គណៈប្រតិភូជាន់ខ្ពស់របស់ប្រទេសអ៊ីស្រាអែលនិងសហរដ្ឋអាមេរិក បានជិះយន្តហោះពាណិជ្ជកម្មរួមគ្នា ចេញពីព្រលានយន្តហោះ Ben-Gurion របស់អ៊ីស្រាអែលទៅកាន់រាជធានីអាប៊ុយដាប៊ី របស់ប្រទេសអេមីរ៉ាតអារ៉ាប់រួម ដែលនេះជាជើងហោះហើរយន្តហោះពាណិជ្ជកម្មលើកដំបូងរបស់អ៊ីស្រាអែលទៅកាន់ប្រទេសអេមីរ៉ាតអារ៉ាប់រួម ដោយឆ្លងកាត់ដែនអាកាសប្រទេសអារ៉ាប់ប៊ីសាអូឌីត។
នេះ ក៏ជាជើងហោះហើរលើកទីមួយដែរនៃយន្តហោះពាណិជ្ជកម្មរបស់អ៊ីស្រាអែល ដែលប្រើដែនអាកាសរបស់អារ៉ាប់ប៊ីសាអូឌីត។
អ៊ីស្រាអែលនិងប្រទេសអេមីរ៉ាតអារ៉ាប់រួម បានឯកភាពគ្នាបង្កើតទំនាក់ទំនងការទូតរវាងប្រទេសទាំងពីរ ដោយមានការជួយជ្រោមជ្រែងពីសហរដ្ឋអាមេរិក។
អេមីរ៉ាតអារ៉ាប់រួម ជាប្រទេសទី៣ក្នុងពិភពអារ៉ាប់ ដែលបានបង្កើតទំនាក់ទំនងជាមួយអ៊ីស្រាអែល បន្ទាប់ពីអេហ្ស៊ីប និងហ៊ក្សដានី។
សមាសភាពគណៈប្រតិភូអាមេរិករួមមាន ទីប្រឹក្សារបស់ប្រធានាធិបតីអាមេរិកលោក Donald Trump និងត្រូវជាកូនប្រសាររបស់លោក គឺលោក Jared Kushner ទីប្រឹក្សាសន្តិសុខជាតិអាមេរិក លោក Robert O’Brien បេសកកជនសម្រាប់តំបន់មជ្ឈឹមបូព៌ាលោក Avi Berkowitz និងបេសកជនសម្រាប់ប្រទេសអ៊ីរ៉ង់លោក Brian Hook។ ដោយឡែកមន្ត្រីជាន់ខ្ពស់របស់ប្រទេសអ៊ីស្រាអែលដឹកនាំដោយទីប្រឹក្សាសន្តិសុខជាតិអ៊ីស្រាអែល និងអគ្គនាយកមកពីក្រសួងជាជាច្រើន។
ថ្លែងទៅកាន់ក្រុមអ្នកសារព័ត៌មានមុនពេលឡើងជិះយន្តហោះ លោក Kushner និយាយថា បើទោះបីនេះ ជាជើងហោះហើរជាប្រវត្តិសាស្ត្រមួយ ក៏«យើងសង្ឃឹមថា ព្រឹត្តិការណ៍នេះ នឹងក្លាយជាចំណុចចាប់ផ្តើមនៃដំណើរជាប្រវត្តិសាស្រ្តថ្មីមួយទៀតសម្រាប់តំបន់មជ្ឈិមបូព៌ា និងឆ្ងាយហួសពីនឹង៕
