លោកនាយករដ្ឋមន្ត្រី ហ៊ុន សែន នៅថ្ងៃចន្ទនេះ បានទទួលពានរង្វាន់ជាមេដឹកនាំឆ្នើមមួយរូប ដែលត្រូវបានប្រគល់ដោយវិទ្យាស្ថានយុទ្ធសាស្ត្រសម្រាប់តំបន់អាស៊ី-ប៉ាស៊ីហ្វិក KSI ឬ KSI Strategic Institute for Asia Pacific ដែលមានមូលដ្ឋាននៅប្រទេសម៉ាឡេស៊ី។
ពានរង្វាន់នេះមានឈ្មោះថា «សមិទ្ធផលពេញមួយជីវិតរបស់មេដឹកនាំឆ្នើម» ដែលត្រូវបានប្រគល់ដល់លោក ហ៊ុន សែន ដែលដឹកនាំប្រទេស៣៧ឆ្នាំមកហើយ។
នៅក្នុងពិធីប្រគល់ពានរង្វាន់ដែលធ្វើឡើងនៅវិមានសន្តិភាព រាជធានីភ្នំពេញ ប្រធានវិទ្យាស្ថានយុទ្ធសាស្ត្រ KSI លោក Tan Sri Michael Yeoh បានបញ្ជាក់ថា ការផ្តល់ពានរង្វាន់ដល់នាយករដ្ឋមន្រ្តីកម្ពុជា ដោយសារសមិទ្ធផលការងារជោគជ័យនៃការដឹកនាំប្រទេស និងការដើរតួនាទីគន្លឹះ ក្នុងការពង្រឹងទំនាក់ទំនងរវាងអាស៊ាន។ លោកថ្លែងជាភាសាអង់គ្លេស ដោយមានការបកប្រែជាភាសាខ្មែរថា ការផ្តល់ពានរង្វាន់នេះ ដោយសារលោកនាយករដ្ឋមន្ត្រី ហ៊ុន សែន ដឹកនាំកម្ពុជារយៈពេល៣៧ឆ្នាំ បាននាំមកនូវជោគជ័យ ការផ្លាស់ប្តូរសង្គមកម្ពុជា ការកែលម្អហេដ្ឋារចនាសម្ព័ន្ធកម្ពុជា និងបានធ្វើឱ្យសេដ្ឋកិច្ចមានការរីកចម្រើនជាដើម។
លោកថ្លែងថា៖ «ពានរង្វាន់នេះត្រូវបានប្រគល់ជូនសម្តេចតេជោនាយករដ្ឋមន្ត្រី ចំពោះសមិទ្ធផលការងារ ប្រកបដោយការលះបង់របស់សម្តេចចំពោះប្រជាជន និងរដ្ឋាភិបាលកម្ពុជា ក៏ដូចជាដល់អាស៊ាន»។
ប្រធានវិទ្យាស្ថានយុទ្ធសាស្ត្រ KSI បន្ថែមថា លោកនាយករដ្ឋមន្ត្រី ហ៊ុន សែន ក៏បានដើរតួនាទីគន្លឹះ ក្នុងការពង្រឹងទំនាក់ទំនងរវាងអាស៊ាន គឺមិនត្រឹមតែជាមួយចិនប៉ុណ្ណោះទេ ប៉ុន្តែជាមួយដៃគូសន្ទនាគន្លឹះរបស់អាស៊ាន ដែលបង្ហាញនៅក្នុងកិច្ចប្រជុំអាស៊ីបូព៌ា ដែលកម្ពុជាធ្វើជាម្ចាស់ផ្ទះកាលពីកន្លងទៅ។
ប្រធានវិទ្យាស្ថានយុទ្ធសាស្ត្រ KSI រូបនេះបញ្ជាក់ថា លោកនាយករដ្ឋមន្ត្រីធ្លាប់បានស្នាក់នៅក្នុងវត្តអារាម ហើយទទួលបានសញ្ញាបត្របរិញ្ញាបត្រ និងថ្នាក់បណ្ឌិតនៅបណ្ឌិតសភានយោបាយជាតិហាណូយនៃប្រទេសវៀតណាម និងធ្លាប់ទទួលបានបណ្ឌិតកិត្តិយស និងពានរង្វាន់ជាច្រើនទៀតផងដែរ។
នៅព្រឹកថ្ងៃចន្ទនេះ លោកនាយករដ្ឋមន្ត្រី ហ៊ុន សែន ក៏បានថ្លែងអំណរគុណដល់វិទ្យាស្ថាន KSI ដែលផ្តល់ពានរង្វាន់មួយនេះផងដែរ។
លោក ហ៊ុន សែន ថ្លែងថា៖ «ពិតណាស់ថា ការទទួលបានពានរង្វាន់ដ៏វិសេសវិសាលនេះ គឺជាសក្ខីភាពជោគជ័យដ៏ត្រចះត្រចង់នៃការដឹកនាំដ៏ត្រឹមត្រូវរបស់រាជរដ្ឋាភិបាល[កម្ពុជា] ជាពិសេសតាមរយៈការអនុវត្តគោលនយោបាយឈ្នះៗ ដែលនាំមកនូវការបង្រួបបង្រួមជាតិ សន្តិភាព និងស្ថិរភាពនយោបាយ»។
