ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សកម្មជន​ឯករាជ្យ​ក្នុង​ទីក្រុង​ហុងកុង​ត្រូវ​បាន​កាត់ទោស​ឲ្យ​ជាប់​ពន្ធនាគារ៦ឆ្នាំ


លោក Edward Leung សកម្មជន​គាំទ្រ​ឯករាជ្យភាព​ដើរ​នៅ​ក្នុង​មជ្ឈមណ្ឌល​ឃុំ​ខ្លួន​ នៅ​ពេល​ចាកចេញ​ទៅ​ចូលរួម​សវនាការ​មួយ​នៅ​ក្នុង​ក្រុង​ហុងកុង ប្រទេស​ចិន​ កាលពី​ថ្ងៃទី១១ ខែមិថុនា ឆ្នាំ២០១៨។

សកម្មជន​ឯករាជ្យ​លេចធ្លោ​ម្នាក់​ក្នុង​ទីក្រុងហុងកុង​ត្រូវ​បាន​កាត់ទោស​ឲ្យ​ជាប់ពន្ធនាគារ៦ឆ្នាំ​ក្រោម​បទចោទ​ពាក់ព័ន្ធ​នឹង​ការ​តវ៉ាហិង្សា​នៅ​តាម​ផ្លូវ​កាល​ពី​ឆ្នាំ២០១៦។

លោក Edward Leung ដែល​ត្រូវ​បាន​កាត់​ទោស​ក្រោម​បទចោទ​ធ្វើ​កុបកម្ម​នេះ​ បាន​ជាប់​ឃុំឃាំង​រួច​ទៅ​ហើយ​ក្រោម​បទចោទ​ដាច់​ដោយ​ឡែក​មួយ​ទៀត​ ដែល​បាន​ចោទ​ថា​លោក​បាន​វាយប្រហារ​ទៅ​លើ​ប៉ូលិស​នៅ​អំឡុងពេល​ធ្វើ​កុបកម្ម​កាល​ពី​ខែកុម្ភៈ ឆ្នាំ២០១៦​ក្នុង​សង្កាត់ម៉ុងកុ ដែល​ជា​តំបន់​ពាណិជ្ជកម្ម​ដ៏​មមាញឹក​មួយ​ក្នុង​ ទីក្រុងហុងកុង។ ក្រុមបាតុករ​បាន​ចោល​ដុំ​ថ្ម​លើ​ក្រុមមន្ត្រី​ប៉ូលិស​ និង​បាន​ដុតកំប៉ុង​ដើម្បីតវ៉ា​ប្រឆាំង​នឹង​ការ​រឹតបណ្តឹង​របស់​ចិន​ទៅ​លើ​ស្វ័យភាព​របស់​ទីក្រុងហុងកុង។

ជន​ជាប់​ចោទ​ពីរ​នាក់​ទៀត​ដែល​ចូលរួម​ធ្វើ​កុបកម្ម​ជាមួយ​លោក Leung ក៏​ត្រូវ​បាន​តុលាការ​កាត់ទោស​ឲ្យ​ជាប់​ពន្ធនាគារ​ពី​៣ឆ្នាំកន្លះ​ទៅ៧ឆ្នាំ​ផងដែរ​ ក្រោម​បទចោទ​ពាក់ព័ន្ធនឹង​កុបកម្ម​ក្នុង​សង្កាត់​ម៉ុងកុ​នេះ។

លោក Leung វ័យ២៧ឆ្នាំ​រូប​នេះ​បាន​ក្លាយ​ជា​មេដឹកនាំ​ចលនា​ឯករាជ្យ​ដឹកនាំ​ដោយ​ក្រុម​យុវជន​ក្នុង​ទីក្រុងហុងកុង​ បន្ទាប់​ពី​ការ​ធ្វើ​បដិវត្តន៍​ក្រោម​ឆ័ត្រ​ដ៏​ធំមួយ​គាំទ្រ​លទ្ធិ​ប្រជាធិបតេយ្យ​កាល​ពី​ឆ្នាំ២០១៤​ទាមទារ​ឲ្យ​មាន​ការ​បោះឆ្នោត​ដោយ​សេរី។ លោក Leung បាន​ឈរ​ឈ្មោះ​បោះឆ្នោត​ក្នុង​សភា​កាល​ពី​ឆ្នាំ២០១៦ ប៉ុន្តែ​ក្រោយ​មក​ត្រូវ​បាន​អាជ្ញាធរ​ហាមឃាត់​មិន​ឲ្យ​លោក​ចូល​ធ្វើ​ការ​ក្នុង​ការិយាល័យ។

ប្រទេសចិន​បាន​គ្រប់គ្រង​ទីក្រុងហុងកុង​ឡើង​វិញ​ពី​ចក្រភពអង់គ្លេស​ក្នុង​ឆ្នាំ១៩៩៧។ ​ហុងកុង​ត្រូវ​បាន​បង្កើត​ឡើង​ជា​ប្រទេស​មួយ​មាន​ប្រព័ន្ធ​គ្រប់គ្រង​ពីរ​ ដែល​ផ្តល់​សេរីភាព​គ្រប់គ្រាន់​ដល់​ទីក្រុង​នេះ ប៉ុន្តែ​រដ្ឋាភិបាល​ក្រុងប៉េងកាំង​នា​ពេលថ្មីៗ​នេះ​បាន​រឹតបណ្តឹង​លើ​ស្វ័យភាព​របស់​ទីក្រុងនេះ​ ដែល​ការណ៍​នេះ​បាន​បង្ក​ឲ្យ​មាន​ចលនា​ឯករាជ្យ​គាំទ្រ​លិទ្ធប្រជាធិបតេយ្យ​ដឹកនាំ​ដោយ​ក្រុមនិសិត្ស​ធ្វើ​ការតវ៉ា​ប្រឆាំង​នឹង​ការ​រឹតបណ្តឹង​នេះ៕

XS
SM
MD
LG