នាយករដ្ឋមន្ត្រីកម្ពុជា ណែនាំក្រសួងស្ថាប័ន និងរដ្ឋបាលគ្រប់ជាន់ថ្នាក់ ឲ្យខិតខំពង្រឹង និងពង្រីក «ទំនាក់ទំនងល្អ» ជាមួយសហរដ្ឋអាមេរិក ឲ្យបានព្រមៗគ្នា នៅប៉ុន្មានថ្ងៃក្រោយការជួបផ្ទាល់ជាលើកដំបូងជាមួយទូតថ្មីរបស់សហរដ្ឋអាមេរិក។ នេះបើតាមសេចក្ដីប្រកាសព័ត៌មានរបស់ទីស្ដីការគណៈរដ្ឋមន្ត្រី ចេញកាលពីថ្ងៃសុក្រសប្ដាហ៍មុន នៅក្រោយកិច្ចប្រជុំគណៈរដ្ឋមន្ត្រី ដែលដឹកនាំដោយលោកនាយករដ្ឋមន្ត្រី ហ៊ុន សែន។
សេចក្ដីប្រកាសព័ត៌មានដដែលបញ្ជាក់តាមន័យដើមថា៖ «ក្នុងបរិបទដែលមានឯកឧត្ដម W. Patrick Murphy ជាឯកអគ្គរដ្ឋទូតអាមេរិកប្រចាំកម្ពុជា សម្ដេចតេជោនាយករដ្ឋមន្ត្រី បានណែនាំដល់គ្រប់ក្រសួងស្ថាប័ន និងរដ្ឋបាលថ្នាក់ក្រោមជាតិ ត្រូវធ្វើសកម្មភាពឲ្យបានព្រមៗគ្នាក្នុងការខិតខំបន្តពង្រឹង និងពង្រីកទំនាក់ទំនងល្អជាមួយសហរដ្ឋអាមេរិក»។
សេចក្ដីប្រកាសព័ត៌មាននោះបន្ថែមថា ការពង្រឹង និងពង្រីកទំនាក់ទំនងនេះមានដូចជាការសហការរៀបចំទិវាបុណ្យខួបទី ៧០នៃទំនាក់ទំនងការទូតកម្ពុជា-អាមេរិក ការសម្ដែងសិល្បៈ កីឡា ការជួបជុំនៃនិស្សិតដែលបញ្ចប់ការសិក្សាពីអាមេរិក ការរុករកអដ្ឋិធាតុទាហានអាមេរិក និងកម្មវិធីអ្នកស្ម័គ្រចិត្ត Peace Corps។
សេចក្ដីប្រកាសព័ត៌មាននោះ ក៏បានបញ្ជាក់ថាក្នុងកិច្ចប្រជុំគណៈរដ្ឋមន្ត្រី លោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលកម្ពុជាស្វាគមន៍ចំពោះការលើកឡើងរបស់លោក Patrick Murphyឯកអគ្គរដ្ឋទូតថ្មីរបស់សហរដ្ឋអាមេរិកប្រចាំកម្ពុជា ដែលលោក ហ៊ុន សែន អះអាងថា លោក Murphy បញ្ជាក់ជំហររបស់អាមេរិកថាមិនជ្រៀតជ្រែកកិច្ចការផ្ទៃក្នុងកម្ពុជា និងមិនគាំទ្រផែនការផ្លាស់ប្ដូររបប ឬរដ្ឋាភិបាលដោយអំពើហិង្សា ឬសកម្មភាពផ្សេងណាមួយក្រៅពីតាមបែបប្រជាធិបតេយ្យ។
សេចក្ដីប្រកាសព័ត៌មានរបស់ទីស្ដីការគណៈរដ្ឋមន្ត្រីនោះ ធ្វើឡើង ២ថ្ងៃបន្ទាប់ពីលោក Murphy បានជួបសម្ដែងការគួរសមជាលើកដំបូងជាមួយលោកនាយករដ្ឋមន្ត្រី ហ៊ុន សែន និង ១ថ្ងៃបន្ទាប់ពីលោកបានជួបរដ្ឋមន្ត្រីក្រសួងការបរទេសកម្ពុជាលោក ប្រាក់ សុខុន។ លោក Patrick Murphy ក៏បានចូលគាល់ព្រះមហាក្សត្រ ព្រះបាទនរោត្តម សីហមុនី នៅឯព្រះបរមរាជវាំង កាលពីថ្ងៃទី១៩ ខែតុលា ដើម្បីថ្វាយសារតាំងផងដែរ។
