លោកនាយករដ្ឋមន្រ្តី ហ៊ុន សែន នៅថ្ងៃអង្គារនេះ បានប្រកាសលើកលែងដល់លោក ស ឡុងដេត ប្រធានប្រតិបត្តិគណបក្សភ្លើងទៀននៅរាជធានីភ្នំពេញ ក្រោយមន្រ្តីគណបក្សជំទាស់រូបនោះបានសុំទោសជាសាធារណៈ ហើយសុំចុះចូលជាមួយគណបក្សប្រជាជនកម្ពុជា។
កាលពីព្រឹកថ្ងៃអង្គារ លោក ហ៊ុន សែន បានព្រមានថាមានដីកាចាប់ខ្លួនលោក ស ឡុងដេត ដែលលោកថាកំពុងព្យាយាមចាកចេញទៅក្រៅប្រទេសតាមច្រកព្រំដែនរវាងកម្ពុជានិងថៃ។
នៅក្នុងពិធីសំណេះសំណាលជាមួយកម្មករនៅរាជធានីភ្នំពេញ កាលពីព្រឹកថ្ងៃអង្គារ លោក ហ៊ុន សែន ថ្លែងថា៖ «ឥឡូវសូមអំពាវនាវឱ្យ ស ឡុងដេត មកវិញយប់មិញចាកចេញពីភ្នំពេញចាំរត់ធ្វើអី។ បើគង់តែរត់ទៅ ខ្ញុំក៏សុំឱ្យថៃចាប់បញ្ជូនមកវិញដែរ។ យប់មិញទៅដល់ថ្មដា[ច្រកព្រំដែនក្នុងខេត្តពោធិ៍សាត់]ថៃ គេអត់ឱ្យឆ្លងទេ។ ឥឡូវកំពុងតែឆ្ពោះទៅចាំយាម ចៅហ្វាយខេត្តចាំយាម[ច្រកព្រំដែនក្នុងខេត្តកោះកុង]។ ដីការបស់តុលាការហាមមិនឱ្យចេញទៅក្រៅប្រទេស បើចេញក្រៅប្រទេសចាប់ភ្លាមនៅនឹងទល់ដែន។ ឥឡូវស សាឡុងដេត បានឮហើយត្រឡប់មកវិញ។ ត្រឡប់មកដេកផ្ទះយ៉ាងស្រួលហើយ ទៅឆ្លើយជាមួយតុលាការទៅអារឿងចោទប្រកាន់ពាក់ព័ន្ធនឹងស៊ីហ្គេម»។
កាលពីថ្ងៃទី៩ ខែមិថុនា ឆ្នាំ២០២៣ លោក ស ឡុងដេត បានថ្លែងក្នុងកិច្ចប្រជុំមួយ ដោយរិះគន់ការរៀបចំស៊ីហ្គេម និងអាស៊ានប៉ារ៉ាហ្គេម ដែលកម្ពុជាមិនយកថ្លៃសំបុត្រ មិនយកថ្លៃស្នាក់នៅ និងអាហារ ព្រមទាំងមិនយកថ្លៃលើសិទ្ធិផ្សព្វផ្សាយ។ មន្រ្តីគណបក្សជំទាស់រូបនោះបានលើកឡើងអំពីការចំណាយថវិការបស់រដ្ឋាភិបាលក្នុងការរៀបចំការប្រកួតកីឡានេះ ខណៈរដ្ឋាភិបាលខ្ចីបុលពីបរទេស។
ការថ្លែងរបស់លោក ស ឡុងដេត ត្រូវបានលោក ហ៊ុន សែន ថាមានផ្ទៃក្នុងរបស់លោកដែលចូលរួមកិច្ចប្រជុំនោះផ្តល់ឱ្យ។ មន្រ្តីបក្សជំទាស់រូបនោះត្រូវបានប្តឹងផ្តល់ពីគណៈកម្មការប្រកួតស៊ីហ្គេម។ នេះបើតាមលោក ហ៊ុន សែន។
លោក ហ៊ុន សែន បញ្ជាក់ថា៖ «អ្នកឯង[លោក ស ឡុងដេត] និយាយក្នុងចំណោមមនុស្សសាមសិបនាក់ ចាត់ទុកថាបរិហារកេរ្តិ៍ហើយ។ អ៊ីចឹងមិនបាច់ចាំរត់ទេ ស ឡុងដេតអើយ។ លោកឯងចេញទៅណា ក៏អត់រួចដែរ។ អញ្ជើញមកវិញមក»។
ក្រោយលោក ហ៊ុន សែន ព្រមាន និងលើកឡើងអំពីដីការបស់តុលាការ លោក ស ឡុងដេត នៅថ្ងៃអង្គារនេះ ក៏បានចេញវីដេអូសុំទោសជាសាធារណៈទៅកាន់លោក ហ៊ុន សែន។
