លោកនាយករដ្ឋមន្រ្តី ហ៊ុន សែន នៅថ្ងៃអង្គារនេះ បានបញ្ជាឲ្យលោក វ៉ា គឹមហុង ប្រធានគណៈកម្មាធិការចម្រុះកិច្ចការព្រំដែន ចុះជួបប្រជាពលរដ្ឋនៅតាមព្រំដែនដែលអះអាងថា បាត់ដី ដោយសារការបោះបង្គោលព្រំដែន ដូចជានៅក្នុងខេត្តត្បូងឃ្មុំ ដែលលោក រ៉ុង ឈុន មេដឹកនាំសហជីពបានចុះទៅ។
លោក ហ៊ុន សែន បានថ្លែងបែបនេះ នៅក្នុងកិច្ចប្រជុំមួយជាមួយសមាជិកឧត្តមក្រុមប្រឹក្សាពិគ្រោះនិងផ្តល់យោបល់ ដែលមានតំណាងពីគណបក្សដែលចូលរួមបោះឆ្នោតនៅក្នុងប្រទេសកម្ពុជា។ នេះបើយោងតាម លោក ឈឹម ផលវរុណ ប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះ និងផ្តល់យោបល់ ដែលបានថ្លែងនៅក្នុងសន្និសីទសារព័ត៌មានមួយនៅថ្ងៃអង្គារនេះ។
លោក ឈឹម ផលវរុណ ថ្លែងថា លោកនាយករដ្ឋមន្រ្តី ហ៊ុន សែន បានបញ្ជាឲ្យលោក វ៉ា គឹមហុង ចុះជួបប្រជាពលរដ្ឋ ដែលអះអាងអំពីភាពមិនប្រក្រតីនៃការបោះបង្គោលព្រំដែនរវាងកម្ពុជា និងវៀតណាមដើម្បីស្វែងរកការណ៍ពិត។
លោកមានប្រសាសន៍ថា៖ «សម្តេចបានចេញបទបញ្ជាតាមការលើកឡើងរបស់ឧត្តមក្រុមប្រឹក្សាពិគ្រោះនិងផ្តល់យោបល់ គឺបញ្ជាទៅឯកឧត្តម វ៉ា គឹមហុង ត្រូវចុះទៅជួបប្រជាពលរដ្ឋដែលគាត់អះអាងថា បាត់ដី អ៊ីចឹងទៅមើលថា បាត់ទីណា។ បាត់មែន ឬ បាត់អី? អាហ្នឹងចុះទៅផ្ទាល់តែម្តង»។
លោកបន្តថា រដ្ឋាភិបាលមិនមានបំណងលាក់បាំងព័ត៌មានអំពីការបោះបង្គោលព្រំដែនអ្វីនោះទេ គ្រាន់តែកន្លែងខ្លះស្ថិតនៅចំណុចដែលកំពុងចរចាជាមួយប្រទេសវៀតណាម ហើយកម្ពុជា អាចខាតបង់ ប្រសិនបើផ្សព្វផ្សាយព័ត៌មាន។
លោកថ្លែងតាមការលើកឡើងរបស់នាយករដ្ឋមន្រ្តីថា៖ «រឿងឈឺឆ្អាលនឹងព្រំដែន រឿងទៅមើលព្រំដែន រឿងស្រឡាញ់ទឹកដី គឺជារឿងដ៏ល្អរបស់ប្រជាពលរដ្ឋខ្មែរគ្រប់រូបមិនមែនជារឿងខុសច្បាប់ទេ។ ប៉ុន្តែអាអ្វីជារឿងអាក្រក់ ដែលយើងមិនអាចអត់ឱនឲ្យបាន គឺការបំភ្លៃ ការមួលបង្កាច់ និងការញុះញង់ ដែលយកប្រធានបទព្រំដែនមកបំភ្លៃ មកបង្កាច់ មកញុះញង់ក្នុងចេតនាលាក់លៀមដ៏អាក្រក់ គឺការផ្តួលរំលំ»។
បើតាមលោក ឈឹម ផលវរុណ «ការញុះញង់ ការបំភ្លៃ ជាបទល្មើសជាក់ស្តែង មិនមែនជាការបញ្ចេញមតិនោះទេ»។ លោកបន្តថា រដ្ឋាភិបាលចាប់ខ្លួនអ្នកលើកឡើងអំពីបញ្ហានេះ ដើម្បី«កុំឲ្យប្រជាពលរដ្ឋជ្រួលច្របល់» ហើយបង្កើតជា«ការតតាំងជាតិនិយមរវាងប្រទេសនិងប្រទេស»។
