បន្ទាប់ពីលោកនាយករដ្ឋមន្រ្តី ហ៊ុន សែន បានចេញលិខិតមួយច្បាប់ ដោយលើកឡើងពីការលុបចោលទោសជាប់ពន្ធនាគារក្នុងបទបរិហារកេរ្តិ៍ បានធ្វើឲ្យអ្នកប្រើប្រាស់បណ្តាញសង្គមមួយចំនួនយល់ច្រឡំថា រដ្ឋាភិបាលបានលុបចោលមាត្រាចែងពីបទបរិហារកេរ្តិ៍។ មន្រ្តីជាន់ខ្ពស់រដ្ឋាភិបាល បានពន្យល់ពីអត្ថន័យរបស់លិខិតនោះថា រដ្ឋាភិបាលមិនបានលុបចោលមាត្រាដែលចែងពីបទបរិហារកេរ្តិ៍នោះទេ ប៉ុន្តែគ្រាន់តែរំឭកពីក្រមព្រហ្មទណ្ឌចាស់តែប៉ុណ្ណោះ។
អ្នកប្រើប្រាស់បណ្តាញសង្គមមួយចំនួន បានយល់ច្រឡំចំពោះអត្ថន័យក្នុងលិខិតរបស់លោកនាយករដ្ឋមន្រ្តី ហ៊ុន សែន ពាក់ព័ន្ធនឹងការប្រកាសពីការលុបចោលទោសជាប់ពន្ធនាគារនៃបទបរិហារកេរ្តិ៍ក្នុងក្រមព្រហ្មទណ្ឌដ៏ចម្រូងចម្រាស។
លិខិតអបអរសាទរទិវាសេរីភាពសារព័ត៌មានពិភពលោកលើកទី១៦មួយច្បាប់ ដែលចុះហត្ថលេខាដោយលោក ហ៊ុន សែន តាំងពីថ្ងៃទី២៦ ខែមេសា ត្រូវបានសារព័ត៌មានមួយចំនួនយកមកផ្សព្វផ្សាយកាលពីថ្ងៃអង្គារ។
លិខិតរបស់លោក ហ៊ុន សែន សរសេរអបអរសាទរទិវាសេរីភាពសារព័ត៌មាន ដែលត្រូវបានប្រទេសស្ទើតែទូទាំងពិភពលោកប្រារព្ធដែរនោះសរសេរថា រដ្ឋាភិបាលបានសម្រេចលុបចោលទោសជាប់ពន្ធនាគារនៃបទបរិហារកេរ្តិ៍ចេញពីក្រមព្រហ្មទណ្ឌ ដើម្បីធានាដល់សេរីភាពនៃការបញ្ចេញមតិ។
លោក ហ៊ុន សែន សរសេរក្នុងន័យដើមថា៖ «ដោយមើលឃើញនូវភាពចាំបាច់និងសារៈសំខាន់នៃការបញ្ចេញមតិនិងសេរីភាពសារព័ត៌មាន រាជរដ្ឋាភិបាលបានសម្រេចលុបចោលទោសជាប់ពន្ធនាគារនៃបទបរិហារកេរ្តិ៍ចេញពីក្រមព្រហ្មទណ្ឌនិងបានធានាថា មិនមានពលរដ្ឋណាម្នាក់ត្រូវជាប់ពន្ធនាគារដោយសារការបញ្ចេញមតិឡើយ»។
ការសរសេរនោះបានធ្វើឲ្យមានការភ័ន្តច្រឡំថា រដ្ឋាភិបាលទើបតែបានលុបចោលទោសជាប់ពន្ធនាគារក្នុងមាត្រានៃបទបរិហារកេរ្តិ៍ ដោយសារលិខិតនោះមិនបានបញ្ជាក់លម្អិតអំពីពេលវេលានៃការលុបចោល។
ស្ថាប័នព័ត៌មានមួយចំនួនបានផ្សាយបន្ត ដោយបានលើកយកអត្ថន័យដែលថា រដ្ឋាភិបាលសម្រេចលុបចោលទោសជាប់ពន្ធនាគារនៃបទបរិហារកេរ្តិ៍ ចេញពីក្រមព្រហ្មទណ្ឌ។ ក្រោយការផ្សាយបានបន្តិចគេឃើញអ្នកប្រើប្រាស់អ៊ីនធឺណិតមួយចំនួនបានសរសេរបញ្ចេញមតិរបស់ពួកគេដោយភ័ន្តច្រឡំថា រដ្ឋាភិបាលទើបលុបចោលទោសជាប់ពន្ធនាគារក្នុងបទបរិហារកេរ្តិ៍និងខ្លះទៀតយល់ច្រឡំថារដ្ឋាភិបាលសម្រេចលុបចោលមាត្រាបរិហារកេរ្តិ៍តែម្តង។ ការសរសេររបស់អ្នកប្រើប្រាស់បណ្តាញសង្គមដែលបានយល់ច្រឡំទាំងនោះខ្លះបង្ហាញពីការអបអរសាទរនិងខ្លះរិះគន់ថារដ្ឋាភិបាលទើបតែដឹងខ្លួនពីសារៈសំខាន់នៃការសេរីភាពនៃការបញ្ចេញមតិជាដើម។
