លោកហ៊ុន សែន នាយករដ្ឋមន្ត្រីនិងជាអនុប្រធានគណបក្សប្រជាជនកម្ពុជា បានប្រកាសដាច់ណាត់នៅថ្ងៃអង្គារនេះថា គណបក្សរបស់លោកនឹងមិនធ្វើការចរចាជាមួយគណបក្សសង្គ្រោះជាតិជាដាច់ខាត ប្រសិនបើគណបក្សជំទាស់នៅតែទទូចឲ្យមានការបោះឆ្នោតជ្រើសតាំងសមាសភាពគណកម្មាធិការជាតិរៀបចំការបោះឆ្នោតដោយសម្លេង២ភាគ៣ នៃសមាជិកសភានោះ។
ថ្លែងក្នុងពិធីទិវាមច្ឆាជាតិក្នុងខេត្តកំពង់ឆ្នាំងកាលពីព្រឹកថ្ងៃអង្គារ៍ លោកហ៊ុន សែន និយាយថាការបោះឆ្នោតជ្រើសតាំងសមាសភាពគណកម្មាធិការជាតិរៀបចំការបោះឆ្នោត (គជប)តាមរូបមន្ត២ភាគ៣នឹងបង្កឲ្យមានភាពជាប់គាំងនយោបាយ។
«បើអ្នកឯងទារ២ភាគ៣គឺអត់ទេ។និយាយដាច់ខាតគឺអត់ទេ។ អ្នកឯងធ្វើអ្វីធ្វើទៅ។ អ្នកឯងថាបើមិនបានបោះឆ្នោតដោយសម្លេង២ភាគ៣ក្នុងរដ្ឋសភាអ្នកឯងមិនចូល(ប្រជុំសភា) អ្នកឯងមិនចូលហីទៅ។ ឥឡូវអ្នកឯងមិនទាន់ចូល ខ្ញុំមានទាន់ងាប់ឯណា។ប្រជាជនខ្មែរមានទាន់ងាប់ឯណា។ធ្វើដូចមេម៉ាហ្វ្យ៉ាម៉េច។»
ប្រទេសកម្ពុជាកំពុងស្ថិតក្នុងវិបត្តិនយោបាយអស់រយៈពេលជិតមួយឆ្នាំមកហើយចាប់តាំងពីការបោះឆ្នោតជ្រើសតាំងតំណាងរាស្ដ្រកាលពីខែកក្កដាឆ្នាំ២០១៣។ ហើយអ្វីដែលនាំឲ្យជាប់គាំងនៅក្នុងពេលនេះគឺការខ្វែងគំនិតគ្នាលើការអនុម័តបង្កើតសមាសភាព(គជប)។ ចំណុចនេះគឺជាការប្រទាញប្រទង់គ្នាយ៉ាងតឹងតែងបំផុត។
គណបក្សសង្គ្រោះជាតិបានស្នើឲ្យដាក់គជប ជាស្ថាប័នធម្មនុញ្ញឬមានន័យថាត្រូវចែងក្នុងរដ្ឋធម្មនុញ្ញហើយការជ្រើសតាំងសមាសភាពនៃគជប ត្រូវមានការយល់ព្រមពីសមាជិកសភាចំនួន២ភាគ៣។
គណបក្សប្រជាជនកម្ពុជាបានយល់ស្របឲ្យដាក់ស្ថាបន័រៀបចំការបោះឆ្នោតនេះទៅជាស្ថាបន័ធម្មនុញ្ញ ប៉ុន្តែមិនយល់ព្រមឲ្យមានការបោះឆ្នោតជ្រើសតាំងសមាសភាពនៃស្ថាបន័នេះដោយសម្លេង២ភាគ៣នៃសមាជិកសភាទេ។ គឺគណបក្សកាន់អំណាចទាមទារឲ្យការបោះឆ្នោតជ្រើសតាំងសមាសភាព គជប នេះដោយសម្លេង៥០បូក១នៃសមាជិកសភាសរុប។
ទោះជាបែបនេះក្តីលោក យ៉ែម ប៉ុញ្ញរិទ្ធ តំណាងរាស្ដ្រនិងជាអ្នកនាំពាក្យគណបក្សសង្គ្រោះជាតិមានប្រសាសន៍ថាគណបក្សជំទាស់នៅតែរក្សាជំហរទាមទារការបោះឆ្នោតជ្រើសតាំងគជបដោយសម្លេង២ភាគ៣នៃតំណាងរាស្ដ្រសរុបក្នុងរដ្ឋសភា។
