ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ហ៊ុន សែន ហៅ​ការ​អំពាវ​នាវ​របស់​លោក សម រង្ស៊ី ថា​«មាន​គោល​បំណង​ឲ្យ​ពលរដ្ឋ​ទៅ​ដណ្តើម​វ៉ាក់​សាំង»


រូបឯកសារ៖ លោក​នាយករដ្ឋមន្រ្តី ហ៊ុន សែន ថ្លែងនៅ​ក្នុង​​ពិធី​បើក​ការ​ដ្ឋាន​សាង​សង់​ស្ពាន​ឆ្លង​កាត់​ទន្លេ​បាសាក់ តភ្ជាប់​រាជធានី​ភ្នំពេញ ពី​ទីក្រុង​កោះពេជ្រ ទៅ​កាន់​ទីក្រុង​រណប​កោះ​នរា ​នៅ​ព្រឹក​ថ្ងៃ​ចន្ទ​ ទី ២៦ ខែតុលា ឆ្នាំ២០២០។
រូបឯកសារ៖ លោក​នាយករដ្ឋមន្រ្តី ហ៊ុន សែន ថ្លែងនៅ​ក្នុង​​ពិធី​បើក​ការ​ដ្ឋាន​សាង​សង់​ស្ពាន​ឆ្លង​កាត់​ទន្លេ​បាសាក់ តភ្ជាប់​រាជធានី​ភ្នំពេញ ពី​ទីក្រុង​កោះពេជ្រ ទៅ​កាន់​ទីក្រុង​រណប​កោះ​នរា ​នៅ​ព្រឹក​ថ្ងៃ​ចន្ទ​ ទី ២៦ ខែតុលា ឆ្នាំ២០២០។

លោក​នាយក​រដ្ឋមន្រ្តី ហ៊ុន សែន បាន​ហៅ​ការ​អំពាវ​នាវ​របស់​លោក សម រង្ស៊ី​ឲ្យ​ប្រជាពលរដ្ឋ​កម្ពុជា​ទៅ​ចាក់​វ៉ាក់​សាំង​របស់​ចិន គឺ​ជា​ «វិធី​រុញ​ទូក​បណ្តោយ​ទឹក» ដោយ​ចោទ​ថា​មេដឹកនាំ​បក្ស​ប្រឆាំង​រូប​នោះ មាន​គោល​បំណង​មិន​ល្អ។

ការ​លើក​ឡើង​របស់​លោក ហ៊ុន សែន ភ្លាម​ៗ បន្ទាប់​ពី​លោក សម រង្ស៊ី ដែល​កំពុង​និរទេស​ខ្លួន​នៅ​ក្រៅ​ប្រទេស​បាន​បង្ហោះ​សារ​អំពាវនាវ​តាម​ប្រព័ន្ធ​សង្គម​ហ្វេស​ប៊ុក​របស់​លោក ​កាល​ពី​ថ្ងៃ​ទី ​១១ ខែ​មេសា ដោយ​អំពាវនាវ​ឲ្យ​ប្រជាពលរដ្ឋ​ទៅ​ចាក់​វ៉ាក់​សាំង​របស់​ចិន​ដែល​កម្ពុជា​កំពុង​ប្រើប្រាស់ ដែល​ជា​ជំនួយ​មនុស្ស​ធម៌​ផង​និង​ទិញ​ពី​ក្រុមហ៊ុន​ចិន​ផង។

ក្នុង​សារ​អំពាវ​នាវ​ជា​វីដេអូ​មួយ​ជាង​ ២​នាទី លោក សម រង្ស៊ី ដែល​កំពុង​និរ​ទេស​ខ្លួន​នៅប្រទេស​បារាំង និង​ប្រឈម​នឹង​ការ​ជាប់​ពន្ធនាគារ​នៅ​កម្ពុជា បាន​ថ្លែង​ថា ​លោក​ធ្លាប់​លើក​ឡើង​ពី​កត្តា​សុវត្ថិភាព​និង​ប្រសិទ្ធភាព​នៃ​វ៉ាក់​សាំង​បង្ការ​ជំងឺ​កូវីដ​១៩។ លោក​បន្ត​ថា ​ក្នុង​កាលៈ​ទេសៈ​នេះ វ៉ាក់​សាំង​របស់​ចិន​ក៏​មាន​ប្រសិទ្ធភាព​អាច​ទទួល​យក​បាន ហើយ​អាច​ប្រើ​ប្រាស់​បាន ជា​ជាង​ការ​ពុំ​មាន​វ៉ាក់​សាំង​ចាក់​បង្ការ​ជំងឺ​កូវីដ​១៩។

