ព្រះមហាក្សត្រកម្ពុជាបានចេញព្រះរាជក្រឹត្យចាត់តាំងលោក ហ៊ុន ម៉ាណែត ដែលជាកូនប្រុសច្បងរបស់លោកនាយករដ្ឋមន្រ្តី ហ៊ុន សែន ជានាយករដ្ឋមន្រ្តីថ្មីនៃអាណត្តិទី៧ ក្រោយលោក ហ៊ុន សែន បានប្រកាសលាលែងពីតំណែងដែលលោកដឹកនាំរយៈពេល៣៨ឆ្នាំ។
យោងតាមព្រះរាជក្រឹត្យចុះថ្ងៃទី៧ ខែសីហានេះ ព្រះមហាក្សត្របានត្រាស់បង្គាប់ «ចាត់តាំងឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជាសម្រាប់នីតិកាលទី៧នៃរដ្ឋសភា»។ ព្រះរាជក្រឹត្យបញ្ជាក់ទៀតថា នាយករដ្ឋមន្រ្តីដែលទទួលបានការចាត់តាំងនេះ មានភារកិច្ចរៀបចំសមាសភាពរាជរដ្ឋាភិបាលដើម្បីសុំសេចក្តីអនុម័តទុកចិត្តពីរដ្ឋសភា។
គណបក្សប្រជាជនកម្ពុជាបានឈ្នះការបោះឆ្នោតកាលពីខែកក្កដា ដោយទទួលបានអាសនៈសភាចំនួន១២០លើអាសនៈសរុបចំនួន១២៥។ លោក ហ៊ុន ម៉ាណែត ត្រូវបានជ្រើសតាំងជាតំណាងរាស្រ្តសម្រាប់មណ្ឌលរាជធានីភ្នំពេញ ដែលបើកឱកាសសម្រាប់លោកធ្វើជានាយករដ្ឋមន្រ្តី។
ភ្លាមៗក្រោយពីទទួលបានព្រះរាជក្រឹត្យចាត់តាំងជានាយករដ្ឋមន្រ្តីពីព្រះមហាក្សត្ររួចមក លោក ហ៊ុន ម៉ាណែត បានចេញលិខិតថ្លែងអំណរព្រះគុណព្រះមហាក្សត្រ។ លោក ហ៊ុន ម៉ាណែត ក៏បានប្តេជ្ញាថា លោកនិងឥស្សរជនក្នុងរាជរដ្ឋាភិបាល នីតិកាលទី៧នៃរដ្ឋសភា នឹងខិតខំបំពេញបេសកកម្មជាតិប្រកបដោយវីរភាព សេចក្តីស្មោះត្រង់ និងការទទួលខុសត្រូវខ្ពស់ក្នុងការបម្រើជាតិ មាតុភូមិ និងប្រជាជនកម្ពុជា ពិសេសការបន្តធានាការពារឯករាជ្យជាតិ អធិបតេយ្យជាតិ និងបូរណភាពទឹកដី ការធានាការពារជាដាច់ខាតនូវរាជបល្ល័ង្ក និងរបបរាជានិយមអាស្រ័យរដ្ឋធម្មនុញ្ញនៅកម្ពុជា ការបន្តធានាការពារឱ្យបានដាច់ខាតនូវសុខសន្តិភាព និងស្ថិរភាពសង្គមជាតិ ការបន្តជំរុញការអភិវឌ្ឍប្រទេសជាតិឱ្យមានការរីកចម្រើនជឿនលឿន និងការបន្តលើកកម្ពស់ជីវភាពរស់នៅរបស់ប្រជាជនកម្ពុជា ក៏ដូចជាការបន្តលើកស្ទួយកិត្យានុភាពជាតិនៅលើឆាកអន្តរជាតិ។