«គជប ជាមូលហេតុ ជាឫសគល់នៃបញ្ហា។ ដោយសារគជប តែងតាំងឡើងដោយបក្សកាន់អំណាច។ដូច្នេះយើងចង់ឲ្យស្ថាប័ននេះទៅផុតដៃពីបក្សតែមួយ។អញ្ចឹងជំហររបស់គណបក្សសង្គ្រោះជាតិគឺត្រូវការដាច់ខាត(សម្លេង)២ភាគ៣សម្រាប់ជ្រើសតាំងសមាសភាព គជប។»
ក្នងពេលនេះដែរលោកនាយករដ្ឋមន្ត្រី ហ៊ុន សែន បានទទូចឲ្យមានការសម្រុះសម្រួលគ្នាបែបនយោបាយដើម្បីឈានដល់ចំណុចបោះឆ្នោតនោះ។ ប៉ុន្តែលោកបានព្រមានធ្ងន់ធ្ងន់ថាប្រសិនបើគណបក្សជំទាស់ដឹកនាំបាតុកម្មតវ៉ាចំពោះបញ្ហាទាំងនេះ នោះនឹងមានការឆ្លើយតបវិញជាមិនខាន។មួយវិញទៀតលោកបានអះអាងថាគណបក្សប្រជាជនកម្ពុជានឹងបន្តដឹកនាំរហូតដល់បោះឆ្នោតជាថ្មីនៅឆ្នាំ២០១៨ប្រសិនបើចន្លោះពេលនោះនឹងមិនមានដំណោះស្រាយនយោបាយបែបណាទេនោះ។
លោកបណ្ឌិតឡៅ ម៉ុងហៃ អ្នកវិភាគនយោបាយឯករាជ្យគិតថាការធ្វើបែបនេះនឹងធ្វើឲ្យរដ្ឋាភិបាលបាត់បង់ភាពស្របច្បាប់របស់ខ្លួនលើឆាកអន្តរជាតិ។
ហើយលោកយល់ថាប្រសិនបើគណបក្សទាំងពីរប្រកាន់ជំហររឹងរូសដាក់គ្នានេះនឹងធ្វើឲ្យភាពជាប់គាំងនយោបាយ អូសបន្លាយ។
«បើសិនស្ថិតក្នុងជំហររឹងដូចគ្នាបែបនេះនឹងនៅជាប់គាំង។ ប៉ុន្តែគេនឹងមានរូបមន្តមួយផ្សេងទៀតដូចអាមេរិកាំងបានជួយរករូបមន្តនេះគឺឃើញរូបមន្តSuper Majority។ដើម្បីឲ្យមានការមូលមាត់គ្នាឲ្យបានច្រើនពីសំណាក់គណបក្សទាំងពីរ»។
គណបក្សប្រជាជនកម្ពុជានិងគណបក្សសង្គ្រោះជាតិបានព្រមព្រៀងគ្នាធ្វើការកែទម្រង់ការបោះឆ្នោតប៉ុន្តែនៅមិនទាន់ចុះសម្រុងគ្នាមួយចំនួនដែលត្រូវបានដោះស្រាយនៅឡើយ។
ក្រុមអង្គការសង្គមស៊ីវិលនិងអង្គការអន្តរជាតិរួមទាំងសហគមអឺរ៉ុបនិងអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកសូរិយា ប្រសាទ ស៊ូបេឌី ធ្លាប់បានជំរុញឲ្យមានការចូលពីគណបក្សជំទាស់ក្នុងការអនុម័តសមាសភាពគជបនេះ។
ប៉ុន្តែនៅក្នុងពេលនេះគណបក្សជាប់ឆ្នោតទាំងពីរបានផ្អាកការចរចាគ្នានិងមិនទាន់ស្រុះស្រួលគ្នាចាប់ផ្តើមការចរចាគ្នាឡើងវិញនៅឡើយដោយសារភាពមិនចុះសម្រុងផ្នែកនយោបាយ៕