លោក ហូរ ប៊ុនយ៉េត អ្នកប្រើប្រាស់បណ្តាញសង្គមហ្វេសប៊ុកម្នាក់ បានសរសេរអបអរសារទរជាការឆ្លើយតបនឹងអត្ថបទព័ត៌មានដែលផ្សាយពីលិខិតរបស់លោកនាយករដ្ឋមន្រ្តី ដែលបានលើកឡើងពីការសម្រេចលុបចោលទោសជាប់ពន្ធនាគារនៃបទបរិហារកេរ្តិ៍ចេញពីក្រមព្រហ្មទណ្ឌនោះ។
លោកបានសរសេរក្នុងន័យដើមថា៖«សូមចូលរួមអបអរសារទចំពោះការសម្រេចប្រកបដោយគតិបណ្ឌិតរបស់ប្រមុខរាជរដ្ឋាភិបាល សូមឲ្យការសម្រេចនេះក្លាយជាការអនុវត្តល្អសម្រាប់ទាំងអស់គ្នា»។
ចំណែកអ្នកប្រើប្រាស់បណ្តាញសង្គមហ្វេសប៊ុកម្នាក់ទៀតឈ្មោះ ណា នីតា សរសេរក្នុងន័យដើមថា៖«សង្ឃឹមថាអ្វីៗជិតប្រសើរឡើងវិញហើយ នេះបើអ្នកទោសពាក់ព័ន្ធនយោបាយត្រូវបានដោះលែងទៀតគិតថាយើងបានគិតគូរដោះខ្លួនពីគំនាបគេបណ្តើរៗ»។
លោក ឈុន លី បានសរសេរអរគុណចំពោះប្រមុខរដ្ឋាភិបាលនិងថានេះជាអំពើល្អរបស់អ្នកដឹកនាំ។
ចំណែកគណនីហ្វេសប៊ុកឈ្មោះ កឹម ផា សរសេរថា៖ «ចាំមើលក្រឹត្យឬសារាចរណ៍ចេញសិន កុំនិយាយលឿនពេក ក្រែងនិយាយខុសពីការពិត»។
មន្រ្តីជាន់ខ្ពស់រដ្ឋាភិបាលលើកឡើងថា អ្នកប្រើប្រាស់សង្គមហ្វេសប៊ុកទាំងនោះបានយល់ច្រឡំលើអត្ថន័យនៃលិខិតរបស់លោកនាយករដ្ឋមន្រ្តី ហ៊ុន សែន។
លោក កើត រិទ្ធ រដ្ឋលេខាធិការក្រសួងយុត្តិធម៌ប្រាប់ VOA កាលពីពុធថា ក្នុងលិខិតដែលលោកនាយករដ្ឋមន្រ្តីបញ្ជាក់ពីការលុបចោលទោសពន្ធនាគារនៃបទបរិហាកេរ្តិ៍គឺជាការរំឭកពីការប្តេជ្ញាចិត្តដើម្បីលើកកម្ពស់សិទ្ធិក្នុងការបញ្ចេញមតិរបស់រដ្ឋាភិបាលក្នុងពេលកន្លងទៅ មិនមែនជាការសម្រេចលុបចោលមាត្រាដែលចែងពីបទបរិហារកេរ្តិ៍នោះទេ។
«ពីមុនយោងតាមច្បាប់ព្រហ្មទណ្ឌអន្តរកាល បទបរិហារកេរ្តិ៍មានទោសដាក់ពន្ធនាគារពី១ខែទៅ១ឆ្នាំ ហើយនិងមានពិន័យជាប្រាក់ទៅទៀត។ អញ្ចឹងរាជរដ្ឋាភិបាលពេលនោះបានស្នើដកចេញនូវទោសដាក់ពន្ធនាគារហ្នឹង អញ្ចឹងបច្ចុប្បន្នអត់មានទោសដាក់ពន្ធនាគារទេ មានតែទោសពិន័យជាប្រាក់ នៅតែជាបទល្មើសព្រហ្មទណ្ឌ ប៉ុន្តែបទល្មើសហ្នឹងហៅថាបទលហុ»។
មាត្រា៣០៥នៃក្រមព្រហ្មទណ្ឌបានចែងពីបទបរិហារកេរ្តិ៍ជាសាធារណៈថា គ្រប់ការអះអាងបំផ្លើស ទម្លាក់កំហុសដោយអសុទ្ធចិត្តលើអំពើណាមួយ ដែលនាំឲ្យប៉ះពាល់ដល់កិត្តិយស ឬកិត្តិសព្ទនៃបុគ្គល ឬស្ថាប័ន តាមរយៈសម្តី តាមលិខិតឬគំនូរនិងតាមគ្រប់មធ្យោបាយទូរគមនាគមន៍សោតទស្សន៍ជាសាធារណៈនឹងត្រូវពិន័យជាប្រាក់ពី ១សែនរៀល ទៅ១០លានរៀល ដោយមិនកំណត់ពីទោសដាក់ពន្ធនាគារនោះទេ៕