លោក​ថ្លែង​ថា៖ «សរុប​ទៅ​ខ្ញុំ​យល់​ឃើញ​ថា​យើង​ត្រូវ​តែ​ទទួល​យក។ វ៉ាក់​សាំង​ចិន​នេះ គឺ​ជា​វ៉ាក់​សាំង​ដែល​យើង​អាច​ទទួល​យក​បាន ពី​ព្រោះ​បើ​យើង​មើល​កត្តា​សុវត្ថិ​ភាព អត់​មាន​តួ​លេខ​អត់​មាន​ព័ត៌មាន​អី​ដែល​បង្ហាញ​ថាវ៉ាក់សាំង​នេះ​បង្ហាញ​មក​នូវ​គ្រោះ​ថ្នាក់​ទេ។ ដូច្នេះ​សូម​កុំ​ឲ្យ​មាន​ពាក្យ​ចចាម​អារ៉ាម ហើយ​បញ្ចប់​ពាក្យ​ចចាម​អារ៉ាម​ថា ​វ៉ាក់​សាំង​នេះ​គ្រោះ​ថ្នាក់ គេ​ប្រើ​វិធី​នេះ​មក​សម្លាប់​យើង​អី កុំ​[និយាយ] កុំ​នឹក​ឃើញ​អញ្ចឹង​ឲ្យ​សោះ ពី​ព្រោះ​សម័យ​នេះ ប្រទេស​ចិន ជា​ប្រទេស​ដែល​មាន​កិត្តិយស​គេ​ចេះ​ថែ​រក្សា​កិត្តិយស​របស់​ខ្លួន មិន​អាច​យក​វ៉ាក់​សាំង​នេះ​មកលេង​សើច ហើយ​មក​សម្លាប់​គេ​សម្លាប់​ឯង​ទេ»។

លោក សម រង្ស៊ី បន្ថែម​ថា៖ «អញ្ចឹង​ក្នុង​លក្ខណៈ​ដែល​មាន​ប្រសិទ្ធភាព​ត្រឹម​តែ​វ៉ាក់សាំង​ចិន​ឥឡូវ ក៏​យើង​អាច​ទទួល​យក​បាន​ដែរ ពី​ព្រោះ​បើ​យើង​មិន​ទទួល​យក​អាហ្នឹង​គ្រោះ​ថ្នាក់​ធំ​ណាស់ អាហ្នឹង​អត់​ការពារ​យើង​ទាំង​អស់ ការ​ពារ​សូន្យ»។

សារ​អំពាវនាវ​របស់​លោក សម រង្ស៊ី ដែល​ធ្លាប់​រិះគន់​រដ្ឋាភិបាល​កម្ពុជា​ក្នុង​ការ​ទទួល​យក​វ៉ាក់សាំង​ចិន​មក​ចាក់​ប្រជាពលរដ្ឋ​ត្រូវ​បាន​លោក​នាយក​រដ្ឋមន្រ្តី ហ៊ុន សែន ថ្លែង​ប្រតិកម្ម​ដោយ​មិន​បញ្ចេញ​ឈ្មោះ​លោក សម រង្ស៊ី នោះ​ទេ។ នៅ​ក្នុង​សារ​សំឡេង​ជាង​ ៦ ​នាទី ដែល​ត្រូវ​បាន​ផ្សព្វផ្សាយ​នៅ​ថ្ងៃ​ច័ន្ទ​នេះ លោក ហ៊ុន សែន លើក​ឡើង​ថា​ ការ​អំពាវ​នាវ​របស់​មេដឹកនាំ​បក្ស​ប្រឆាំង មិន​មាន​ចេតនា​ល្អ​នោះ​ទេ។

លោក ហ៊ុន សែន ថ្លែង​ថា៖ «នេះ​ជា​វិធី​រុញ​ទូក​បណ្តោយ​ទឹក មិន​មែន​ដើម្បី​សេចក្តី​សុខ​របស់​ប្រជា​ជន​ទេ ក៏​ប៉ុន្តែ​ជា​គោល​បំណង​ធំ​បំផុត​របស់​គេ គឺ​ជំរុញ​ឲ្យ​ប្រជាជន​មក​ដណ្តើម​វ៉ាក់សាំង ក្នុង​ពេល​ដែល​យើង​មាន​វ៉ាក់សាំង​មិន​គ្រប់»។