ការចូលបំពេញតួនាទីរបស់លោក Murphy នៅប្រទេសកម្ពុជា កើតឡើង នៅចំពេលដែលស្ថានភាពនយោបាយរបស់កម្ពុជាកំពុងតែតានតឹង ដោយរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ប្រកាសត្រៀមកម្លាំងចាប់ខ្លួនលោក សម រង្ស៊ី អតីតប្រធានគណបក្សសង្គ្រោះជាតិដែលត្រូវរដ្ឋាភិបាលរំលាយចោល គ្រោងវិលមកប្រទេសកម្ពុជានៅខែវិច្ឆិកាខាងមុខ។
ចំណែកអតីតប្រធានគណបក្សសង្គ្រោះជាតិមួយរូបទៀតគឺលោក កឹម សុខា កំពុងស្ថិតក្នុងការឃុំឃាំងក្នុងផ្ទះ ដោយរូបលោកក៏ដូចជាគណបក្សសង្គ្រោះជាតិដែលត្រូវរំលាយនោះ ត្រូវបានរដ្ឋាភិបាលលោកហ៊ុន សែន កន្លងមកចោទថា មានបំណងផ្ដួលរំលំរដ្ឋាភិបាលដោយមានសហរដ្ឋអាមេរិកនៅពីក្រោយ។
ទាំងសហរដ្ឋអាមេរិក និងសហគមន៍ អឺរ៉ុបបានថ្កោលទោសរដ្ឋាភិបាលកម្ពុជាអំពីការរឹតត្បិតសិទ្ធិនយោបាយ និងការគាបសង្កត់សិទ្ធិមនុស្ស ហើយកំពុងពិចារណាអំពីការដាក់ទណ្ឌកម្មសេដ្ឋកិច្ច។
អ្នកស្រី Emily Zeeberg អ្នកនាំពាក្យស្ថានទូតអាមេរិកប្រចាំកម្ពុជា មិនឆ្លើយតបនឹងសំណួរ VOA ពាក់ព័ន្ធនឹងការថ្លែងរបស់លោកនាយករដ្ឋមន្ត្រី ហ៊ុន សែន ដែលថាអាមេរិកមានគោលជំហរមិនជ្រៀតជ្រែកចូលកិច្ចការកម្ពុជានោះទេ។
ប៉ុន្តែ អ្នកស្រីបញ្ជាក់ប្រាប់ VOA តាមរយៈសារអេឡិចត្រូនិកឬអ៊ីមែលតាមន័យដើមថា៖ «លោកឯកអគ្គរដ្ឋទូត ក៏បានលើកឡើងពីចំណុចសំខាន់មួយចំនួននៃការព្រួយបារម្ភរបស់សហរដ្ឋអាមេរិក និងអន្តរជាតិដែលមានកន្លងមក ដោយកត់សម្គាល់ថា ជំហានប្រកបដោយអត្ថន័យដើម្បីស្តាលទ្ធិប្រជាធិបតេយ្យ ពហុបក្ស និងសិទ្ធិសេរីភាពពេញលេញសម្រាប់អ្នកនយោបាយ សង្គមស៊ីវិល និងប្រព័ន្ធផ្សព្វផ្សាយនានា នឹងធ្វើឱ្យមានការរីកចម្រើនពិតប្រាកដសម្រាប់ទំនាក់ទំនងការទូតរបស់ប្រទេសកម្ពុជា»។
អ្នកស្រី Emily បានបញ្ជាក់បន្ថែមទៀតថា ក្នុងជំនួបជាមួយព្រះមហាក្សត្រ និងប្រមុខរដ្ឋាភិបាលកម្ពុជានោះ លោកឯកអគ្គរដ្ឋទូតបានបង្ហាញការគោរពចំពោះវប្បធម៌ និងប្រពៃណីរបស់ប្រទេសកម្ពុជា និងមានបំណងចង់ធ្វើការរួមគ្នាដើម្បីពង្រឹងទំនាក់ទំនងទ្វេភាគី។