លោកថ្លែងថា៖ «ខ្ញុំបាទសូមអភ័យទោសដល់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសដែលខ្ញុំបាននិយាយទៅកាន់សមាជិកសមាជិកាគណបក្សភ្លើងទៀន កាលពីថ្ងៃមុនស្តីពីបញ្ហាស៊ីហ្គេម ដែលធ្វើឱ្យមតិជាតិ និងអន្តរជាតិយល់ច្រឡំ។ ដូច្នេះក្នុងនាមខ្ញុំ សូមអភ័យទោសដល់សម្តេចតេជោ ក៏ដូចជារាជរដ្ឋាភិបាលទាំងមូល ដែលខ្ញុំបាននិយាយជ្រុលហួស ហើយខ្ញុំសូមអភ័យទោសនូវអ្វីដែលខ្ញុំបាននិយាយកន្លងមក»។
នៅក្នុងវីដេអូនោះ លោក ស ឡុងដេត ក៏បានផ្តាច់ខ្លួនចេញពីគណបក្សភ្លើងទៀន និងសុំចូលរួមជីវភាពនយោបាយជាមួយគណបក្សប្រជាជនកម្ពុជា។
ក្រោយការសុំទោស លោក ហ៊ុន សែន បានសរសេរនៅលើប្រព័ន្ធតេឡេក្រាមរបស់លោកថា៖ «ដោយដឹងនូវកំហុសលោក ស ឡុងដេត បានធ្វើការសុំទោសដូចមានក្នុងវីដេអូនេះ។ ដោយសាម៉ីខ្លួនបានដឹងកំហុស និងបានសុំទោសជាសាធារណៈ ខ្ញុំស្នើសុំដល់ក្រសួងយុត្តិធម៌ធ្វើការជាមួយដើមបណ្តឹង និងតុលាការ ដើម្បីបញ្ចប់រឿងក្តីនេះតាមវិធីដែលអាច ធ្វើទៅបានដូចជា ការដកពាក្យបណ្តឹងឬលើកលែងការចោទប្រកាន់»។
វីអូអេមិនទាន់អាចសុំការអត្ថាធិប្បាយពីអ្នកនាំពាក្យតុលាការរាជធានីភ្នំពេញ លោក ប្លង់ សុផល បាននៅឡើយទេ។
អ្នកនាំពាក្យគណបក្សភ្លើងទៀន លោក គីមសួរ ភិរិទ្ធ លើកឡើងថាការរិះគន់នេះ គ្រាន់តែជាការបញ្ចេញមតិរបស់លោក ស ឡុងដេតតែប៉ុណ្ណោះ។ លោកបន្ថែមថាបើទោះបីជាមានការចាកចេញរបស់សកម្មជន ឬអ្នកគាំទ្រពីបក្សប្រឆាំងទៅគណបក្សកាន់អំណាច គណបក្សនៅតែមានអ្នកដែលមានឆន្ទៈតស៊ូ ដើម្បីដើរទៅមុខទៀត។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ប្រាប់វីអូអេថាការរឹតត្បិតការបញ្ចេញមតិរងការរិះគន់ច្រើនពីសំណាក់សមាគមន៍អន្តរជាតិ ក៏ដូចជាអ្នកជំនាញសិទ្ធិមនុស្សរបស់អង្គការសហប្រជាជាតិ។
លោកបញ្ជាក់ថា៖ «យើងជាអង្គការសង្គមស៊ីវិលដែលធ្វើការលើផ្នែកសិទ្ធិមនុស្ស សូមឱ្យមានការថ្លឹងថ្លែងដែរថាអ្វីដែលជាបទល្មើសនៅក្នុងការបញ្ចេញមតិហ្នឹង ហើយអ្វីជាសិទ្ធិសេរីភាពក្នុងការបញ្ចេញមតិ ដើម្បីកុំឱ្យមានការប៉ះពាល់ឬក៏ការយល់ខុសគ្នា ឬក៏មានការភាន់ច្រឡំជាមួយគ្នា»។
លោក អំ សំអាត បន្ថែមថាការបញ្ចេញមតិមួយចំនួនរបស់អ្នកនយោបាយធ្លាប់ត្រូវបានរដ្ឋាភិបាលប្តឹងផ្តល់ រហូតមានការចោទប្រកាន់ជាប់ពាក់ព័ន្ធនឹងបទល្មើសបរិហារកេរ្តិ៍ផងដែរ៕