លោក​បន្ថែម​ថា៖ «វា​បែរ​ជា​ជំរុញ​ប្រជា​ជន​មិន​មែន​ជា​បំណង​ល្អ​របស់​វា​ទេ ​តែ​ទិស​ដៅ​របស់​វា​គឺ​មាន​ចំណុច​ផ្សេង​គឺ​ត្រង់​ថា​ ជំរុញ​ឲ្យ​ប្រជាជន​មក​ទទួល​វ៉ាក់​សាំង​ក្នុង​ពេល​តែ​មួយ​ដែល​ជា​ចំណុច​ដ៏​អាក្រក់​នៃ​ពូជ​ក្បត់​ជាតិ​មួយ​នេះ»។

លោក ហ៊ុន សែន បាន​អំពាវនាវ​ឲ្យ​ប្រជា​ពលរដ្ឋកម្ពុជា​រង់​ចាំ​ការ​ចាក់​វ៉ាក់សាំង​តាម​ក្រុម​អាទិភាព ដែល​បាន​កំណត់ ដោយ​លោក​ថា ​រដ្ឋាភិបាលរបស់​លោក​មាន​គោល​ដៅ​ចាក់​វ៉ាក់​សាំង​ដល់​ពលរដ្ឋ​យ៉ាង​តិច​ ១០​ លាន​នាក់ ​នៃ​ប្រជាជន​សរុប​ជាង ​១៦ ​លាន​នាក់។

រូបឯកសារ៖ មន្ត្រីម្នាក់ប្រចាំក្រសួងព័ត៌មានទទួលចាក់វ៉ាក់សាំងបង្ការជំងឺកូវីដ១៩ ស៊ីណូវ៉ាក់ (Sinovac) របស់ចិន នៅក្រសួងព័ត៌មាន ក្នុងរាជធានីភ្នំពេញ កាលពីថ្ងៃទី ១ ខែមេសា ឆ្នាំ ២០២១។
រូបឯកសារ៖ មន្ត្រីម្នាក់ប្រចាំក្រសួងព័ត៌មានទទួលចាក់វ៉ាក់សាំងបង្ការជំងឺកូវីដ១៩ ស៊ីណូវ៉ាក់ (Sinovac) របស់ចិន នៅក្រសួងព័ត៌មាន ក្នុងរាជធានីភ្នំពេញ កាលពីថ្ងៃទី ១ ខែមេសា ឆ្នាំ ២០២១។

កម្ពុជា​រហូត​មក​ដល់​ពេល​នេះ ចាក់​វ៉ាក់សាំង​បង្ការ​ជំងឺ​កូវីដ​១៩ ដល់​ប្រជាពលរដ្ឋ​បាន​ប្រមាណ​ ១ ​លាន​នាក់ ដែល​ភាគ​ច្រើន​បំផុត​ជា​វ៉ាក់​សាំង​របស់​ចិន​គឺ​ស៊ីណូហ្វាម (Sinopharm) ដែល​ផលិត​ដោយ​រដ្ឋ​ចិន និង​វ៉ាក់សាំង​ស៊ីណូវ៉ាក់ (Sinovac) ដែល​ផលិត​ដោយ​ក្រុមហ៊ុន​ចិន​នៅ​ទីក្រុង​ប៉េកាំង។

កាល​ពី​ថ្ងៃ​អាទិត្យ រដ្ឋាភិបាល​របស់​លោក ហ៊ុន សែន​បាន​កំណត់​ការ​ចាក់​វ៉ាក់សាំង​គឺ​ជា​កាតព្វកិច្ច​មួយ​សម្រាប់​មន្រ្តី​រាជការ​សាធារណៈ​ទាំង​ក្នុង​ស្ថាប័ន​នីតិ​ប្រតិបត្តិ នីតិ​ប្បញ្ញត្តិ​និង​ស្ថាប័ន​តុលាការ ព្រម​ទាំង​ក្រុម​មនុស្សដែល​មាន​អាណត្តិ​ពី​ការ​បោះ​ឆ្នោត ដូច​ជា​ក្រុម​ប្រឹក្សា​ឃុំ​សង្កាត់​ជា​ដើម។ ការ​សម្រេច​នេះ ក្រោយ​ការ​ថ្លែង​របស់​លោក ហ៊ុន សែន ថា ​មាន​មន្រ្តី​រាជការ​មួយ​ចំនួន​ដែល​ជា​ក្រុម​អាទិភាព មិន​ទាន់​ចាក់​វ៉ាក់សាំង។​

