លោកនាយករដ្ឋមន្រ្តី ហ៊ុន ម៉ាណែត នៅថ្ងៃសុក្រនេះ បានការពារថារដ្ឋាភិបាលរបស់លោកមិនទុកប្រជាពលរដ្ឋដែលត្រូវបានជម្លៀសចេញពីតំបន់អង្គរមកតំបន់ថ្មីរុនតាឯក និងពាក់ស្នែង ចោលនោះទេ។
លោកថ្លែងបែបនេះនៅក្នុងពិធីសំណេះសំណាលជាមួយប្រជាពលរដ្ឋរស់នៅភូមិធម្មជាតិរុនតាឯក និងតំបន់ពាក់ស្នែង ក្នុងស្រុកបន្ទាយស្រី ខេត្តសៀមរាប។
លោក ហ៊ុន ម៉ាណែត ថ្លែងថាកន្លងទៅ អង្គការអន្តរជាតិនិងអ្នកនយោបាយមួយចំនួនបានឆ្លៀតឱកាសយកការជម្លៀសពលរដ្ឋពីតំបន់អង្គរមកវាយប្រហារថារដ្ឋាភិបាលយកប្រជាជន«បោះចោលយ៉ាងវេទនា»។ ប៉ុន្តែលោកថារដ្ឋាភិបាលបានព្យាយាមអភិវឌ្ឍតំបន់ថ្មីសម្រាប់ប្រជាពលរដ្ឋ ដោយមានភ្លើងទឹកផ្លូវ សាលារៀន និងវត្តអារាម។
លោក ហ៊ុន ម៉ាណែត ថ្លែងថា៖ «សេវាដែលខ្ញុំបានផ្តល់ឲ្យនេះ មិនបានល្អឥតខ្ចោះ ដូចខ្ញុំនិយាយមិនបានមកផ្ទះ១០០ជាន់ទេ។ ប៉ុន្តែក៏យើងបានឈានជាជំហាន ដើម្បីផ្តល់សេវា ផ្តល់ហេដ្ឋារចនាសម្ព័ន្ធជូន។ អញ្ចឹងនៅត្រូវបន្តធ្វើទៀត មិនអាចទុកចោលទេ»។
លោកនាយករដ្ឋមន្រ្តីបញ្ជាក់ថារដ្ឋាភិបាលទទួលស្គាល់ថាការផ្លាស់ប្តូរមកទីតាំងថ្មីមាន«ការលំបាក» ជាពិសេសក្នុងដំណាក់កាលដំបូង។
បើតាមលោក ហ៊ុន ម៉ាណែត រដ្ឋាភិបាលត្រូវតែជម្លៀសពលរដ្ឋចេញ ដើម្បីបញ្ចៀសហានិភ័យនៃកំណើនប្រជាពលរដ្ឋកាន់តែច្រើនក្នុងរយៈពេលច្រើនឆ្នាំ និងបារម្ភពីការដកប្រាសាទអង្គរវត្តចេញពីបញ្ជីបេតិកភណ្ឌ។
កាលពីខែវិច្ឆិកា អង្គការលើកលែងទោសអន្តរជាតិ Amnesty International បានលើកឡើងនៅក្នុងរបាយការណ៍របស់ខ្លួនថារដ្ឋាភិបាលកម្ពុជាបានរំលោភទៅលើច្បាប់អន្តរជាតិ តាមរយៈការជម្លៀសប្រជាពលរដ្ឋប្រមាណ១ម៉ឺនគ្រួសារ នៅក្នុងតំបន់អង្គរ ដោយបង្ខំ។ របាយការណ៍ដដែលបញ្ជាក់ថា៖ «មនុស្សជាច្រើនត្រូវបានយាយី គំរាមកំហែង និងបង្ខំឱ្យចាកចេញដោយគ្មានការពិគ្រោះយោបល់ពិតប្រាកដ។ ស្ទើរតែគ្មាននរណាម្នាក់ចង់ទៅឡើយ(ទៅកន្លែងថ្មីនៅរុនតាឯក)»។
ការតាំងទីលំនៅថ្មីនៅឃុំរុនតាឯក ស្រុកបន្ទាយស្រី គឺនៅឆ្ងាយ ហើយកង្វះលំនៅឋានបានធ្វើឱ្យប្រជាពលរដ្ឋរាប់ពាន់គ្រួសារប្រឈមមុខនឹងបញ្ហាសុខភាព ដោយសារការរស់នៅក្រោមអាកាសធាតុមិនល្អ ខ្វះទឹកស្អាត បង្គន់អនាម័យមិនគ្រប់គ្រាន់ អគ្គិសនី ផ្លូវត្រឹមត្រូវ និងឱកាសនៃការរស់នៅ។ នេះបើតាមរបាយការណ៍ដដែល។
ក្រោមហេតុផលខ្លាចប៉ះពាល់តំបន់ប្រាសាទអង្គរវត្ត រដ្ឋាភិបាលបានរៀបចំតំបន់រុនតាឯក និងតំបន់ផ្សេងទៀតសម្រាប់អ្នកដែលត្រូវជម្លៀសចេញ ដោយបានស្ថាបនាផ្លូវ រៀបចំប្រព័ន្ធអគ្គិសនី និងប្រព័ន្ធទឹកម៉ាស៊ីនផ្សេងៗសម្រាប់ប្រជាពលរដ្ឋនៅតំបន់ថ្មី។ ប៉ុន្តែដោយសារតំបន់នោះនៅឆ្ងាយពីក្រុង ប្រជាជនខ្លះត្រូវធ្វើដំណើរទៅធ្វើការឆ្ងាយ ហើយអ្នកខ្លះក៏សម្រេចបោះបង់ការងារនៅក្នុងទីក្រុង។ អ្នកខ្លះក៏នៅបន្តការងារ បើទោះត្រូវចំណាយច្រើនលើថ្លៃសាំង ដើម្បីធ្វើដំណើរ។
រដ្ឋាភិបាលអះអាងថាការទៅរស់នៅតំបន់ថ្មី ដែលរដ្ឋាភិបាលផ្តល់ដីដែលមានទទឹង២០ម៉ែត្រ និងបណ្តោយ៣០ម៉ែត្រធ្វើឡើងតាមគោលការណ៍ស្ម័គ្រចិត្ត។
ពលរដ្ឋមួយចំនួននៅតំបន់រុនតាឯកធ្លាប់ប្រាប់វីអូអេថាដីដែលរដ្ឋផ្តល់ឲ្យតូច មិនសូវមានជីវជាតិ ធ្វើឱ្យពួកគេមិនអាចដាំអ្វីទទួលបានផលឡើយ។ បន្ថែមពីនេះ តំបន់ថ្មីមានទីតាំងឆ្ងាយពីក្រុងសៀមរាប រហូតដល់ជាង៣០គីឡូម៉ែត្រ៕
