នាយករដ្ឋមន្ត្រីកម្ពុជាលោកហ៊ុន សែន បានបង្ហាញក្តីរីករាយចំពោះព័ត៌មាន ពី ប្រទេសថៃ ដែលបញ្ជាក់ថានឹងគ្មានការបណ្តេញពលករខ្មែរចេញពីការងារនៅទីនោះ ខណៈប្រទេសថៃកំពុងស្ថិតក្នុងដំណាក់កាលនៃការរៀបចំរដ្ឋាភិបាលថ្មី ក្រោយការបោះឆ្នោតមួយកាលពីខែឧសភា។
ថ្លែងនៅឯពិធីជួបជុំជាមួយកម្មកររោងចក្រសហគ្រាសនៅខេត្តកំពង់ឆ្នាំង កាលពីព្រឹកថ្ងៃព្រហស្បតិ៍ លោកហ៊ុន សែន លើកឡើងថា ថៃមិនមានគោលនយោបាយ បណ្តេញពលករកម្ពុជា ចេញពីប្រទេសទេ បើទោះបីជាគណបក្សជំទាស់មួយឈ្មោះ ឆ្ពោះទៅមុខ (Move Forward) បានបង្ហាញបំណងចង់បណ្តេញពលករខ្មែរ និងឡាវចេញពីប្រទេសថៃ។
លោកថ្លែងថា៖ «ម្សិលមិញមានការបញ្ជាក់យ៉ាងជាក់លាក់ថា គឺអត់មានទេ។ គេនឹងសម្រួលឱ្យថែមទៀតផង។ បើដូច្នោះ គឺយើងលែងកង្វល់ជាមួយនឹង ការចាកចេញរបស់កម្មករកម្មការិនីរបស់យើងដែលកំពុងធ្វើការក្នុងប្រទេសថៃ»។
ពលករខ្មែរដែលកំពុងរស់នៅនិងធ្វើការក្នុងប្រទេសថៃមានចំនួនជាង២លាន២សែននាក់។ ក្នុងនោះពលករខ្មែរដែលប្រើប្រាស់ឯកសារហួសសុពលភាពមានប្រមាណ៣០ទៅ៤០ភាគរយ ដែលកើតឡើង ដោយសារបញ្ហាកូវីដ១៩ និងការស្នើសុំឯកសារនៅមានភាពស្មុគស្មាញ។នេះបើតាមក្រុមអង្គការសិទ្ធិមនុស្សដែលធ្វើការលើផ្នែកការពារសិទ្ធិពលករចំណាកស្រុក។
ប្រទេសថៃទើបតែបានបញ្ចប់ការបោះឆ្នោតជ្រើសរើសតំណាងរាស្ត្រអាណត្តិថ្មីរបស់ខ្លួន កាលពីពាក់កណ្តាលខែឧសភា ឆ្នាំ២០២៣។ គណបក្ស Move Forward ទទួលបានសំឡេងគាំទ្រច្រើនជាងគេ ដោយទទួលបានសំឡេង១៥១អាសនៈក្នុងចំណោមអាសនៈចំនួន៥០០នៅក្នុងសភាជាន់ទាប។ គណបក្ស Pheu Thai ដែលដឹកនាំដោយកូនស្រីរបស់អតីតនាយករដ្ឋមន្ត្រីលោក Thaksin Shinawatra ទទួលបាន១៤១អាសនៈ។
ការប្រកាសនាយករដ្ឋមន្ត្រីថៃជាផ្លូវការនឹងធ្វើឡើងក្នុងរយៈពេល៦០ថ្ងៃ បន្ទាប់ពីការបោះឆ្នោត ដែលត្រូវការ៣៧៦សំឡេង ទើបអាចបង្កើតរដ្ឋាភិបាលបាន៕
លោកហ៊ុន សែនសាទរនឹងភាគីថៃដែលនឹងមិនបណ្តេញពលករកម្ពុជាចេញពីប្រទេស