កាល​ពី​ថ្ងៃ​ទី ​១០ ខែ​មេសា លោក សម រង្ស៊ី បាន​បង្ហោះ​សារ​នៅ​លើ​ហ្វេស​ប៊ុក​របស់​លោក ក្រោម​ចំណង​ជើង​ថា​«តើ​គួរ​បង្ខំ​ឲ្យ​ពលរដ្ឋ​ចាក់​វ៉ាក់​សាំង​ចិន​ទាំង​អស់​គ្នា​ឬ​ទេ?»។ លោក​លើក​ឡើង​ថា ​មក​ដល់​ថ្ងៃ​ទី​ ១០ ខែ​មេសា វ៉ាក់សាំង​បង្ការ​ជំងឺ​កូវីដ​១៩ ​របស់​ចិន មិន​ទាន់​ត្រូវ​បាន​អង្គការ​សុខភាព​ពិភព​លោក ​(WHO)​ ទទួល​ស្គាល់​ថា​ មាន​សុវត្ថិភាព​និង​ប្រសិទ្ធ​ភាព​ពេញ​លេញ​នៅ​ឡើយ​ទេ។

លោក សម រង្ស៊ី ក៏​បាន​រិះគន់​ថា​ តើ​ហេតុអ្វី​បាន​ជា​លោក​នាយករដ្ឋមន្រ្តី​ហ៊ុន សែន បាន​រៃ​អង្គាស​ប្រាក់​រាប់​សិប​លាន​ដុល្លារ ដោយ​លោក​ចោទ​ថា ​«បោក​បញ្ឆោត​ប្រជារាស្ត្រ​ខ្មែរ​ថា​យក​ទៅ​ទិញ​វ៉ាក់​សាំង [ហើយ]​គាត់​មិន​ខិត​ខំ​រក​ទិញ​វ៉ាក់​សាំង​ល្អៗ​ជាង​គេ​ក្នុង​ពិភព​លោក តែ​បែរ​មក​រំពឹង​តែ​លើ​វ៉ាក់​សាំង​ចិន​ទៅ​វិញ?»។

លោក ស៊ឹង​ សែនករុណា អ្នកនាំ​ពាក្យ​សមាគម​សិទ្ធិ​មនុស្ស​អាដហុក មាន​ប្រសាសន៍​ថា ​ការ​អំពាវ​នាវ​របស់​លោក សម រង្ស៊ី ចុង​ក្រោយ​នេះ មើល​ទៅ​ស្រប​គំនិត​គ្នា​ជាមួយ​រដ្ឋាភិបាល គឺ​គោល​បំណង​ឲ្យ​ពលរដ្ឋ​ទៅ​ចាក់​វ៉ាក់សាំង និង​មិន​មាន​ភាព​ប្រទាំង​ប្រទើសគ្នា​នោះទេ។

លោក​បញ្ជាក់​ថា៖ «គោល​បំណង​ហ្នឹង វា​ហាក់​ដូច​ជា​ស្រប​គ្នា ហើយ​វា​ទៅ​ជា​មាន​គំនិត​មិន​ល្អ យើង​អត់​យល់​ពី​ការ​យល់​ឃើញ​របស់​គាត់ ក្នុង​ភាព​ស៊ី​ជម្រៅ​បែប​ម៉េច។ អាហ្នឹង​យើង​អត់​មាន​យោបល់​ពីព្រោះ​ជា​ធម្មតា មនុស្ស​ម្នាក់​មាន​ទស្សនៈ មាន​គំនិតនៃ​ការ​គិត​របស់​ខ្លួន​រៀង​ខ្លួន»។

លោក​បន្ត​ថា​ អាជ្ញាធរ​កម្ពុជាមិន​គួរចាប់​ខ្លួន​ប្រជា​ពលរដ្ឋ​ដែល​មិន​ទាន់​មាន​ការ​យល់​ដឹង​ស៊ី​ជម្រៅ​លើ​វ៉ាក់សាំង​នោះ​ទេ ដោយ​ពួកគេ​បាន​បញ្ចេញ​យោបល់​លើ​ប្រព័ន្ធ​សង្គម​ហ្វេស​ប៊ុក។

