លោកនាយករដ្ឋមន្រ្តី ហ៊ុន សែន នៅថ្ងៃព្រហស្បតិ៍នេះ បានស្នើឲ្យក្រសួងសុខាភិបាល និងស្ថាប័នពាក់ព័ន្ធ ពិចារណាផ្អាកបុណ្យភ្ជុំបិណ្ឌ ឬកាត់បន្ថយចំនួនមនុស្សទៅវត្តអារាម ក្រោយមានករណីឆ្លងជំងឺកូវីដ១៩ នៅតាមវត្តអារាមមួយចំនួន។ នេះបើតាមសារជាសំឡេងរបស់នាយករដ្ឋមន្រ្តី ដែលចេញផ្សាយកាលពីរសៀលថ្ងៃព្រហស្បតិ៍។
លោក ហ៊ុន សែន បានចាត់ទុកការឆ្លងជំងឺកូវីដ១៩ នៅតាមវត្តអារាម ក្រោយប្រជាពលរដ្ឋសម្រុកទៅវត្ត ចាប់ពីថ្ងៃទី២២ ខែកញ្ញា ដែលជាថ្ងៃបិណ្ឌមួយ ជា«កង្វល់ធំ»មួយ ដែលតម្រូវឲ្យរដ្ឋាភិបាលត្រូវចាត់វិធានការ។ នៅពេលថ្លែងនោះ លោក ហ៊ុន សែន មិនទាន់បញ្ជាឲ្យផ្អាកបុណ្យភ្ជុំបិណ្ឌនៅឡើយទេ ប៉ុន្តែលោកបញ្ជាឲ្យក្រសួងសុខាភិបាល និងស្ថាប័នពាក់ព័ន្ធ«ពិនិត្យជាបន្ទាន់» ហើយអាចពិចារណាផ្អាកពិធីនេះ ឬកាត់បន្ថយតាមរបៀបណាមួយ ដើម្បីធានាកុំឲ្យមានការឆ្លងទ្រង់ទ្រាយធំ ក្រោយពិធីបុណ្យភ្ជុំបិណ្ឌចប់។
លោក ហ៊ុន សែន ថ្លែងថា៖ «ប្រសិនបើយើងបន្ត អាចថាលទ្ធផលដែលយើងទទួលបានក្នុងរយៈពេលកន្លងទៅនេះ គឺនឹងមានការរីករាលដាលធ្ងន់ធ្ងរហួសពីការគិត ដែលយើងបានគិតនៅមុនពេលបុណ្យ»។
ភ្លាមៗក្រោយការពីការប្រកាសរបស់លោកនាយករដ្ឋមន្ត្រី ហ៊ុន សែន មន្ទីរធម្មការនិងសាសនារាជធានីភ្នំពេញ បាននាំមុខគេក្នុងការចេញសេចក្តីប្រកាសជូនដំណឹង និងសំណូមពរដល់ព្រះសង្ឃគង់នៅតាមវត្តអារាមនានា ពលរដ្ឋ ពុទ្ធបរិស័ទក្នុងរាជធានី អនុវត្តតាមវិធានការរបស់រាជរដ្ឋាភិបាល និង វិធានការក្រសួងសុខាភិបាលចំពោះការទប់ស្កាត់ជំងឺកូវីដ១៩ និង សូមបន្តផ្អាកការជួបប្រជុំផ្សេងៗ និង ការប្រមូលផ្តុំថ្វាយបង្គំ ជាបណ្តោះអាសន្នចាប់ពីពេលនេះ រហូតមានការជូនដំណឹងជាថ្មី។
គួរបញ្ជាក់ថាកាលពីថ្ងៃទី៣ ខែកញ្ញា ក្រសួងធម្មការនិងសាសនាបានចេញសេចក្តីណែនាំមួយ ដោយអនុញ្ញាតឲ្យវត្តអារាមទាំងអស់នៅក្នុងប្រទេសប្រារព្ធពិធីបុណ្យកាន់បិណ្ឌ ភ្ជុំបិណ្ឌ និងកឋិនទាន ប៉ុន្តែតម្រូវឲ្យមានការប្រកាន់ខ្ជាប់តឹងរ៉ឹងនូវវិធានការបង្ការការឆ្លងជំងឺកូវីដ១៩។
ការសម្រេចឲ្យប្រារព្ធបុណ្យភ្ជុំបិណ្ឌនៅទូទាំងប្រទេសនេះ ស្របពេលដែលព្រះសង្ឃតាមវត្តអារាមមួយចំនួន បានត្អូញត្អែរអំពីកង្វះខាតចង្ហាន់ និងបច្ច័យ ដោយសារមិនមានពុទ្ធបរិស័ទច្រើននោះទេមកវត្តអារាម ក្នុងពេលដែលប្រទេសកំពុងជួបវិបត្តិជំងឺកូវីដ១៩៕