ទំព័រហ្វេសប៊ុករបស់លោកនាយករដ្ឋមន្រ្តី ហ៊ុន សែន ឲ្យដឹងថា ក្រៅពីការបញ្ជាឲ្យចុះទៅជួបប្រជាពលរដ្ឋនៅខេត្តត្បូងឃ្មុំ លោក ហ៊ុន សែន ក៏បានណែនាំឲ្យបើកសិក្ខាសាលាមួយដើម្បីឲ្យប្រជាពលរដ្ឋ សិស្ស និស្សិតចូលស្តាប់ និងសួរអំពីរឿងព្រំដែន។
លោក រ៉ុង ឈុន មេដឹកនាំសហជីព ត្រូវបានចាប់ខ្លួនកាលពីចុងខែកក្កដា ក្រោយពីលោកបានចុះទៅខេត្តត្បូងឃ្មុំ ហើយបានជួបប្រជាពលរដ្ឋ ដែលអះអាងថា ដីរបស់ពួកគេ ត្រូវបានវៀតណាមហាមមិនឲ្យធ្វើស្រែចម្ការ ហើយការបោះបង្គោលព្រំដែនបានចូលមកទឹកដីកម្ពុជា។ លោក រ៉ុង ឈុន ក៏បានផ្តល់បទសម្ភាសន៍ដល់វិទ្យុអាស៊ីសេរីអំពីសេចក្តីថ្លែងការណ៍របស់លោក ស្តីពីបញ្ហាវិវាទដីធ្លីនៅឃុំត្រពាំងផ្លុង ស្រុកពញាក្រែក ដែលមានព្រំប្រទល់ជាប់ប្រទេសវៀតណាមផងដែរ។
សេចក្តីថ្លែងការណ៍របស់លោក រ៉ុង ឈុន ចុះថ្ងៃទី២១ ខែកក្កដា មុនការចាប់ខ្លួនលោកបានឲ្យដឹងថា លោកបានចុះជួបប្រជាពលរដ្ឋនៅក្នុងឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ហើយពលរដ្ឋអះអាងថា អ្នកភូមិចំនួន១០៦ គ្រួសារ ជាជនរងគ្រោះដោយសារការបាត់បង់ដីធ្លីទៅខាងភាគីវៀតណាម។ សេចក្តីថ្លែងការណ៍និយាយថា៖ «ការបោះបង្គោលព្រំដែនលេខ១១៤ ដល់១១៩ មានភាពមិនប្រក្រតីច្រើនដែលធ្វើឲ្យពលរដ្ឋបាត់បង់ដី» ទៅភាគីវៀតណាមជាច្រើនរយហិកតានៅក្នុងខេត្តត្បូងឃ្មុំ។
សេចក្តីថ្លែងការណ៍ឲ្យដឹងទៀតថា បើគិតពីបន្ទាត់ព្រំដែនចាស់មកដល់ការបោះបង្គោលឡាក់ និងបង្គោលរណបថ្មី មានការចូលប្រហែល៥០០ម៉ែត្រ មកក្នុងទឹកដីកម្ពុជា។ លោក រ៉ុង ឈុន ក៏បានឲ្យដឹងថា អាជ្ញាធរវៀតណាមបានចូលមករុញច្រានពលរដ្ឋខ្មែរមិនឲ្យដាំដុះក្នុងដីខ្មែរផងដែរ។
ជាការឆ្លើយតប គណៈកម្មាធិការចម្រុះកិច្ចការព្រំដែនរបស់រដ្ឋាភិបាល បានប្រកាសច្រានចោលសេចក្តីថ្លែងការណ៍របស់លោក រ៉ុង ឈុន ដោយចោទថា ជា«ព័ត៌មានមិនពិត និងបំផ្លើស» និង«មានចេតនាទុច្ចរិត»។ គណៈកម្មាធិការ ក៏បានលើកឡើងថា លោក រ៉ុង ឈុន និង«ជនអគតិមួយចំនួន» តែងតែបង្កើតព័ត៌មានក្លែងក្លាយដោយមានចេនាទុច្ចរិត ដើម្បីវាយប្រហារដល់កិច្ចការព្រំដែនរបស់រដ្ឋាភិបាល។
