នៅថ្ងៃសុក្រនេះ អ្នកដឹកនាំនយោបាយកំពូលពីររូបរបស់ប្រទេសកម្ពុជាដាក់ល្បែងភ្នាល់ឲ្យគ្នាទៅវិញទៅមក។ ប៉ុន្តែអ្នកវិភាគយល់ថា ការភ្នាល់គ្នានេះគឺជារឿងឥតបានការ។
លោកហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា កំពុងកាន់អំណាចជាឯកបក្ស នៅព្រឹកថ្ងៃសុក្រនេះ ត្រូវសារព័ត៌មានស្និទ្ធនឹងរដ្ឋាភិបាល Freshnews ស្រង់សម្តីថា លោកភ្នាល់ជាមួយលោកសម រង្ស៊ី ថា ប្រសិនបើលោកមិនចាប់ខ្លួនលោកសម រង្ស៊ី ក្នុងរយៈពេល២៤ម៉ោង ក្រោយពីលោកសម រង្ស៊ី ឈានជើងចូលប្រទេសកម្ពុជាទេ លោកសុខចិត្តចុះចេញពីតំណែង។ ប៉ុន្តែបញ្ច្រាសមកវិញ បើសិនដល់ថ្ងៃកំណត់នៅថ្ងៃទី៩ខែវិច្ឆិកា លោកសម រង្ស៊ីមិនហ៊ានវិលត្រឡប់មកប្រទេសកម្ពុជាទេតើ លោកសម រង្ស៊ី ហ៊ានបញ្ចប់ជីវិតនយោបាយ និងរំលាយអង្គការចាត់តាំងនយោបាយរបស់ខ្លួនដែរឬទេ។
ការដាក់ភ្នាល់នេះធ្វើឡើងមួយថ្ងៃ បន្ទាប់ពីលោកសម រង្ស៊ី ដែលកំពុងនិរទេសខ្លួន ធ្វើសេចក្តីអធិប្បាយលើទំព័រហ្វេសប៊ុករបស់ខ្លួនអំពីអត្ថបទមួយរបស់កាសែតភ្នំពេញប៉ុស្ត ដោយប្រកាសភ្នាល់ជាមួយលោកនាយករដ្ឋមន្ត្រីហ៊ុន សែន។ លោកសម រង្ស៊ីបោះសម្តីថា បើលោកហ៊ុន សែន មិនជឿថា លោកនឹងវិលត្រឡប់មកប្រទេសកម្ពុជាដូចកាលកំណត់នោះ តើលោកហ៊ុន សែន ហ៊ានចុះចេញពីតំណែងភ្លាមៗទេ នៅពេលដែលលោកឈានជើងដល់ទឹកដីប្រទេសកម្ពុជានៅថ្ងៃទី៩ខែវិច្ឆិកា ពិតមែននោះ។
នៅថ្ងៃសុក្រដដែលនេះ លោកសម រង្ស៊ី ដែលកំពុងស្ថិតក្នុងប្រទេសបារាំង បានឆ្លើយតបលោកហ៊ុន សែន វិញ ដោយដាក់ការភ្នាល់ថ្មីមួយទៀត។ នោះគឺថា បើសិនជារូបលោកវិលត្រឡប់មកដល់ប្រទេសកម្ពុជាមានអ្នកគាំទ្រមកទទួលរូបលោកតិចជាងមួយលាននាក់ដោយមិនមានការបំភិតបំភ័យ ឬរារាំង នោះលោកនឹងបញ្ចប់ជីវិតនយោបាយរបស់ខ្លួន ហើយនឹងកម្ទេចអង្គការចាត់តាំងនយោបាយបក្សប្រឆាំងទាំងស្រុង។ ផ្ទុយទៅវិញ ប្រសិនបើមានអ្នកគាំទ្រមកទទួលរួបលោកមួយលាននាក់ ឬច្រើនជាងនេះ តើលោកហ៊ុន សែន ហ៊ានចុះចេញពីតំណែងភ្លាមៗដែរឬទេ។
ក្នុងន័យនេះលោកសម រង្ស៊ី បានស្នើឲ្យយកប្រទេសចិនជាសាក្សីនៃការភ្នាល់នេះ។
លោកសម រង្ស៊ី ដែលបានធ្វើការនិរទេសខ្លួនដោយស្ម័គ្រចិត្តអស់រយៈពេលប្រាំឆ្នាំមកហើយនោះ បានប្រកាសជាសាធារណៈថា លោកនឹងវិលត្រឡប់មកកម្ពុជាវិញនៅថ្ងៃទី៩ខែវិច្ឆិកា ដែលជាថ្ងៃបុណ្យឯករាជ្យជាតិ។ ក៏ប៉ុន្តែក្រុមអាជ្ញាធរកម្ពុជាជាបន្តបន្ទាប់បានព្រមានចាប់ខ្លួនលោកសម រង្ស៊ី ប្រធានស្តីទីអតីតគណបក្សសង្គ្រោះជាតិដែលត្រូវរំលាយ នៅពេលដែលលោកឈានជើងមកដល់ប្រទេសកម្ពុជា។
ហើយជាបន្តបន្ទាប់ក្រោយមក ការនិវត្តរបស់លោកសម រង្ស៊ី បានក្លាយទៅជាល្បែងភ្នាល់ឆ្លើយឆ្លងគ្នារវាងលោកនាយករដ្ឋមន្ត្រីហ៊ុន សែន និងលោកសម រង្ស៊ី។ លោកហ៊ុន សែន ដែលហ៊ានភ្នាល់ដាក់ប្រាក់មួយលានដុល្លារ ប្រសិនបើលោកសម រង្ស៊ី ហ៊ានត្រឡប់ចូលកម្ពុជាមែននោះ លោកសុខចិត្តប្រគល់ប្រាក់មួយលានដុល្លារអាមេរិកនេះទៅឲ្យលោកសម រង្ស៊ី។
លោកបណ្ឌិតឯម សុវណ្ណារ៉ា អ្នកវិភាគនយោបាយលើកឡើងថា ការភ្នាល់គ្នារបស់អ្នកនយោបាយខ្មែរទាំងពីររូបមិនបាននាំផលចំណេញដល់ប្រជាពលរដ្ឋកម្ពុជាទេ។
«ភ្នាល់គ្នានេះអត់មានប្រយោជន៍ទេ ព្រោះមើលទៅអតីតកាលសម រង្ស៊ី ចូលស្រុក ឬមិនចូលស្រុកអ្នកខ្លះថា កាត់ក កោរត្រងោល។ តែគ្មានឃើញកើតអីផង។ ដូច្នេះយើងធ្លាប់ដឹងហើយ»។
លោកសម រង្ស៊ី បានភៀសខ្លួនទៅក្រៅប្រទេសដោយស្ម័គ្រចិត្តចាប់តាំងពីឆ្នាំ២០១៥ម្ល៉េះ ក្រោយពីលោកទទួលរងបណ្តឹងចោទប្រកាន់ពីបទបរិហារកេរ្តិ៍។បណ្តឹងនេះធ្វើឲ្យលោកចាកចេញពីកម្ពុជាដើម្បីគេចពីការចាប់ឃុំខ្លួន។ ដៃគូនយោបាយរបស់លោកគឺលោកកឹម សុខា ដែលក្រោយមកក្លាយជាប្រធានគណបក្សសង្គ្រោះជាតិ កំពុងជាប់ឃុំឃាំងក្នុងផ្ទះក្រោមការចោទប្រកាន់ពីទោសក្បត់ជាតិ ក្រោយពីគណបក្សនេះត្រូវរំលាយ៕