លោកបណ្ឌិត មាស នី អ្នកសិក្សាពីការវិវត្តសង្គម និងជាអ្នកវិភាគនយោបាយលើកឡើងថា ជំនួបរបស់ឯកអគ្គរដ្ឋទូតអាមេរិកប្រចាំកម្ពុជាថ្មី ជាមួយថ្នាក់ដឹកនាំរដ្ឋាភិបាលកម្ពុជា គឺជាជំនួបដំបូងបែបការទូតប៉ុណ្ណោះ។ លោកបន្តថា ទំនាក់ទំនងរវាងកម្ពុជា និងសហរដ្ឋអាមេរិក នឹងអាចឃើញលទ្ធផល គឺសម្រេចលើការអនុវត្តលទ្ធិប្រជាធិបតេយ្យរបស់រដ្ឋាភិបាលកម្ពុជា។
«ក្នុងនាមជាមន្ត្រីជាន់ខ្ពស់របស់សហរដ្ឋអាមេរិកថ្មីហ្នឹង គឺថាគេត្រូវតែសម្ដែងនូវគារវកិច្ចបែបហ្នឹងហើយ ដើម្បីកុំឲ្យមានបញ្ហាអីចម្រូងចម្រាសតាំងពីដើមទីទៅ។ ប៉ុន្តែក្នុងហ្នឹងខ្ញុំគិតថា បើសិនជាស្ថានភាពសិទ្ធិមនុស្ស និងប្រជាធិបតេយ្យនៅស្រុកយើង អាចមានបញ្ហាកាន់តែអាក្រក់ថែមទៀតនោះ នោះខ្ញុំគិតថាទំនាក់ទំនងអាមេរិកនិងកម្ពុជា មិនអាចប្រព្រឹត្តទៅល្អបានទេ»។
ចំណែកលោកបណ្ឌិត អៀ សុផល សាស្ត្រាចារ្យផ្នែកទំនាក់ទំនងការទូត និងអន្តរជាតិ នៃមហាវិទ្យាល័យ Occidental ទីក្រុងឡូសអេនជឺលេស រដ្ឋកាលីហ្វ័រញ៉ា សហរដ្ឋអាមេរិក លើកឡើងថា ការយល់ឃើញអំពីនិយមន័យនៃលទ្ធិប្រជាធិបតេយ្យរបស់លោកនាយករដ្ឋមន្ត្រី ហ៊ុន សែន និងលោក Patrick Murphy គឺខុសគ្នា។
លោកបន្តថា សម្រាប់លោក ហ៊ុន សែន លទ្ធិប្រជាធិបតេយ្យមានន័យថាមិនមានការប្រកួតប្រជែង ហើយមានជម្រើសតែមួយ ប៉ុន្តែសម្រាប់លោក Murphy គឺមានន័យថាជាការប្រកួតប្រជែង និងមានជម្រើសច្រើន ដែលមានន័យថា «ការផ្លាស់ប្ដូររបបសម្រាប់គណបក្សកាន់អំណាច»។
លោកសរសេរតាមន័យដើមថា៖ «ឥឡូវនេះវាមើលទៅដូចជាដំណាក់កាលក្រេបទឹកឃ្មុំ ប៉ុន្តែម្ដងទៀត វាគឺពីព្រោះមនុស្សគ្រប់គ្នាមើលឃើញអ្វីដែលពួកគេចង់ឃើញ ហើយស្ដាប់អ្វីដែលពួកគេចង់ឮ។ ប្រជាធិបតេយ្យមិនមែនជាការផ្លាស់ប្ដូររបបទេ។ មានតែអ្នកដែលមិនយល់ពីលទ្ធិប្រជាធិបតេយ្យប៉ុណ្ណោះដែលអាចហៅវាដូច្នេះ[ប្ដូររបប]បាន»។
លោក Patrick Murphy គឺជាមន្ត្រីការទូតអាមេរិកជាន់ខ្ពស់ម្នាក់ដែលមានបទពិសោធន៍អំពីតំបន់អាស៊ី។ លោកបានមកចូលកាន់តំណែងជាឯកអគ្គរដ្ឋទូតអាមេរិកថ្មីប្រចាំកម្ពុជា បន្ទាប់ពីឯកអគ្គរដ្ឋទូតអាមេរិកមុនគឺលោក William A. Heidt បានបញ្ចប់អាណត្តិរបស់លោកនៅចុងឆ្នាំ២០១៨៕