លោក​បញ្ជាក់​ថា៖ «សម្រាប់​ខ្ញុំ​ខ្ញុំ​យល់​ថា​បើ​សិន​ជា​វ៉ាក់សាំង​ទាំង​ឡាយ​ណា ដែល​មាន​គុណភាព​ឬ​ក៏​ប្រសិទ្ធភាព​ល្អ​ហើយ មិន​គួរ​ខ្លាចការ​លើក​ឡើងពី​សាធារណជន ឬ​ក៏​ប្រជាពលរដ្ឋ​ទេ»។

ពាក់ព័ន្ធ​នឹង​ទំនុក​ចិត្ត​លើវ៉ាក់សាំង​នេះ អាជ្ញាធរ​កម្ពុជា​ក៏​បាន​ចាប់​ខ្លួន​មនុស្ស​មួយ​ចំនួន​ផង​ដែរ ទាក់​ទង​នឹង​ការ​រិះគន់​គុណភាព​វ៉ាក់សាំង។ កាល​ពី​ខែ​មីនា ឆ្នាំ​ ២០២១ ព្រះរាជ​អាជ្ញា​តុលាការ​រាជធានី​ភ្នំពេញ​បាន​សម្រេច​ចោទ​ប្រកាន់​បុរស​ម្នាក់​ដោយ​ប្រើ​ប្រាស់​ច្បាប់​បង្ការ​ជំងឺ​កូវីដ​១៩ ​លើក​ដំបូង ពាក់​ព័ន្ធ​នឹង​ការ​អត្ថាធិប្បាយ​លើ​បណ្ដាញ​សង្គម​កុំ​ឲ្យ​កម្មករ​រោងចក្រ​ចាក់​វ៉ាក់​សាំង​របស់​ចិន។

បុរស​ដែល​ត្រូវ​បាន​ចាប់​ខ្លួន​នោះបាន​បង្ហោះ​វីដេអូ​ឃ្លីប​នៅ​លើ​បណ្ដាញ​សង្គម ​TikTok ​របស់​ខ្លួន ដោយ​លើក​ឡើង​ថា ​កម្មករ​រោង​ចក្រ​ទាំង​អស់កុំ​ចាក់​វ៉ាក់​សាំង​បង្ការ​ជំងឺ​កូវីដ​១៩ ដែល​ផលិត​ដោយ​ចិន ដោយ​ថា ​វា​អាច​ប៉ះពាល់​ដល់​ជីវិត។

មាត្រា​ ១១ នៃ​ច្បាប់​ស្តីពី​កូវីដ​ដែល​ត្រូវ​បាន​ប្រកាស​ឲ្យ​ប្រើ​ប្រាស់​ជា​ប្រញាប់​កាល​ពី​ថ្ងៃ​ទី ១១ ខែ​មីនា ចែង​ថា ​អំពើ​រារាំង​ឬ​បង្ក​ឧបសគ្គ​ដោយ​ចេតនា​ដល់​ការ​អនុវត្ត​វិធានការ​ ដែល​បាន​ដាក់​ចេញ​ស្រប​តាម​ច្បាប់​នេះ ត្រូវ​ផ្តន្ទា​ទោស​ដាក់​ពន្ធនា​គារ​ពី ​៦ ​ខែ​ទៅ ​៣ ​ឆ្នាំ។

ចំណែក​កាល​ពី​ថ្ងៃ​ទី ​៩ ខែ​មេសា បុរស​ម្នាក់​ទៀតរស់​នៅ​ក្នុង​ខេត្ត​កំពង់​ស្ពឺ ដែល​ថត​វីដេអូ​បង្ហោះ​នៅ​លើ​បណ្ដាញ​សង្គម ​TikTok ក៏​ត្រូវ​បាន​ចាប់​ខ្លួន​ផង​ដែរ។ ស្នងការ​នគរបាល​ខេត្ត​កំពង់​ស្ពឺ​បាន​ចោទ​បុរស​ម្នាក់​នោះ​ថា​ ញុះញ​ង់​អំពី​ការ​ចាក់​វ៉ាក់​សាំង​ពុំ​មាន​គុណ​ភាព​នៅ​កម្ពុជា​និង​មិន​ឲ្យ​មន្ត្រី​រាជការទៅចាក់​វ៉ាក់​សាំង​ជា​ដើម។ នេះ​បើ​យោង​តាម​ហ្វេស​ប៊ុក​របស់​ស្នង​ការ​ដ្ឋាន​នគរ​បាល​ខេត្ត​កំពង់​ស្ពឺ៕

XS
SM
MD
LG