ការចាប់ខ្លួនលោក រ៉ុង ឈុន កាលពីចុងខែកក្កដា នាំឲ្យមានការតវ៉ាទាមទារឲ្យដោះលែងរូបលោកជាបន្តបន្ទាប់។ ការតវ៉ាក៏រងការបង្រ្កាប និងឃាត់ខ្លួនមនុស្ស ក្នុងនោះមនុស្ស៥នាក់ ត្រូវបានចាប់ដាក់ពន្ធនាគារ និងចោទប្រកាន់តាមផ្លូវតុលាការរហូតមកដល់ពេលនេះ។
លោក អ៊ុំ សំអាន អតីតតំណាងរាស្រ្តគណបក្សប្រឆាំង និងធ្លាប់ត្រូវបានចាប់ខ្លួនដោយសាររឿងព្រំដែនកាលពីឆ្នាំ២០១៦ ថ្លែងប្រាប់ VOA ពីក្រៅប្រទេសថា មិនគួរមានការចាប់ខ្លួនលោក រ៉ុង ឈុន មុនពេលមន្រ្តីគណៈកម្មាធិការព្រំដែន ចុះជួបប្រជាពលរដ្ឋទេ ដោយសារលោក រ៉ុង ឈុន បានជួបប្រជាពលរដ្ឋដែលជាអ្នករងគ្រោះ។
លោកមានប្រសាសន៍ថា៖ «អត់មានយុត្តិធម៌ទេ។ បើសិនជាគាត់មិនច្បាស់អី នៅពេលដែលលោក រ៉ុង ឈុន គាត់និយាយហ្នឹងឲ្យលោក វ៉ា គឹមហុង ចុះទៅមើលទៅ! បើសិនជាឃើញលោក រ៉ុង ឈុន និយាយមិនត្រូវទេ អាហ្នឹងចាំនិយាយគ្នាទៀត»។
លោកជំរុញឲ្យមានការពិនិត្យមើលការបោះបង្គោលព្រំដែនឡើងវិញ ប្រសិនបើប្រជាពលរដ្ឋអះអាងដូចលោក រ៉ុង ឈុន។ ប៉ុន្តែ លោកមិនមានជំនឿថា រដ្ឋាភិបាលនឹងពិនិត្យឡើងវិញនោះទេ ដោយសារបង្គោលព្រំដែនត្រូវបានបោះរួចទៅហើយ។
លោកមានប្រសាសន៍ថា៖ «បើពិនិត្យឃើញតំបន់ហ្នឹងបោះបង្គោលមានភាពមិនប្រក្រតី ត្រូវតែសើរើការបោះបង្គោលឡើងវិញ ហើយបោះបង្គោលតាមមរតករបស់បារាំង កុំយកតាមមរតករបស់យួន ព្រោះប្រជាពលរដ្ឋនៅទីនោះបានអះអាងប្រាប់លោក រ៉ុង ឈុន ហើយថា ការបោះបង្គោលហ្នឹងចូលដីខ្មែរយើងជាង៥០០ម៉ែត្រនៅក្នុងតំបន់ហ្នឹង»។
VOA មិនអាចសុំការឆ្លើយតបពីលោក វ៉ា គឹមហុង ប្រធានគណៈកម្មាធិការកិច្ចការព្រំដែន និងលោកស្រី កុយ ពិសី អនុប្រធានគណៈកម្មាធិការនេះ បាននៅឡើយទេ។
ប្រធានគណបក្សយុវជនកម្ពុជា លោក ពេជ្រ ស្រស់ និងជាសមាជិកនៃក្រុមប្រឹក្សាពិគ្រោះយោបល់មានប្រសាសន៍ថា ការបញ្ជារបស់នាយករដ្ឋមន្រ្តីឲ្យចុះទៅសួរប្រជាពលរដ្ឋដែលអះអាងបាត់ដីនោះ កើតឡើងក្រោយមានការស្នើសុំពីគណបក្សរបស់លោក។ លោកបន្តថា លោក នឹងចុះជាមួយលោក វ៉ា គឹមហុង ទៅជួបពលរដ្ឋដែលអះអាងថា បាត់ដីក្រោយពីបោះបង្គោលព្រំដែនកម្ពុជា និងវៀតណាម នៅខេត្តត្បូងឃ្មុំក្នុងពេលឆាប់ៗខាងមុខនេះ៕
