លោក ហ៊ុន ម៉ាណែត ដែលជាអ្នកស្នងតំណែងរបស់លោកនាយករដ្ឋមន្ត្រី ហ៊ុន សែន អាចនឹងជួបជាមួយនឹងថ្នាក់ដឹកនាំក្រុមហ៊ុនជំនួញអាមេរិកដែលចាប់អារម្មណ៍ចង់ធ្វើវិនិយោគនៅកម្ពុជា នៅទីក្រុង New York (ញូវយ៉ក) សហរដ្ឋអាមេរិក នៅខែក្រោយនេះ។ នេះបើយោងតាមការបញ្ជាក់របស់លោក Ted Osius ប្រធានក្រុមប្រឹក្សាជំនួញសហរដ្ឋអាមេរិក-អាស៊ាន ដែលបានប្រាប់ទីភ្នាក់ងារសារព័ត៌មាន Reuters។ កម្ពុជាគឺជាប្រទេសមួយដែលរដ្ឋាភិបាលក្រុងវ៉ាស៊ីនតោនចាប់អារម្មណ៍ចង់ទាញចេញពីគន្លងរបស់ចិន។
នាយករដ្ឋមន្ត្រីរយៈពេលយូរអង្វែងរបស់កម្ពុជាគឺលោក ហ៊ុន សែន បានថ្លែងថា លោកនឹងប្រគល់អំណាចរបស់លោកទៅឱ្យកូនប្រុសច្បងរបស់លោកគឺលោក ហ៊ុន ម៉ាណែត វ័យ ៤៥ ឆ្នាំ ក្នុងខែសីហានេះ បន្ទាប់ពីគណបក្សកាន់អំណាចរបស់លោកបានឈ្នះការបោះឆ្នោតភ្លូកទឹកភ្លូកដីកាលពីខែកក្កដា ដោយគ្មានគូប្រជែង។
លោក Ted Osius ប្រធានក្រុមប្រឹក្សាជំនួញសហរដ្ឋអាមេរិក-អាស៊ាន (U.S.-ASEAN Business Council ) បានឱ្យដឹងកាលពីថ្ងៃព្រហស្បតិ៍ ទី៣ ខែសីហា សប្តាហ៍មុន ថា៖ «យើងសង្ឃឹមថា នឹងរៀបចំទទួល [លោក ហ៊ុន ម៉ាណែត]។ យើងសង្ឃឹមថា នឹងអាចមានរកមើលថាមានមធ្យោបាយក្នុងការចាប់ផ្ដើមជំពូកថ្មីមួយ»រវាងរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងភ្នំពេញ។
លោកបានថ្លែងទៀតថា៖ «វាមិនមែនជាជំពូកថ្មីមួយទាំងស្រុងនោះទេ [ប៉ុន្តែ] លោកមិនមែនជាឪពុករបស់លោកទេ លោកគឺជាមនុស្សខុសគ្នា។ ដូច្នេះប្រហែលជាអាចមានឱកាសមួយចំនួននៅទីនេះ»។
កិច្ចពិភាក្សាកំពុងប្រព្រឹត្តទៅសម្រាប់ការរៀបចំកម្មវិធីមួយនៅសណ្ឋាគារនៅជិតមហាសន្និបាតអង្គការសហប្រជាជាតិនៅខែកញ្ញាខាងមុខ។ នេះបើតាមការបញ្ជាក់របស់លោក Osius ជាអតីតមន្ត្រីការទូតម្នាក់ដែលធ្លាប់បម្រើការងារជាឯកអគ្គរដ្ឋទូតសហរដ្ឋអាមេរិកប្រចាំនៅប្រទេសវៀតណាម ក្បែរខាងកម្ពុជា។
លោក Osius បានថ្លែងទៀតថា៖ «[យើងនឹង]អញ្ជើញនាំមកនូវថ្នាក់ដឹកនាំក្រុមហ៊ុនជំនួញដែលចាប់អារម្មណ៍នឹងប្រទេសកម្ពុជា និងប្រហែលជាចង់ដឹងអំពីទស្សនៈរបស់មេដឹកនាំថ្មី។ ហើយខ្ញុំគិតថា លោក [ហ៊ុន ម៉ាណែត] នឹងទទួលស្វាគមន៍ចំពោះរឿងនេះ»។
រដ្ឋាភិបាលក្រុងវ៉ាស៊ីនតោន ដែលអស់រយៈពេលជាច្រើនឆ្នាំមកហើយបានថ្កោលទោសចំពោះចំណាត់ការបែបផ្ដាច់ការនិងមានលក្ខណៈប្រឆាំងនឹងរបបប្រជាធិបតេយ្យរបស់លោក ហ៊ុន សែន បានលើកឡើងថា ការបោះឆ្នោតនោះមិនមានលក្ខណៈ«សេរីនិងយុត្តិធម៌»នោះទេ។
លោក ហ៊ុន ម៉ាណែត ដែលបានបញ្ចប់ការសិក្សានៅសាកលវិទ្យាល័យនៅបស្ចិមប្រទេស ដែលរួមមានទាំងពីបណ្ឌិតសភាយោធា West Point នៅសហរដ្ឋអាមេរិកផងនោះ នឹងមិនចង់«ត្រូវបានគ្រប់គ្រងទាំងស្រុង»ដោយប្រទេសដទៃណាមួយនោះទេ។ នេះបើយោងតាមការបញ្ជាក់របស់លោក Osius ដោយសំដៅទៅលើប្រទេសចិនដែលជាមិត្តជិតស្និទ្ធរបស់កម្ពុជា ប៉ុន្តែជាគូប្រជែងរបស់សហរដ្ឋអាមេរិក។
អ្នកនាំពាក្យម្នាក់របស់ក្រសួងការបរទេសសហរដ្ឋអាមេរិក បញ្ជាក់ថាក្រសួងការបរទេសមិនមានអត្ថាធិប្បាយអ្វីជាក់លាក់អំពីអនាគតការដឹកនាំរបស់លោក ហ៊ុន ម៉ាណែត ទេ ប៉ុន្តែបានបញ្ជាក់ថា ការបង្កើតរដ្ឋាភិបាលថ្មីជាឱកាសសម្រាប់គណបក្សប្រជាជនកម្ពុជា ក្នុងការស្តារមុខមាត់កម្ពុជាលើឆាកអន្តរជាតិ៕
ប្រែសម្រួលដោយ ហុង ចិន្តា និង សឹង សុផាត
លោក ហ៊ុន ម៉ាណែត អាចនឹងជួបថ្នាក់ដឹកនាំក្រុមហ៊ុនជំនួញអាមេរិកដែលចង់វិនិយោគនៅកម្ពុជានៅទីក្រុង New York
- Reuters
វ៉ាស៊ីនតោន —
