ខណៈដែលប្រទេសចិនបន្តរាយការណ៍ពីចំនួនធ្លាក់ចុះនៃករណីឆ្លងថ្មីរបស់វីរុសកូរ៉ូណា Covid-19 មន្ត្រីសុខាភិបាលពិភពលោកបានសរសើរវិធានការរបស់ចិនក្នុងការឆ្លើយតបទៅនឹងការរាលដាលនៃមេរោគថ្មីនេះ ហើយបានព្រមានរដ្ឋាភិបាលប្រទេសដទៃឲ្យប្រុងប្រៀបខ្លួនចាត់វិធានការធ្ងន់ៗ នៅពេលមេរោគនេះមានវត្តមាននៅក្នុងដែនដីខ្លួន។
មន្ត្រីសុខាភិបាលចិននិយាយកាលពីថ្ងៃពុធថា មានករណីឆ្លងថ្មីចំនួន៤០៦ ដែលស្ទើរតែទាំងអស់កើតនៅក្នុងខេត្តហ៊ូប៉េដែលជាប្រភពនៃការផ្ទុះរាលដាល និងការស្លាប់ថ្មីចំនួន ៥២ ករណីដែលទាំងអស់នៅក្នុងខេត្តនេះ ដែលជាទីអាជ្ញាធរចិនបានបិទសកម្មភាពអស់ជាច្រើនសប្តាហ៍មកហើយ។
មន្ត្រីជាន់ខ្ពស់ម្នាក់នៃអង្គការសុខភាពពិភពលោក WHOបានសន្និដ្ឋានថា វិធានការរបស់ប្រទេសចិនបាន«ផ្លាស់ប្តូរទិសដៅវិវត្តន៍នៃការផ្ទុះរាលដាល»នេះ និងការពារពលរដ្ឋចិនរាប់សែននាក់ពីការឆ្លងមេរោគនេះ។
ប៉ុន្តែដោយមេរោគនេះបានឆ្លងដល់ប្រទេសជាង៣០ទៀត រួមទាំងនៅអឺរ៉ុបនិងតំបន់មជ្ឈិមបូព៌ាប្រទេសផង មន្ត្រី WHO ថារដ្ឋាភិបាលផ្សេងៗត្រូវគិតជាមុនពីរៀបកំណត់ករណីឆ្លងថ្មីនិងប្រើវិធានការដាក់មនុស្សទាក់ទងនឹងការឆ្លងឲ្យនៅដាច់ដោយឡែកពីគេ។ មន្ត្រីរូបនោះក៏បានអំពាវនាវឲ្យពលរដ្ឋប្រទេសនានា ធ្វើតាមមធ្យោបាយការពារខ្លួនមួយចំនួន ដូចជាការលាងដៃជាប្រចាំ ឈរយ៉ាងហោចណាស់១ម៉ែត្រពីមនុស្សដែលកណ្តាស់ឬក្អក ហើយសម្រាប់អ្នកដែលមានរោគសញ្ញានានា គួរទៅជួបគ្រូពេទ្យ។
ប្រទេសកូរ៉េខាងត្បូងនៅថ្ងៃពុធនេះ មានចំនួនអ្នកឆ្លងមេរោគ Covid-19 សំរុបកើនដល់ចំនួន១.២៦១នាក់ និងការស្លាប់កើនដល់១១នាក់។ យោធាសហរដ្ឋអាមេរិកនៅថ្ងៃពុធនេះក៏បញ្ជាក់ថា មានទាហានអាមេរិកាំងម្នាក់ដែលប្រចាំការនៅកូរ៉េខាងត្បូងក៏បានឆ្លងមេរោគនេះហើយកំពុងត្រូវបានគេដាក់ឲ្យនៅដោយឡែកពីគេ។
មានការបារម្ភខ្លាំងទាក់ទងនឹងការផ្ទុះរាលដាលថ្មីៗនៅប្រទេសអ៊ីតាលីនិងអ៊ីរ៉ង់ ដែលគេគិតថាអ្នកឆ្លងក្នុងប្រទេសទាំងពីរបានបន្តឆ្លងដល់ប្រទេសក្បែរខាងផ្សេងទៀត។
ប្រទេសអ៊ីតាលីនៅថ្ងៃនេះមានចំនួនអ្នកឆ្លងកើនដល់ជាង៣០០ករណីនិងការស្លាប់ចំនួន១០ករណី។ រដ្ឋមន្ត្រីសុខាភិបាលអាល់ហ្សេរីថ្លែងកាលពីថ្ងៃអង្គារថា ពលរដ្ឋអ៊ីតាលីម្នាក់បានធ្វើតេស្តវិជ្ជមានមានមេរោគកូរ៉ូណាក្រោយពីទៅដល់អាល់ហ្សេរីកាលពីសប្តាហ៍មុន។ នេះជាករណីទី២នៅទ្វីបអាហ្វ្រិកបន្ទាប់ពីករណីមួយទៀតនៅអេហ្ស៊ីប។
ប្រទេសអ៊ីរ៉ង់ថា ខ្លួនមានការស្លាប់សរុប១៩ករណី និងឆ្លង១៣៩ករណីមកត្រឹមថ្ងៃពុធនេះ។ អ្នកឆ្លងនៅអ៊ីរ៉ង់បានឆ្លងបន្តទៅប្រទេសកូវ៉ែតដែលមានអ្នកឆ្លង១៨នាក់ និងប្រទេសប៉ារ៉ែនដែលមានឆ្លងឆ្លង២៦នាក់ត្រឹមថ្ងៃពុធនេះ។
ការបារម្ភអំពីផលប៉ះពាល់សេដ្ឋកិច្ចនៃមេរោគកូរ៉ូណាបានធ្វើឲ្យទីផ្សារភាគហ៊ុនពិភពលោកធ្លាក់ចុះនៅសប្តាហ៍នេះ៕