នៅមុនការបោះឆ្នោត លោក ហ៊ុន ម៉ាណែត បានថ្លែងអំពីការប្តេជ្ញារបស់លោកក្នុងការការពារសន្តិភាព និងទប់ស្កាត់នូវឧបាយកលរបស់អ្នកដែលចង់បំផ្លាញប្រទេសកម្ពុជា។
នាយករដ្ឋមន្រ្តីចាំផ្ទះ លោក ហ៊ុន សែន ក៏បានបង្ហោះសារជាអក្សរនៅលើប្រព័ន្ធ Twitter របស់លោកថា លោកគឺជានាយករដ្ឋមន្ត្រីដែលចូលកាន់តំណែងក្មេងជាងគេក្នុងអាយុ៣២ឆ្នាំ និងយូរជាងគេនៅក្នុងពិភពលោក ចាប់តាំងថ្ងៃទី១៤ ខែមករា ឆ្នាំ១៩៨៥។
លោកបញ្ជាក់ថា៖ «ពេលនេះ ខ្ញុំបន្តជានាយករដ្ឋមន្ត្រី១៥ថ្ងៃទៀត បន្ទាប់ទៅខ្ញុំនឹងឡើងឋានៈទៅជាឪពុកនាយករដ្ឋមន្ត្រីម្តង។ មិនទាន់ចប់ត្រឹមនេះទេ ខ្ញុំនឹងបន្តការងារក្នុងមុខនាទីផ្សេងទៀតយ៉ាងតិចត្រឹមឆ្នាំ២០៣៣ ដែលពេលនោះខ្ញុំនឹងបំពេញការងារជាងកន្លះសតវត្សរ៍»។
លោក ហ៊ុន សែន ធ្លាប់ប្រកាសថា លោកនឹងក្លាយជាប្រធានព្រឹទ្ធសភា ចាប់ពីខែកុម្ភៈ ឆ្នាំ២០២៤ នៅពេលកម្ពុជារៀបចំការបោះឆ្នោតព្រឹទ្ធសភា។
កាលពីពេលកន្លងទៅ លោកនាយករដ្ឋមន្រ្តី ហ៊ុន សែន ឱ្យដឹងថា នៅថ្ងៃទី២១ ខែសីហា ព្រះមហាក្សត្រនឹងកោះប្រជុំសភាលើកដំបូង ដែលជាការចេញដំណើរមួយដ៏ល្អសម្រាប់សភា ក៏ដូចជាសម្រាប់រដ្ឋាភិបាលថ្មី។ ចំណែកឯនៅល្ងាចថ្ងៃទី ២២ ខែសីហាវិញ គឺជាថ្ងៃដែលគណៈរដ្ឋមន្ដ្រីនឹងស្បថចូលកាន់តំណែង ជាថ្ងៃដែលលោក ហ៊ុន ម៉ាណែត ក្លាយជានាយករដ្ឋមន្រ្តីពេញសិទ្ធិនៃអាណត្តិទី៧នេះ។ គេរំពឹងថា លោក ហ៊ុន ម៉ាណែត នឹងរៀបចំគណៈរដ្ឋមន្រ្តីវ័យក្មេង ហើយភាគច្រើនជាកូនរបស់មន្រ្តីជាន់ខ្ពស់ដែលឪពុករបស់ពួកគេឈប់ធ្វើជារដ្ឋមន្រ្តី។
ការឡើងកាន់អំណាចរបស់លោក ហ៊ុន ម៉ាណែត នៅថ្ងៃទី២២ ខែសីហា ខាងមុខនេះ ក៏នៅតែជាចំណោទមួយសម្រាប់មេដឹកនាំគណបក្សជំទាស់លោក សម រង្ស៊ី ដោយសារគណបក្សប្រជាជនកម្ពុជាបានឈ្នះការបោះឆ្នោតជាតិអាណត្តិទី៧ ដោយអវត្តមានគណបក្សជំទាស់ដ៏ចម្បង គឺគណបក្សភ្លើងទៀន។ ការបោះឆ្នោតមួយនេះត្រូវបានប្រទេសលោកខាងលិចមួយចំនួនរិះគន់ថា មិនសេរី និងយុត្តិធម៌ ដែលត្រូវបានធ្វើឡើងក្នុងស្ថានភាពរឹតត្បិតសេរីភាពនយោបាយ និងប្រព័ន្ធផ្សព្វផ្សាយ។
