អូស្ត្រាលីជាប្រទេសដែលមានបាតុភូតគ្រោះធម្មជាតិធ្ងន់ធ្ងរបំផុត។
ក្រុងមួយចំនួនបានប្តូរពីការប្រឈមនឹងគ្រោះរាំងស្ងួតទៅគ្រោះទឹកជំនន់វិញក្នុងពេលតែមួយថ្ងៃ ខណៈមានភ្លៀងធ្លាក់ខ្លាំងនៅក្នុងរដ្ឋ New South Wales និងនៅតាមផ្នែកខ្លះនៃរដ្ឋ Queensland។
កសិករមួយចំនួនដែលរងគ្រោះដោយសារគ្រោះរាំងស្ងួតបានទទួលទឹកភ្លៀងល្អបំផុតដែលមិនធ្លាប់មានក្នុងរយៈពេល១ទសវត្សរ៍នេះ ប៉ុន្តែអាជ្ញាធរគ្រប់គ្រងគ្រោះមហន្តរាយបានព្រមានពីគ្រោះទឹកជំនន់ភ្លាមៗដែលអាច«គំរាមកំហែងដល់អាយុជីវិត»។
ចាប់ពីថ្ងៃសុក្រ (ទី៧ ខែកុម្ភៈ) មកទីក្រុងធំបំផុតរបស់អូស្ត្រាលី គឺទីក្រុងស៊ីដនីមានកម្រិតទឹកភ្លៀងជិត៤០០មម។ បរិមាណទឹកភ្លៀងនេះស្នើនឹងកម្រិតទឹកភ្លៀងដែលទីក្រុងនេះធ្លាប់ទទួលបានក្នុងរយៈពេល៤ខែ។ ទឹកភ្លៀងកាន់តែច្រើនត្រូវបានព្យាករណ៍ថា នឹងធ្លាក់នៅក្នុងសប្តាហ៍នេះ។
ការធ្លាក់ភ្លៀងដ៏ច្រើននេះកំពុងតែជួយដល់កិច្ចប្រឹងប្រែងក្នុងការពន្លត់ភ្លើងឆេះព្រៃ។
ភ្លើងឆេះព្រៃដ៏ធំមួយនៅភាគខាងត្បូងនៃក្រុងស៊ីដនីដែលបានឆាបឆេះជាង៧០ថ្ងៃ និងបានបំផ្លិចបំផ្លាញផ្ទះ៣០០ខ្នង ត្រូវបានពន្លត់ហើយ។ ភ្នំ Gospers ដែលត្រូវបានគេហៅថា «ភ្នំអណ្តាតភ្លើងយក្ស» នៅប៉ែកពាយព្យនៃក្រុងស៊ីដនីក៏ត្រូវបានពន្លត់ដែរ។
កាលពីថ្ងៃអង្គារ (ទី៤ ខែកុម្ភៈ) ភ្លើងឆេះព្រៃចំនួន២៦កន្លែងនៅកំពុងឆាបឆេះនៅទូទាំងរដ្ឋ New South Walesនៅឡើយ ហើយភ្លើងឆេះព្រៃ៤កន្លែងទៀតមិនទាន់អាចគ្រប់គ្រងបាននៅឡើយទេ។ អណ្តាតភ្លើងនៅតាមតំបន់ខ្លះនៅបន្តឆាបឆេះរាប់សប្តាហ៍ និងអាចចូលដល់រាប់ខែផងក៏ថាបាន។
លោក David Elliott រដ្ឋមន្ត្រីគ្រប់គ្រងគ្រោះមហន្តរាយនៃរដ្ឋ New South Wales និយាយថា ភ្លៀងធ្លាក់ខ្លាំងបានធ្វើឱ្យមានភាពច្របូកច្របល់នៅក្នុងតំបន់មួយចំនួន ប៉ុន្តែអាចពន្លត់ភ្លើងឆេះព្រៃទាំងអស់នៅក្នុងរដ្ឋនេះបាន ក្នុងរយៈពេលប៉ុន្មានថ្ងៃតែប៉ុណ្ណោះ។
លោក David Elliott និយាយថា «យើងរំពឹងថា តំបន់មូលដ្ឋានរបស់រដ្ឋាភិបាលជាច្រើននឹងត្រូវប្រកាសពីគ្រោះមហន្តរាយធម្មជាតិ ដែលអនុញ្ញាតឱ្យពួកគេទទួលបានមូលនិធិបន្ថែម ការគាំទ្របន្ថែម និងមានការឆ្លើយតបត្រឹមត្រូវពីភ្នាក់ងារជួយសង្គ្រោះបន្ទាន់របស់យើង។ រឿងល្អនៃការធ្លាក់ភ្លៀងនេះគឺថា ឥឡូវនេះយើងអាចបញ្ចប់យុទ្ធនាការពន្លត់ភ្លើងឆេះព្រៃដែលមានរយៈពេល៦ខែ»។
នៅក្នុងរដ្ឋ Western Australia ការសម្អាតនៅតែបន្តធ្វើ បន្ទាប់ពីព្យុះត្រូពិចមួយបានបោកបក់ទៅលើតំបន់ឆ្នេរនៅប៉ែកពាយព្យនៃរដ្ឋនេះ ដែលបង្កឱ្យមានការបំផ្លិចបំផ្លាញ និងការបាក់ដីយ៉ាងខ្លាំង។
វិបត្តិភ្លើងឆេះព្រៃអូស្ត្រាលីបានចាប់ផ្តើមនៅខែកញ្ញា ឆ្នាំមុន។ មនុស្សយ៉ាងហោចណាស់៣៣នាក់បានស្លាប់ ហើយផ្ទះសម្បែងរាប់សិបខ្នងរងការបំផ្លិចបំផ្លាញ។ ដីជាង១១លានហិកតា ដែលមានទំហំប៉ុនប្រទេសអង់គ្លេស ត្រូវបានប្រេះស្ងួតបែងក្រហែង៕
