ភ្ជាប់​ទៅ​គេហទំព័រ​ទាក់ទង

Hello VOA៖ អ្នក​ជំនាញ​ថា​ការ​អប់រំ​ចំណេះ​តែ​មួយ​មុខ​មិន​អាច​លុប​បំបាត់​អំពើ​ពុករលួយ​នៅ​កម្ពុជា​បាន​ទេ​

  • សាយ មុន្នី

លោក​ ឱម យិនទៀង​ ប្រធាន​អង្គភាព​ប្រឆាំង​អំពើ​ពុក​រលួយ​ ពន្យល់​ពី​របៀប​ដាក់ពាក្យ​ប្តឹង​អំពើ​ពុក​រលួយ​ នៅ​ក្នុង​ទិវា​អន្តរជាតិ​ប្រឆាំង​អំពើ​ពុក​រលួយ​ នៅ​ឯ​រោង​​មហោស្រព​កោះពេជ្រ ​រាជធានី​ភ្នំពេញ​ នៅ​ថ្ងៃ​ពុធ​ ទី​៩​ ខែធ្នូ​ ឆ្នាំ​២០១៥​។ (ហ៊ាន សុជាតា​/VOA)

លោក ព្រាប កុល នាយក​ប្រតិបត្តិ​នៃ​អង្គការ​តម្លាភាព​កម្ពុជា បាន​ថ្លែង​ថា គេ​ចាំ​បាច់​ត្រូវ​អប់រំ​អំពី​សីលធម៌​និង​គុណធម៌​ដើម្បី​បង្រៀន​មនុស្ស​ឲ្យ​ស្អប់ខ្ពើម​អំពើ​ពុករលួយ​តាំង​ពី​តូចៗ​ទៅ។

អ្នក​តស៊ូ​មតិ​ប្រឆាំង​អំពើ​ពុករលួយនៅ​កម្ពុជា លើក​ឡើង​ថា ការ​អប់រំ​តែ​ចំណេះ​ដឹង​និង​ជំនាញ​វិជ្ជាជីវៈ​នៅ​តាម​គ្រឹះស្ថាន​អប់រំ​នៅ​មិន​ទាន់​គ្រប់គ្រាន់​ដើម្បី​លុបបំបាត់​អំពើ​ពុករលួយ​នៅ​ក្នុង​ប្រទេស​នេះ​បាន​ទេ។​

លោក ព្រាប កុល នាយក​ប្រតិបត្តិ​នៃ​អង្គការ​តម្លាភាព​កម្ពុជា បាន​ថ្លែង​នៅ​ក្នុង​កម្មវិធី​ Hello VOA នៅ​ថ្ងៃ​ព្រហស្បតិ៍ ទី​១០ ខែ​មីនា​នេះ​ថា គេ​ចាំ​បាច់​ត្រូវ​អប់រំ​អំពី​សីលធម៌​និង​គុណធម៌​ដើម្បី​បង្រៀន​មនុស្ស​ឲ្យ​ស្អប់ខ្ពើម​អំពើ​ពុករលួយ​តាំង​ពី​តូចៗ​ទៅ។

«អំពើ​ពុករលួយ​កើត​ចេញ​ពី​ចិត្ត​ពុករលួយ។ ផ្នត់​គំនិត​ពុករលួយ​នេះ នាំ​ឲ្យ​ស្តែង​ចេញ​ជា​សកម្មភាព​ពុករលួយ»។

រូបឯកសារ៖ លោក ព្រាប កុល នាយកប្រតិបត្តិនៃ​អង្គការតម្លាភាពកម្ពុជា។
រូបឯកសារ៖ លោក ព្រាប កុល នាយកប្រតិបត្តិនៃ​អង្គការតម្លាភាពកម្ពុជា។

​អង្គការ​តម្លា​ភាព​អន្តរជាតិ កាល​ពី​ឆ្នាំ​មុន​បាន​ចាត់​ចំណាត់​ថ្នាក់​ប្រទេស​កម្ពុជា ថា​ជា​ប្រទេស​ដែល​គេ​យល់​ថា ជា​ប្រទេស​ពុករលួយ​ជាងគេ​នៅ​ក្នុង​តំបន់​អាស៊ីអាគ្នេយ៍​ក្នុង​ឆ្នាំ​២០១៥។

លោក ព្រាប កុល​ ថ្លែង​ថា ដើម្បី​បង្ការ​ការ​ឆ្លង​ផ្នត់​គំនិត​ពុករលួយ​នេះ​ ពី​មនុស្ស​ជំនាន់​មុន មក​មនុស្ស​ជំនាន់​ក្រោយ គេ​ត្រូវ​រៀបចំ​ឲ្យ​មាន​យន្តការ​ទប់ស្កាត់​ «ជំងឺ​ពុករលួយ»​នេះ នៅ​គ្រប់​ស្រទាប់​សង្គម​និង​ថ្នាក់​ដឹកនាំ​រដ្ឋ ដោយ​តម្រូវ​ឲ្យ​មាន​ប្រព័ន្ធ​តុលាការ​យុត្តិធម៌ ការ​តែងតាំង​ឬ​ជ្រើសរើស​បុគ្គលិក​និង​ថ្នាក់​ដឹកនាំ​ស្ថាប័ន​ទៅតាម​សមត្ថភាព​និង​ជំនាញ​បុគ្គល ជាជាង​តាម​រយៈ​បក្សពួក និង​គ្រួសារ​និយម​ជាដើម ជា​ពិសេស​គឺ​ផ្លាស់ប្ដូរ​ផ្នត់​គំនិត​ដែល​ឲ្យ​តម្លៃ​ទៅលើ​បុណ្យស័ក្ដិ​និង​សម្ភារៈនិយម​ជា​ធំ៕

XS
SM
MD
LG