អ្នកវិភាគនយោបាយលោក មាស នី លើកឡើងថា រដ្ឋាភិបាលអាណត្តិថ្មី ដែលដឹកនាំដោយលោក ហ៊ុន ម៉ាណែត គួរតែពង្រឹងនូវទំនាក់ទំនងរវាងកម្ពុជាជាមួយនឹងអន្តរជាតិឡើងវិញ ដើម្បីកុំឱ្យកម្ពុជាធ្លាក់ចូលទៅក្នុងប្លុកនៃរបបផ្តាច់ការ។
លោកថ្លែងថា៖ «អ្វីដែលខ្ញុំចង់សង្កត់ធ្ងន់ហ្នឹងគឺភាពចាំបាច់នៃតួនាទីរបស់ឯកឧត្តម ហ៊ុន ម៉ាណែត នៅពេលគាត់ឡើងមកជានាយករដ្ឋមន្រ្តីហ្នឹង គឺការពិនិត្យមើលឡើងវិញទៅទំនាក់ទំនងកម្ពុជាជាមួយនិងអន្តរជាតិ ព្រោះអីបច្ចុប្បន្ននេះ ឃើញថាកម្ពុជាចង់ឬមិនចង់ គេមើលឃើញថាកម្ពុជាដូចកំពុងតែធ្លាក់ចូលទៅកាន់តែជ្រៅទៅ ទៅក្នុងប្លុករបស់ចិនកុម្មុយនិស្ត ជាបញ្ហាមួយធ្វើឱ្យកម្ពុជាហ្នឹងទៅធ្លាក់ចូលទៅក្នុងភូមិសាស្រ្តនយោបាយដែលជាគន្លងចាស់មួយដែលកម្ពុជាធ្លាប់ឆ្លងកាត់ កាលពីចុងទស្សវត្សរ៍ឆ្នាំ [១៩]៧០ [១៩]៦០ បាទ»។
លោកបន្ថែមថា ប្រសិនបើកម្ពុជាមិនបានស្ដារទំនាក់ទំនងរវាងកម្ពុជាជាមួយនឹងអន្តរជាតិឡើងវិញ ឱ្យត្រូវទៅតាមអ្វីដែលបានចែងនៅក្នុងកិច្ចព្រមព្រៀងទីក្រុងប៉ារីសទេនោះ លោកថា កម្ពុជាអាចជួបនឹងវិបត្តិសេដ្ឋកិច្ចដ៏ស្មុគស្មាញនៅក្នុងរយៈពេល៥ឆ្នាំខាងមុខ។
គួរបញ្ជាក់ថា លោក ហ៊ុន ម៉ាណែត អាយុ ៤៥ ឆ្នាំ ជានិស្សិតបញ្ចប់ការសិក្សានៅបណ្ឌិតសភាយោធា West Point សហរដ្ឋអាមេរិក ឆ្នាំ១៩៩៩។ លោកក៏បានបញ្ចប់ការសិក្សាថ្នាក់បណ្ឌិតផ្នែកសេដ្ឋកិច្ចពីសាកលវិទ្យាល័យ Bristol នៅចក្រភពអង់គ្លេស កាលពីឆ្នាំ ២០០៨។ លោកមានបទពិសោធន៍នៅក្នុងផ្នែកយោធាជាច្រើនឆ្នាំ បន្ទាប់ពីលោកបានទទួលការតែងតាំងឋានៈជាបន្តបន្ទាប់នៅក្នុងផ្នែកយោធានេះ៕
