បាយ​នេះ​ ក្នុង​អត្ថន័យ​ដើម​ថា៖​ «ការ​លើក​ឡើង​នេះ​បង្ហាញ​ថា​ កាល​នោះ​សិង្ហបុរី​ បាន​គាំ​ទ្រ​របប​ប្រល័យ​ពូជសាសន៏​ និង​ចង់​ឲ្យ​របប​ប្រល័យ​ពូជ​សាសន៏​វិល​ត្រឡប់​មក​កម្ពុជា​វិញ​ដែរ​»​។

​លោក​បាន​បញ្ជាក់​ទៀត​ថា​៖ «ការ​លើក​ឡើង​នេះ ​ក៏​ជា​ការ​ប្រមាថ​ដល់​ពលិកម្ម​សាច់​ស្រស់​ឈាម​ស្រស់​របស់កងទ័ព​ស្ម័គ្រ​ចិត្ត​វៀតណាម​ ដែល​បាន​ជួយ​រំដោះ​កម្ពុជា​ឲ្យ​រួចផុត​ពី​របប​ប្រល័យ​ពូជសាសន៏​នោះ​»។

លោក​ហ៊ុន សែន​ បាន​សង្កត់​ធ្ងន់​ថា​ ការ​លើក​ឡើង​របស់​លោក​ Lee​ ​នា​ពេល​នេះ​ក៏​បាន​បង្ហាញ​ ប្រជាជន​សិង្ហបុរី​ និង​ពិភព​លោក​ថា​ មេដឹក​នាំ​សិង្ហបុរី​នា​ពេល​នោះ​បាន​រួម​ចំណែក​សម្លាប់​ប្រជាជន​កម្ពុជា​យ៉ាង​ពិត​ប្រាកដ​។

លោក​ហ៊ុន សែន​ បាន​ផ្តល់​ការ​កត់​សម្គាល់​ថា​ សិង្ហ​បុរី​បាន​ធ្វើ​ជា​ម្ចាស់​ផ្ទះ​រៀបចំ​ការប្រជុំ​ដែល​នាំ​ដល់​ការ​បង្កើត​រដ្ឋាភិបាល​ចម្រុះ​ត្រីភាគី​ កម្ពុជា​ប្រជាធិបតេយ្យ​ និង​អូស​បន្លាយ​សង្គ្រាម​នៅ​កម្ពុជា​ និង​ទុក្ខ​វេទនា​របស់​ប្រជាជន​កម្ពុជា​ជាង​១០ ​ឆ្នាំថែមទៀត ហើយ​ដែល​ស្មើ​នឹង​ការ​ប្រឆាំង​នឹង​ការរស់​ឡើង​វិញ​របស់​ប្រជាជន​កម្ពុជា​ផងដែរ​។ លោក​បាន​ចោទ​សួរ​លោក​Lee ​ក្នុង​ន័យដើម​ថា​៖

«ចុង​ក្រោយ​នេះ​ ខ្ញុំចង់សួរ ​ឯកឧត្តម នាយក​រដ្ឋមន្ត្រី ​លី ស៊ានឡុង ថា «តើ​គាត់​ចាត់ទុក​ការ​កាត់ទោស​មេ​ដឹក​នាំខ្មែរ​ក្រហម​កន្លង​ទៅ​នេះ​ថា ជា​ការ​ត្រឹម​ត្រូវ​ដែរ​ឬ​អត់​»​?

ស្រប​ពេល​ជាមួយ​គ្នានេះ​ អ្នក​នាំពាក្យ​ក្រសួង​ការបរទេ​ស​កម្ពុជា​ បាន​ចេញ​សេចក្តី​ថ្លែង​ការណ៍​ ដោយ​គាំទ្រ​ស្ទើរតែ​ទាំង​ស្រុង​នូវ​អត្ថាធិប្បាយ​របស់​លោក ហ៊ុន សែន​ ដោយសារ​ខ្លឹមសារ​នៃសេចក្តី​ថ្លែង​ការណ៍​នោះ​ គឺ​ដូចស្ទើរតែទាំង​អស់​ទៅនឹង​អត្ថាធិប្បាយ​របស់​លោក​ហ៊ុន​ សែន​។

ការ​ឆ្លើយតប​របស់​លោកហ៊ុន សែន​ ទៅនឹង​អត្ថាធិប្បាយ​របស់​មេ​ដឹកនាំ​សិង្ហបុរី​ ធ្វើឡើង​តែ​ប៉ុន្មាន​ថ្ងៃ​ បន្ទាប់​ពី​កូនប្រុស​ពៅ​របស់​លោក​គឺ​លោក​ហ៊ុន ម៉ានី​ ​ ​ដែល​ជា​តំណាង​រាស្ត្រ​មួយ​រូប​របស់​ខេត្ត​កំពង់ស្ពឺ​ផង​ដែរ​នោះ បាន​បង្ហាញ​«ការភ្ញាក់ផ្អើល​»​កាលពី​សប្ហាហ៍មុន​ទៅនឹង​ពាក្យពេចន៍​របស់​លោកលី​ ស៊ាន​ឡុង​។

ភ្លាម​ៗក្រោយ​អត្ថាធិប្បាយ​របស់​លោក​ហ៊ុន ម៉ានី​ ប្រទេស​វៀតណាម​បាន​បង្ហាញ«ការសាកសា្តយ​»​នឹង​ការ​លើកឡើង​របស់​លោក​លី។ អ្នក​នាំ​ពាក្យ​ក្រសួង​ការ​បរទេស​វៀតណាម ​លោក​ស្រី​ Le Thi Thu Hang​ បាន​ឆ្លើយ​តប​ជា​សាធាណៈ​ថា​ ការ​លើក​ឡើង​របស់​លោក​នាយក​រដ្ឋ​មន្ត្រី​សិង្ហបុរី«មិន​បង្ហាញ​ពី​ការណ៍​ពិត​នៃ​ប្រវត្តិ​សាស្រ្ត​ដែល​នាំ​ឲ្យ​មាន​ការ​ប៉ះពាល់​អវិជ្ជ​មាន​លើ​ការ​យល់​ឃើញ​របស់​សាធារណ​ជន​»។

