ក្តីសង្ឃឹមសម្រាប់បុណ្យណូអែលដែលមានសន្តិភាពត្រូវបានបំផ្លាញនៅទីក្រុងហុងកុងកាលពីថ្ងៃអង្គារ បន្ទាប់ពីប៉ូលិសប្រឆាំងកុបកម្មបានបាញ់ឧស្ម័នបង្ហូរទឹកភ្នែក ហើយក្រុមអ្នកតវ៉ាបានដុតបំផ្លាញនៅទីតាំងផ្សេងៗ នៅទូទាំងទីក្រុងដែលច្របូកច្របល់ដោយភាពចលាចលស៊ីវិលអស់រយៈពេលជាង៦ខែ។
ហ្វូងមនុស្សជាច្រើនបានប្រមូលផ្តុំគ្នានៅតាមផ្សារទំនើបនិងតំបន់ទេសចរណ៍ដ៏មមាញឹកដើម្បីឆ្លើយតបនឹងការអំពាវនាវតាមអ៊ិនធរណេតដើម្បីបង្ហាញពីការមិនពេញចិត្តរបស់ពួកគេប្រឆាំងរដ្ឋាភិបាលនិងទាមទារលទ្ធិប្រជាធិបតេយ្យប្រសើរឡើង។
ចលនាប្រឆាំងរដ្ឋាភិបាលនៅហុងកុងដែលបង្កឡើងដោយច្បាប់បត្យាប័នដ៏ចម្រូងចម្រាសនោះបានឈានចូលដល់ខែទី៧ហើយ ហើយមិនមានសញ្ញាធូរស្បើយឡើយ។ ក្រុមអ្នកតវ៉ានិយាយថា ពួកគេនឹងមិនចុះចាញ់នោះទេ លុះត្រារដ្ឋាភិបាលឆ្លើយតបតាមការទាមទារផ្នែកនយោបាយរបស់ពួកគេដែលរួមមានសិទ្ធិបោះឆ្នោតជាសកលនិងការស៊ើបអង្កេតដោយឯករាជ្យលើអំពើព្រៃផ្សៃរបស់ប៉ូលិស។
ក្រោយម៉ោង៩យប់ម៉ោងក្នុងស្រុក ប៉ូលិសបានបាញ់ឧស្ម័នបង្ហូរទឹកភ្នែកជាច្រើនលើកនៅក្នុងតំបន់ទេសចរណ៍ដ៏ពេញនិយមមួយឈ្មោះ Tsim Sha Tsui ដើម្បីបំបែកក្រុមអ្នកតវ៉ា រួមទាំងនៅខាងក្រៅសណ្ឋាគារប្រណីត Peninsulaផងដែរ ។ មនុស្សរាប់រយនាក់បានប្រមូលផ្តុំគ្នាធ្វើឱ្យរំខានចរាចរណ៍ ហើយប៉ូលិសប្រឆាំងកុបកម្មបានព្រមានថា ពួកគេចូលរួមក្នុងការប្រមូលផ្តុំខុសច្បាប់៕