បើតាមហ្វេសប៊ុករបស់លោកនាយករដ្ឋមន្រ្តី ហ៊ុន សែន វិទ្យាស្ថាន KSI គឺជាស្ថាប័នឯករាជ្យ មិនរកប្រាក់ចំណេញ និងជាស្ថាប័នតភ្ជាប់រវាងរដ្ឋាភិបាល ធុរកិច្ច និងសង្គមស៊ីវិល ដើម្បីប្រែក្លាយគំនិតផ្តួចផ្តើមនានាឱ្យទៅជាផលសម្រេចដែលមានឥទ្ធិពល។
គោលដៅចម្បងរបស់វិទ្យាស្ថានគឺការកសាងប្រទេសឱ្យកាន់តែប្រសើរឡើងនៅទូទាំងតំបន់អាស៊ីប៉ាស៊ីហ្វិក។ វិទ្យាស្ថាន KSI ជាអ្នកចាត់ចែងរៀបចំឈានមុខនៃសន្និសីទ និងវេទិកាដែលមានឥទ្ធិពល និងប្រកបដោយនវានុវត្តន៍ ដោយមានការចូលរួមពីសំណាក់អ្នករៀបចំគោលនយោបាយ ប្រធានក្រុមធុរកិច្ច និងអ្នកដឹកនាំអង្គការក្រៅរដ្ឋាភិបាលជាង៣ពាន់នាក់ តាមរយៈព្រឹត្តិការណ៍កម្រិតខ្ពស់ជាង៦០ ចាប់តាំងពីចុងឆ្នាំ២០១៨មក។
អ្នកតាមដានសង្គម ដូចជាលោក រ៉ុង ឈុន ដែលជាមេដឹកនាំសហជីពមួយរូប និងធ្លាប់ជាប់ពន្ធនាគារ យល់ឃើញថា លោកនាយករដ្ឋមន្ត្រី ហ៊ុន សែន មិនទាន់ស័ក្តិសមទទួលបានពានរង្វាន់នេះនៅឡើយទេ ដោយលោកបញ្ជាក់ថា បច្ចុប្បន្នការដឹកនាំប្រទេសកម្ពុជា គឺនៅមានបញ្ហាជាច្រើន ដូចជាការរំលោភសិទ្ធិមនុស្ស ដំណើរការប្រជាធិបតេយ្យ នីតិរដ្ឋ បញ្ហាដីធ្លី បញ្ហាធនធានធម្មជាតិ និងករណីគ្រឿងញៀនជាដើម។
លោក រ៉ុង ឈុន ប្រាប់វីអូអេនៅថ្ងៃចន្ទនេះថា៖ «បើយើងធ្វើការកត់សម្គាល់នូវការដឹកនាំរបស់លោកនាយករដ្ឋមន្ត្រីកម្ពុជាសព្វថ្ងៃនេះ [គឺ] មិនទាន់ស័ក្តិសមនឹងទទួលបានពានរង្វាន់ក្នុងការដឹកនាំប្រទេសឱ្យគាប់ប្រសើរ ឱ្យល្អប្រសើរនោះទេ ពីព្រោះមានកំហុសឆ្គងច្រើនដែលត្រូវធ្វើការកែលម្អ»។
លោក រ៉ុង ឈុន បន្តថា លោកមិនវាយតម្លៃអំពីសុចរិតភាពនៃវិទ្យាស្ថានមួយនេះទេ តែកន្លងមកមានអង្គការមួយចំនួនមានប្រវត្តិមិនច្បាស់លាស់ បានផ្តល់ពានឱ្យលោកនាយករដ្ឋមន្ត្រីផងដែរ។ ប៉ុន្តែទោះជាយ៉ាងណា លោកថា បើវិទ្យាស្ថានមួយនេះមានសុចរិតភាពពិតប្រាកដ នោះលោកនាយករដ្ឋមន្ត្រីមិនទាន់ស័ក្តិសមទទួលបានពានរង្វាន់មួយ ដោយសុចរិតភាពនោះទេ។
គួរបញ្ជាក់ថា កាលពីឆ្នាំ២០១៥ អង្គការសិទ្ធិមនុស្សអន្តរជាតិ Human Rights Watch បានចេញផ្សាយរបាយការណ៍មួយ ដោយលើកឡើងថា លោក ហ៊ុន សែន បានប្រើប្រាស់អំពើហិង្សាដើម្បីរក្សាតំណែងរបស់លោក ចាប់តាំងពីពេលលោកបានកាន់តំណែងជានាយករដ្ឋមន្ត្រីកាលពីឆ្នាំ១៩៨៥។ របាយការណ៍បញ្ជាក់ថា លោក ហ៊ុន សែន បានរំលោភសិទ្ធិមនុស្សដ៏ធ្ងន់ធ្ងរ រួមមានអំពើកាប់សម្លាប់ក្រៅច្បាប់ ទារុណកម្ម ការចាប់ឃុំខ្លួន រារាំងសេរីភាពសមាគម ការជួបប្រជុំ និងការបង្កើតបណ្ដាញស៊ើបការណ៍ រាយការណ៍នៅពេញប្រទេស ក្នុងគោលបំណងបំភិតបំភ័យ បំភ័ន្តសាធារណមតិ៕