លោកស្រី​ ក៏បាន​ថ្លែង​ថាសាលក្រម​របស់ អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​ ឬសាលាក្តីខ្មែរ​ក្រហម​ លើ​ឧក្រិដ្ឋ​កម្ម​ប្រល័យ​ពូជ​សាសន៍​និង​ឧក្រិដ្ឋ​កម្ម​ប្រឆាំង​មនុស្ស​ជាតិ​ដែល​ប្រព្រឹត្ត​ដោយ​ខ្មែរ​ក្រហម​ គឺគ្រប់​គ្រាន់​ល្មម​ដើម្បីបញ្ជាក់​ពី​ការណ៍ពិត​ដែលបាន​កើតឡើង​នៅកម្ពុជា​ មុនកងទ័ព​វៀត​ណាម​ចូលមក​ប្រទេស​កម្ពុជា។

ស្ថានទូត​សិង្ហបុរី​ ប្រចាំ​កម្ពុជា​មិន​ឆ្លើយតប​ទៅនឹង​សំនួរ​របស់VOA ​ដែល​បាន​ផ្ញើតាម​សារ​អេឡិច​ត្រូ​និក​ ឬអ៊ីម៉េល​។

យ៉ាងណា​ ប្រធាន​សភា​សិង្ហបុរី​ លោក Tan Chuan-Jin បានធ្វើ​អត្ថាធិប្បាយលើ​ទំព័រហ្វេស​ប៊ុក​របស់​លោក​ដោយ​តប​ទៅ​នឹង​ការថ្លែងរបស់​ប្រទេស​វៀតណាម​ តែមិនបាន​សំដៅ​ដល់​ប្រទេស​កម្ពុជា។​

លោក​បាន​សរសេរ​លើ​ទំព័រ​ហ្វេសប៊ុក​របស់​លោក​នៅ​ថ្ងៃសុក្រ​នេះ​ក្នុង​ន័យ​ដើម​ថា​៖ «​ប្រទេស​វៀត​ណាម​ប្រហែល​ជាមិន​ពេញ​ចិត្ត​យោបល់​ខ្លះ​ ដែល​ធ្វើ​ឡើង​ដោយ​លោក​នាយករដ្ឋ​មន្ត្រី​ [លី ស៊ាន​ឡុង​ហើយ​ខ្ញុំគិតថា​ ពួកគេ​អាច​កំណត់និយមន័យ​នៃ​អតីតកាល​តាម​បែប​ដែល​ពួកគេយល់​ថា​ សម​ទំនង​។ ការណ៍នេះ​ មិនបាន​កែប្រែ​អតីតកាល​ ដូចមនុស្ស​ជា​ច្រើន​បានយល់​ឃើញ​នោះ​ទេ​។ ហើយ​ការណ៍​នេះ​ ក៏​មិន​អាច​បង្អាក់​ ពួក​យើង​មិន​ឲ្យធ្វើជាមិត្តភ័ក្ត​ល្អ​ និង​អ្នកជិតខាង​ល្អ​នាពេលបច្ចុប្បន្ន​នេះដែរ​។ យើង​ប្តេជ្ញា​ធ្វើ​ជាមិត្ត​ភ័ក្ត​ និង​អ្នកជិតខាង​ដ៏ល្អ»​។

លោក​បាន​រៀបរាប់​បន្ថែម​ថា​ រឿង​ដែល​ចម្លែក​នោះ​ ​គឺ​ពេល​ឃើញជនជាតិ​សិង្ហបុរី​ខ្លះ​ ដែល​លោក​សន្មត់​ថា​ អាចមាន​ ឬ​មិនមាន​ប្រភពពីប្រទេស​ផ្សេង​ទៀតសប្បាយចិត្ត​នឹង​យក​រឿង​មក​និយាយ​ជា​មួយ​រដ្ឋាភិបាល​សិង្ហបុរី​ ដោយ​មិនខ្វល់​ពីប្រវត្តិសាស្ត្រ​។

លោក​សរសេរ​ថា៖ «​ឬក៏​ពួកគេ​ មិនបានអាន​ ឬ​ក៏​មិន​មាន​គំនិត​ណាមួយ​ចំពោះ​អ្វីដែល​បាន​កើតឡើង​នោះ​? ឬ​បើ​អាក្រក់​ជាងនេះ​ទៅទៀត​។ពួកគេដឹង​ប៉ុន្តែ​ពួកគេ​ជ្រើសរើស​ធ្វើ​ការ​វាយ​ប្រហារ​ពាក្យ​សំដី​ដោយសារ​តែ​វា​ចំណេញ​នយោបាយ។​

អ្នក​ប្រវត្តិ​សាស្រ្តកម្ពុជា​យល់​ថា​ ការ​ជជែក​ដេញ​ដោល ​ដែល​កើត​មាន​ក្រោយ​ការ​ថ្លែង​របស់​នាយក​រដ្ឋមន្ត្រី​សិង្ហបុរី ឆ្លុះ​បញ្ចាំង​ថា​ ការ​សិក្សា​ប្រវត្តិ​សាស្រ្ត​នៅ​ក្នុង​តំបន់​អាស៊ាន​មិនទាន់មាន​ការ​យល់ព្រម​ជា​រួមនោះ​ទេ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG